“Na Cava e Sega ni Tarova Kina na Kalou?”
“AU LOMATAROTAROTAKA TU GA: CAVA E SEGA NI TAROVA KINA NA KALOU?”—Tui Tabu Benedict XVI, ni veisiko ena keba ni veivakararawataki e Auschwitz, Poladi.
NI YACO NA LEQA, O DAU VEINANUYAKA TALE GA, ‘CAVA E SEGA NI TAROVA KINA NA KALOU?’ SE NI O SOTAVA NA ITUVAKI RARAWATAKI, O BAU LOMATAROTAROTAKA KE KAUAITAKI IKO NA KALOU?
De dua o duavata kei na rai nei Sheila mai Merika. A susu ena dua na vuvale lotu, qai kaya: “Au vakabauta na Kalou niu se gone baleta ni Dauveibuli. Ia au sega ni vakabauta niu rawa ni toro voleka vua. Au nanuma ni raici au tu ga mai vakayawa. Au sega ni vakabauta ni cati au na Kalou, au sega tale ga ni vakabauta ni kauaitaki au.” Na cava e vakatitiqa kina va qori o Sheila? E kaya: “E sotava veitaravi na leqa neitou vuvale, kena irairai ni sega sara ga ni bau vukei keitou na Kalou.”
Me vakataki Sheila, o rairai vakabauta tale ga ni bula tiko na Kalou Kaukaua Duadua. Ia de dua o veinanuyaka ke kauaitaki iko dina. A va tale ga qori nona rai na turaga yalododonu o Jope. E vakabauta ni kaukaua qai vuku na Dauveibuli, ia e vakatitiqataka ni kauaitaki koya. (Jope 2:3; 9:4) A sotava veitaravi na ituvaki veivakayalolailaitaki o Jope qai nanuma ni na sega ni kunea na vakacegu. E mani taroga vua na Kalou: “Na cava oni vunia kina na matamuni qai wiliki au meu kemuni meca?”—Jope 13:24.
Na cava e kaya na iVolatabu? E dodonu me beitaki na Kalou ni sotavi na leqa? Eda vakadeitaka vakacava ni kauaitaki keda vakailawalawa, yadudua tale ga na Kalou? Eda vakadeitaka vakacava ni kauaitaki keda, kilai keda vinaka, dau nanumi keda, qai vukei keda ena gauna ni leqa?
Ena vakamacalataki ena vica na ulutaga tarava na ivakadinadina ni nona kauaitaki keda na Kalou nida vakasamataka na nona ibulibuli. (Roma 1:20) Eda na dikeva tale ga na ka e kaya na iVolatabu me baleta na nona dau veikauaitaki na Kalou. Na levu ga ni nomu “kilai koya” ni o dikeva na nona ibulibuli kei na nona Vosa, na dei tale ga ni nomu vakabauta ni ‘kauaitaki iko.’—1 Joni 2:3; 1 Pita 5:7.