SAUMI NA TARO VAKAIVOLATABU
Era na vulica vakacava na gone mera lomana na Kalou?
Vakavulici luvemu me kila qai lomana na Kalou ni raica na veika buli
E rawa nira vulica na gone mera lomana na Kalou ke ra vakadinadinataka ni bula dina tiko o koya qai lomani ira. Kena ikarua, e vinakati mera kilai koya. (1 Joni 4:8) Kena ivakaraitaki, ena vinakati mera kila na inaki ni nona buli keda, vuna e vakalaiva tiko kina na veika rarawa kei na veika ena cakava me baleti keda ena gauna se bera mai.—Wilika Filipai 1:9.
Mera lomana na Kalou na luvemu, e bibi mo vakaraitaka ni o lomani koya tale ga. Sega ni vakabekataki ni na uqeti ira mera muria na nomu ivakaraitaki.—Wilika Vakarua 6:5-7; Vosa Vakaibalebale 22:6.
O na uqeta vakacava na lomadra na luvemu?
E kaukaua na Vosa ni Kalou. (Iperiu 4:12) Vukei ira gona mera kila na yavu ni ivakavuvuli era tu kina. O Jisu e dau uqeta na lomadra na lewenivanua ena nona dau taro, vakarorogo, kei na nona dau vakamacalataka na iVolatabu. Mo uqeta tale ga na lomadra na luvemu, vakatotomuria na ivakarau ni veivakavulici i Jisu.—Wilika Luke 24:15-19, 27, 32.
Kena ikuri, nodra dikeva tale ga na ivolatukutuku ena iVolatabu me baleta na sala e veimaliwai kina na Kalou kei keda, ena vukei ira mera kila ra qai lomana na Kalou. Era tiko ena www.jw.org na ivola o rawa ni vakayagataka.—Wilika 2 Timoci 3:16.