Me vu Mai Lomamu na Nomu iSoro Vei Jiova
“Se mani cava oni cakava, ni cakava mai vu ni lomamuni me vaka oni cakava tiko vei Jiova.”—KOLO. 3:23.
O NA SAUMA VAKACAVA:
Eda na vakacaucautaki Jiova vakacava ena ka eda cakava e veisiga?
Na isoro cava eda cabora ena noda sokalou vei Jiova?
Na cava eso na ka eda rawa ni solia vei Jiova?
1-3. (a) Vakacava e vakaraitaka na mate i Jisu ena kaunirarawa ni na sega ni vinakati meda cabora vei Jiova e dua na isoro? Vakamacalataka. (b) Na taro cava e basika me baleta na noda isoro nikua?
ENA imatai ni senitiuri S.K., e vakamatatataka o Jiova vei ira na nona tamata ni isoro ni veivoli i Jisu e sa mai bokoca na Lawa a soli vei Mosese. (Kolo. 2:13, 14) E sega tale ni gadrevi na vakacaboisoro era dau cakava na Jiu ena vica na drau na yabaki sa oti. E sa vakacavara na Lawa na kena inaki, oya me ‘qasenivuli qai tuberi keda vei Karisito.’—Kala. 3:24.
2 E sega ni kena ibalebale qori nida sega ni kauaitaka na vakacaboisoro na lotu vaKarisito. E vakaraitaka ga na yapositolo o Pita na bibi ni noda ‘cabora na isoro vakayalo e vakadonuya na Kalou ena vuku i Jisu Karisito.’ (1 Pita 2:5) Kuria qori, e vakamatatataka sara ga na yapositolo o Paula ni ka eda cakava e veisiga na lotu vaKarisito yalayala e vaka tiko na “isoro.”—Roma 12:1.
3 Nida cabora na noda isoro vei Jiova, e kena ibalebale nida na solia vua eso na ka se eda na vakauai keda meda qaravi koya kina vakavinaka. Mai na ka eda kila me baleta na isoro era dau cabora na Isireli, eda na vakadeitaka vakacava ni na ciqoma o Jiova na noda isoro nikua?
NA KA EDA CAKAVA E VEISIGA
4. Na cava meda nanuma tiko ena ka eda dau cakava e veisiga?
4 Ena rairai dredre meda siqema ni wili tale ga me isoro eda cabora vei Jiova eso na ka eda dau cakava e veisiga. De dua o na nanuma ni sega ni bibi ena nomu bula vakayalo na cakacaka ni vale, vuli, cakacaka saumi, volivoli kei na so tale. Ia ke o sa yalataki iko vei Jiova se o lalawataka tiko mo na cakava qori ena dua na gauna, mo nanuma tiko ni ka o dau cakava e veisiga e rui bibi ena nomu veiwekani kei Jiova. Eda lotu vaKarisito ena 24 na aua ena dua na siga, e bibi gona meda muria tiko ga na ivakavuvuli vakaivolatabu. Sa rauta me uqeti keda kina o Paula: “Se mani cava oni cakava, ni cakava mai vu ni lomamuni me vaka oni cakava tiko vei Jiova, sega vua na tamata.”—Wilika Kolosa 3:18-24.
5, 6. Na cava me lewa na noda itovo kei na noda isulusulu?
5 Eso na ka eda dau cakava e veisiga e sega ni okati ena noda veiqaravi tabu. Ia na nona uqeti keda o Paula meda ‘veiqaravi mai vu ni lomada vei Jiova,’ e vakaraitaka ni bibi meda qarauna na noda itovo e veigauna. Eda na vakaraitaka vakacava qori ena noda bula? Vakacava eda dau vakaraitaka ena veigauna kece nida lotu vaKarisito ena noda itovo kei na noda isulusulu? Se vakacava na ka eda dau cakava e veisiga, eda dau maduataka nida iVakadinadina i Jiova ena noda ivalavala se na noda isulusulu? Eda na sega ni via cakava qori! Era na sega ni vinakata na dauveiqaravi i Jiova mera cakava na ka ena vakarogorogocataki kina na yaca ni Kalou.—Aisea 43:10; 2 Kor. 6:3, 4, 9.
6 Meda veivosakitaka mada na sala e tara kina noda bula kece noda via ‘qaravi Jiova mai vu ni lomada.’ Nida veivosakitaka tiko qori, meda nanuma tiko nira dau cabora vei Jiova na Isireli na ka vinaka duadua era taukena.—Lako 23:19.
