E Tiko Beka Vei Iko na Yalo ni Solibula?

¹ Na noda vakavinavinakataka na nona lomasoli o Jisu Karisito ena ka a cakava ena vukuda e dodonu me uqeti keda kece meda solibula ena sala eda vakayagataka kina na taledi e tu vei keda, noda igu, kei na ka eda vinaka kina. E vakamasuti keda kina na iVolatabu: “Dou solia na yagomudou me imadrali bula, e savasava, e vakadonuya na Kalou, ena veiqaravi tabu.” (Roma 12:1, NW) Ena vukei keda meda dau dikevi keda ena so na gauna, meda raica kina se sa tiko vei keda na yalo oqo ena kena ivakatagedegede vinaka duadua eda rawata me salavata kei na keda ituvaki.

² Ena Kena Qarai na Kilaka Mai na iVolatabu: O sa vakatikitikitaka e dua na gauna mo wili iVolatabu, mo vuli tale ga kina vakawasoma? O dau vakayacora na ka o sa tuvanaka? E dau nomu ivalavala li mo vakavakarau vinaka ina soqoni ni ivavakoso? Ke o ulunivuvale, o dau vuli iVolatabu vakawasoma kei iratou na lewe ni nomu vuvale? Ena rawa ni vakayacori na veika sa cavuti oti oqo ke da musuka sobu na gauna ni noda sara retioyaloyalo, gauna eda vakayagataka ena kompiuta, se ena so tale na veika vaka oqo. Ia, e lailai wale sara na gauna o vakuai iko kina oqo, ni o vakasamataka ni gauna o vakayagataka ena Vosa ni Kalou ena rawa ni solia vei iko na bula tawamudu!​—Joni 17:3.

³ Ena Nodratou Vakavulici na Luvemu: Na gauna vinaka duadua me bucini kina vua e dua na yalo ni solibula, oya ni se gone. Vakavulici iratou na luvemu me ratou raica ni dina e tiko na gauna ni qito, ia e tiko tale ga na gauna ni cakacaka, kei na gauna me vakayagataki ena cakacaka vakalou. (Efeso 6:4) Lesia vei iratou e so na cakacaka e vale. Me tiko na gauna mo tuvanaka mo cakacaka vakaitalatala kina vakawasoma kei iratou na luvemu. Qai salavata na ka o vakatavulica kei na nomu ivakaraitaki vinaka.

⁴ Ena Cakacaka ni iVavakoso: E dau bulabula na ivavakoso ke ra solibula yadua na lewena ena cakacaka e yaga vei keda kece. (Iper. 13:16) E rawa beka mo vakalevutaka na gauna ni nomu vunautaka na Matanitu ni Kalou, kei na nomu veivakatisaipelitaki? O rawa ni bole mo vukea e dua e tauvimate, se dua sa qase, mo vakavodoki koya beka ina soqoni?

⁵ Ni bera toka ga vakalailai na nona solibula vakasakiti, a vakasalataki iratou na nona tisaipeli o Jisu me ratou vakabibitaka vakatabakidua ena nodratou bula na veika ni Matanitu ni Kalou, me qai tarava na veika tale e so. (Maciu 6:33) Ni tiko vei keda na yalo ni solibula vaka oqo eda na marau kina vakalevu, eda na rawa ni tosoya tiko ga na noda qaravi Jiova ena reki.