Na Cava Ena Vukei Keda Meda Tudei tu ga Ena Vakabauta?
1 Mai na gauna eda tekivu sosoqoni kina ena isoqosoqo i Jiova, sa da vakila ni vakavumarau vei keda na noda toso vakayalo! Ia, me rawa ni ‘ti sobu sara na wakada, meda tarai cake, me kaukaua cake tale ga na noda vakabauta,’ e dodonu meda toso tiko ga vakayalo. (Kolo. 2:6, 7, VV) E levu era sa toso vinaka sara vakayalo, ia e so era ciri tale tiko yani nira sega ni “tu dei e na vakabauta.” (1 Kor. 16:13) E rawa nida taqomaki keda mai na leqa oqo. Ena rawa vakacava?
2 Vakaogai Keda Ena Ka Vakayalo: Vakadeitaka mo muria vinaka e dua na nomu ituvatuva vakayalo ena loma ni isoqosoqo i Jiova. Ena vanua ga oqo eda qaravi vinaka kina vakayalo. Na soqoni ni ivavakoso, soqo ni tabacakacaka, kei na soqo ni tikina era vakaukauataki keda vakayalo, era vakataudeitaki keda tale ga. Ia, ena yaco ga oqo ke da dau tiko ena veisoqoni oqo. (Iper. 10:24, 25) Ena ti sobu tale ga na wakada qai kaukaua ke da dau wilika wasoma na iVolatabu, Na Vale ni Vakatawa, na Yadra!, kei na ivola era vakamacalataki kina na kakana dina mai na Vosa ni Kalou. (Iper. 5:14) Ena yaga tawamudu tale ga vei keda ke da kotora e so na noda isausau vakayalo, da qai kakavaka sara.—Fpai. 3:16.
3 Nodra Veivuke na Matua: Vakalevutaka nomu dau maliwai ira na matua vakayalo ena ivavakoso. Kilai ira na qase, ni o ira ga oqo era na vakaukauataki keda. (1 Ces. 2:11, 12) Ciqoma na nodra ivakasala, se ka era vakatura. (Efeso 4:11-16) Era dau vinakata tale ga na dauveiqaravi vakaitalatala mera vukei ira na tacidra me qaqaco nodra vakabauta, dau rai gona vei ira na tacida oqo mera vakayaloqaqataki keda.
4 Vakacava, o vinakata mo vukei ena cakacaka vakaitalatala? Lai raici ira na qase, kerea nodra veivuke. De dua e rawa ni biu na yacamu ena Porokaramu ni Nodra Veivukei na Painia. O se qai papitaiso ga? E ikalawa levu ni nomu matua vakayalo na nomu vulica vakataki iko na ivola na Cokonaki, kei na nomu muria na veika e tukuni kina. O itubutubu? Kua ni cegu ena nomu vakaukauataki ira tiko ga vakayalo na luvemu.—Efeso 6:4.
5 Ni ti me vakawakana na noda vakabauta qai dei, eda na vakila nida veivolekati sara kei Jiova, eda volekati ira tale ga na tacida. Oqo ena vakadeitaki keda ni ravu mai o Setani, ena vaqaqacotaka tale ga na noda nuitaka na veigauna tawamudu se bera mai.—1 Pita 5:9, 10.