Nuitaki na iVakavuvuli ena iVolatabu

ESO ERA KAYA NI SA SEGA NI NUITAKI. E vakatauvatana e dua na vuniwai na ivakavuvuli ena iVolatabu ina ivola e vulici kina na kemisitiri ena veiyabaki ni 1920. E nanuma e dua na dauveivakadiloi ni kena muri na ivakavuvuli ena iVolatabu, e vaka ga na vakayagataki ni ivoladusidusi ni kompiuta makawa me raici kina na ivakavakayagataki ni kompiuta vou. Kena ibalebale era nanuma eso ni sa madra na ivakavuvuli ena iVolatabu.

E dredre me vakabauti ni na via vakayagataki e dua na ivola makawa me veidusimaki, ni sa levu na ivakasala kei na idusidusi vovou ena internet. Me kena ivakaraitaki, e levu na daunivakasala era dau soli vakasama ena so na ulutaga e veitalanoataki ena tivi. E okati e keri nodra ivakasala na vuniwai ni mona, o ira era dau dikeva na ivakarau ni bula, kei ira na dauvolaivola. E rawailavo tale ga vakalevu na ivola e volitaki ena sitoa, e volai tu kina na ivakasala e nanumi ni na walia noda leqa.

E vakaraitaka qori ni sa rawarawa sara na kena kumuni na itukutuku eda vinakata. Ia na cava meda rai kina ena iVolatabu ni se volai sara ena 2,000 na yabaki sa oti? E cala nodra rai na dauveivakadiloi me baleta na iVolatabu, e sega ni vaka e dua na ivola makawa ni kemisitiri se ivoladusidusi ni kompiuta makawa. E veiveisau na veika vakasaenisi kei na iyaya vakalivaliva, ia e sega ni veisau na ka eda vinakata. Eda via kila na inaki ni bula, eda vinakata na bula marau kei na sautu, me vinaka na noda bula vakavuvale, me so tale ga na noda itokani vinaka.

E rawa ni vukei keda na iVolatabu ena ituvaki kece qori. E vakaraitaka na iVolatabu ni vakavuna sara ga na Dauveibuli na ka e volai kina. E vakarautaka na idusidusi e yaga ena basoga kece ni noda bula, kei na ka meda cakava ke sotavi na ituvaki dredre. (2 Timoci 3:16, 17) E talei dina na iVolatabu ni yaga tawamudu na ivakasala e tu kina, qai sega vakadua ni veisau! E kaya sara ga na iVolatabu: “E bula na vosa ni Kalou.”—Iperiu 4:12.

Eda kila vakacava ni dina na ka e kaya qori na iVolatabu, ni se yaga tiko ga nikua na kena ivakasala? E vakarautaki ena Vale ni Vakatawa qo e vica na ulutaga me vukei iko ena tikina qori.