Era Vakayagataka Vakacava na Cau na iVakadinadina i Jiova?
Keimami vakayagataka na cau me tokoni kina na neimami cakacaka, kei na cakacaka ni veivuke e vuravura raraba. Na inaki levu duadua ni neimami cakacaka, oya me keimami vukei ira e levu na lewenivanua mera tisaipeli i Karisito Jisu.—Maciu 28:19, 20.
E sega ni vakayagataki na cau me vutuniyau kina e dua. Era sega ni saumi neimami iliuliu ni lotu. Keimami sega tale ga ni saumi ena vunau e veivale. Era sega tale ga ni dau saumi o ira na veiqaravi tiko ena neimami valenivolavola ni tabana, kei na itikotiko i liu, okati kina ratou na iLawalawa Dauvakatulewa.
Eso na Neimami Cakacaka
Vakarautaka na ivola: E veiyabaki keimami vakadewataka, tabaka, vakauta qai veisoliyaka e vica vata na milioni na iVolatabu, kei na ivola vakaivolatabu e soli wale. E tiko tale ga na ivola vakaivolatabu ena neimami website na jw.org kei na JW Library e sega ni saumi, se me keimami rawa ilavo kina.
Tarataravaki kei na Vakavinakataki ni Vale: Keimami tara na vanua ni sokalou rawarawa ga e veiyasa i vuravura, me ganiti ira na ivavakoso mera soqoni vata qai vakalagilagia na Kalou. E caka tale ga qori ena valenivolavola ni tabana kei ofisi ni vakadewa. Ra qai vakaitavi vakalevu kina o ira na bolecakacaka, e lailai gona na ilavo e vakayagataki kina.
Vale ni Volavola: Na cau ni cakacaka e vuravura raraba e tokoni kina nodra cakacaka na veiqaravi tiko ena itikotiko i liu, valenivolavola ni tabana, ofisi ni vakadewa kei ira na ivakatawa ni tabacakacaka.
Vunau: Keimami sega ni saumi ena vunautaki ni tukutuku vinaka, se neimami vakavulici ira eso tale e “na vosa ni Kalou.” (2 Korinica 2:17) Ia me vaka ga na ka era cakava na lotu vaKarisito ena imatai ni senitiuri, e vakarautaki ga nodra itikotiko kei na ka era gadreva o ira era vakayagataka vakalevu nodra gauna ena cakacaka ni vunau.—Filipai 4:16, 17; 1 Timoci 5:17, 18.
Veivakavulici: E tokoni ena cau neimami soqo ni tabacakacaka kei na soqo. Keimami vakarautaka tale ga na vidio kei na katokatoni e yavutaki ena iVolatabu. E vakarautaki tale ga na veivakavulici vei ira na qase ni vavakoso kei ira na dauveiqaravi vakatabakidua me rawa nira qarava vinaka nodra ilesilesi.
Vakacoko: Keimami vakarautaka na kakana, wai kei na vale vei ira na vakaleqai ena leqa tubukoso kei na kena eda vakavuna ga. Na veivuke va qori e sega ni yaga wale ga vei ira “keimami vakabauta vata,” e yaga tale ga vei ira keimami sega ni vakabauta vata.—Kalatia 6:10.