LAURAI ENA NOMU BULA KECE
7. Na cava e okati ena noda yalayala vua na Kalou?
7 Na gauna o yalataki iko kina vei Jiova, e macala ga ni o sega ni lomalomaruataka na vakatulewa qori, se vakaevei? E vaka mo tukuna tiko ni ka kece o na cakava ena nomu bula, ena liu duadua tiko ga o Jiova. (Wilika Iperiu 10:7.) Dua dina na vakatulewa vinaka qori. Sega ni vakabekataki ni o vakila na yaga ni nomu vulica na rai i Jiova me baleta e dua na ituvaki, o qai cakava na ka e salavata kei na lomana. (Aisea 48:17, 18) Era savasava qai mamarau na tamata ni Kalou nira vakatotomuri i Jiova, ni o koya ga e vakavulici ira.—Vunau 11:44; 1 Tim. 1:11.
8. Na cava e bibi kina meda nanuma tiko ni isoro era cabora na Isireli e ka tabu vei Jiova?
8 Na isoro era cabora na Isireli e ka tabu vei Jiova. (Vunau 6:25; 7:1) Na vosa vakaIperiu e vakadewataki me “ka tabu,” e tiko kina na vakasama ni wasei tani, e savasava, se vakatabakidua vua na Kalou. Me vakadonuya o Jiova na noda isoro, e bibi me kua ni tauva na duka ni vuravura. Eda na sega ni rawa ni lomana na ka e cata o Jiova. (Wilika 1 Joni 2:15-17.) Kena ibalebale qori nida na sega ni vakailala se cakava na ka meda dukadukali kina vei Jiova. (Aisea 2:4; Vkta. 18:4) Eda na sega tale ga ni raica tiko na ka tawasavasava se meda vakasamataka tiko eso na ka va qori.—Kolo. 3:5, 6.
9. Na cava e bibi kina meda caka vinaka vei ira na so tale?
9 E uqeti ira na tacina vakayalo o Paula: “Moni kua tale ga ni guilecava na caka vinaka kei na nomuni wasea vei ira tale na so na ka e tu vei kemuni, ni taleitaka na Kalou na isoro va qori.” (Iper. 13:16) Ke da caka vinaka qai vukei ira eso tale, e raica qori o Jiova me isoro talei. Na noda kauaitaki ira na so tale e ivakatakilakila ni lotu vaKarisito dina.—Joni 13:34, 35; Kolo. 1:10.
NODA ISORO ENA SOKALOU
10, 11. E raica vakacava o Jiova na noda cakacaka vakaitalatala kei na noda sokalou, e uqeti keda vakacava qori?
10 Dua na sala eda rawa ni caka vinaka kina vei ira eso tale, oya na noda “tukuna yani na noda inuinui.” Vakacava o dau vunau ena veigauna kece? E vakatoka o Paula na noda veiqaravi qori me ‘isoro ni veivakacaucautaki, ya na vua ni tebenigusuda nida tukuna raraba na yaca ni Kalou.’ (Iper. 10:23; 13:15; Osea 14:2) E vinaka tale ga meda vakasamataka na levu ni gauna eda vakayagataka ena vunautaki ni itukutuku vinaka, kei na sala eda rawa ni vakavinakataka kina na noda vunau. Levu na itavi ena Soqoni ni Cakacaka ena vukei keda meda cakava qori. Ia meda nanuma tiko ni noda cakacaka vakavunau kei na vunau tawalokuci e “isoro ni veivakacaucautaki,” e okati ena noda sokalou, e bibi gona me vinaka duadua na isoro qo. Macala ga ni na duidui na keda ituvaki, ia na gauna eda vakayagataka ena vakatetei ni itukutuku vinaka, ena laurai kina se da raica vakacava noda bula vakayalo.
11 E levu na gauna eda dau sokalou vakaivavakoso se da sokalou yadudua ga. Qori sara ga na ka e vinakata o Jiova meda cakava. E macala ga ni sega ni gadrevi meda muria na lawa ni Siga ni Vakacecegu se meda gole wasoma ena soqo e dau caka e Jerusalemi. E se rawa ga nida vulica kina e levu na ka. E tiko na itavi eda qarava e veisiga, ia e se vinakata o Jiova me tiko na gauna meda vulica kina na nona Vosa, masu, tiko ena soqoni. O ira tale ga na ulunivuvale mera liutaka na sokalou vakavuvale. (1 Ces. 5:17; Iper. 10:24, 25) E vinaka gona meda taroga: ‘Vakacava au rawa ni vakavinakataka na noqu sokalou?’
