Vula Lavotaki ni Soli iVolacebaceba—20 Okotova ina 16 Noveba!
1 Me tekivu ena Moniti 20 Okotova eda na veisoliyaka me va na macawa e dua na ivolacebaceba vou e kena ulutaga, O Via Kila na Ka Dina? E nuitaki nira na kune ena gauna lavotaki qo e levu na tataleitaki era via kila na ivurevure duadua ga ni ka dina.—Joni 17:17.
2 E rawarawa na kena vakamacalataki ena ivolacebaceba na isau ni ono na taro bibi ena iVolatabu: “E kauaitaki keda beka na Kalou?” “Ena oti beka na ivalu kei na rarawa?” “E bula tale tiko e dua na ka nida sa mate?” “Na cava na inuinui me baleti ira na sa mate?” “Na masu vakacava e rogoca na Kalou?” kei na “Rawati vakacava na marau?” E se sega ni sauma rawa na ono na taro qori o lotu ni veivanua vaKarisito. O ira mada ga na sega ni lotu vaKarisito era vaqaqa lo tu, ia era sega ni kila ni matata vakasigalevu na kena isau ena iVolatabu. O koya gona e namaki mera taleitaka e levu na itukutuku qo.
3 Tarai ni Yalava: Me tarai vinaka sara na yalava. Ke levu, era na rairai uqeti iko na qase ni ivavakoso mo laiva toka na ivolacebaceba ena vale era lala tu ena imatai ni gauna o veisoliyaka kina. Kua ni guilecavi ira na tiko tikivi iko, ira na wekamu, itokani vakacakacaka se koronivuli, kei ira oni dau veitalanoa wasoma. De dua o na rawa ni painia veivuke ena vula o Okotova se Noveba. E toso vinaka tiko beka e dua na luvemu se nomu vuli iVolatabu e ganiti koya me tomani keda, me dua na dautukutuku bera ni papitaiso? Tukuna sara vei ratou na qase.
4 Ka mo Kaya: Mera rogoca e levu na itukutuku qo e vinaka mo kua ni talimagimagi. Taroga ga e dua na taro mai na ono e volai toka ena tabana e liu ni ivolacebaceba, vakaraitaka sara na kena isau e tiko e loma. Qo ena uqeti ira na dautukutuku mera veisautaka na nodra ivakamacala me ganita na yalava. Ke dua e tataleitaki, vola na yacana qai lesuvi koya tale. E rawa ni soli vata ena muanimacawa na ivolacebaceba kei na mekesini. Ni cava na vula lavotaki ena 16 Noveba, eda na veisoliyaka na ivola Kaya na iVolatabu. Ke vo na ivolacebaceba, me qai veisoliyaki ga vaka na ivolacebaceba tale e so.
5 Caka Vuli iVolatabu: E tabaki vakatabakidua na ivolacebaceba qo meda caka vuli iVolatabu kina. Nida sikova lesu e dua na tataleitaki eda rawa ni taroga vua se ka dina cava mai na iVolatabu e vakacegui koya? Dusia vua na iotioti ni tabana e vakamacalataki kina na icakacaka ni vuli iVolatabu, solia sara vua e dua na ivola Kaya na iVolatabu. Ke levu na gauna, drau dikeva vakalekaleka e dua se rua na parakaravu mai na wase e vakamacalataki vinaka kina na ulutaga drau a veitalanoataka.
6 O Jiova e vakasaqarai ira na qaravi koya “vakayalo ka vakaidina.” (Joni 4:23) Meda vakaitavi kece mada ga ena cakacaka lavotaki ni nodra vukei e so tale mera kila na ka dina!