12. (a) Na cava e rawa ni vakatauvatani nikua kei na ka boivinaka e dau vakamai ena gauna ni sokalou ena gauna makawa? (b) E rawa vakacava ni okati noda masu me ka boivinaka?
12 E seretaka vei Jiova o Tui Tevita: “Me tikotiko ga e matamuni na noqu masu me vaka nai madrali boi vinaka.” (Same 141:2) Vakasamataka mada na levu ni gauna eda dau masu kina kei na ka eda dau masulaka. Na ivola na iVakatakila e vakatauvatana na “nodra masu na yalosavasava” ina ka boivinaka e dau vakamai. O koya gona, na nona rogoca o Jiova na masu e vakadonuya e vaka ga na ka boivinaka. (Vkta. 5:8) Ena nodra gauna na Isireli, e dau vakarautaki sara vakavinaka na ka boivinaka e dau vakamai ena icabocabonisoro i Jiova. Ena vakadonuya ga o Jiova na isoro qori ke cabori ena sala e vinakata o koya. (Lako 30:34-37; Vunau 10:1, 2) Ke da cakava tale ga qori ena noda masu, eda nuidei ni na rogoca dina o Jiova.
EDA CIQOMA, EDA SOLIA TALE GA
13, 14. (a) Na cava a cakava o Epafirotaito kei ira na lewe ni ivavakoso e Filipai, e raica vakacava qori o Paula? (b) Eda na vakatotomuria vakacava na ivakaraitaki i Epafirotaito kei ira na lewe ni ivavakoso e Filipai?
13 Na ilavo eda cautaka me tokoni kina na cakacaka ni vuravura raraba e vaka tiko na isoro, ke levu mada ga na ka eda solia se sega. (Mari. 12:41-44) Ena imatai ni senitiuri S.K., era talai Epafirotaito i Roma na lewe ni ivavakoso e Filipai me lai raica na ka e gadreva vakayago o Paula. Era solia vua e dua na uma ilavo me nodra iloloma vei Paula. Qori e sega ni imatai ni gauna mera vakaraitaka kina vei Paula na nodra yalololoma. Era cakava qori na mataveitacini me kua kina ni leqataka o Paula na ka e gadreva vakayago, era vinakata ga me vakayagataka e levu na nona gauna ena cakacaka vakaitalatala. E raica vakacava o Paula na iloloma qori? E vakatoka o koya me ka “boivinaka, e isoro e vakadonui, e taleitaka na Kalou.” (Wilika Filipai 4:15-19.) E vakavinavinakataka dina o Paula na nodra yalololoma na mataveitacini e Filipai, e marautaka tale ga qori o Jiova.
14 E marautaka tale ga nikua o Jiova na ka eda cautaka ena cakacaka e vuravura raraba. Ke da vakaliuca tale ga na Matanitu ni Kalou, e yalataka o koya ni na vakarautaka na ka eda gadreva vakayago, vakayalo tale ga.—Maciu 6:33; Luke 6:38.
VAKAVINAVINAKA VEI JIOVA
15. Na cava eso na ka mo vakavinavinakataki Jiova kina?
15 E sega ni wili rawa na levu ni ka vinaka meda vakavinavinakataki Jiova kina. E dodonu ga meda vakavinavinakataki koya e veisiga ni solia vei keda na bula, se vakacava? E vakarautaka na ka kece meda bula kina—kakana, isulu, vale kei na cagi eda ceguva. Me vaka ni yavutaki tale ga ena kilaka dodonu na noda vakabauta, ena solia vei keda na inuinui. E veiganiti gona meda qaravi Jiova da qai cabora vua noda isoro e vakalagilagi kina. Eda cakava qori ena vuku ni ka e cakava vei keda kei na ka e kilai duadua ga kina.—Wilika Vakatakila 4:11.
16. Eda na vakavinavinakataka vakacava na isoro ni veivoli i Karisito?
16 Ena ulutaga sa oti, eda raica kina ni isoro ni veivoli i Karisito e nona iloloma vakasakiti na Kalou. Qori e vakaraitaka na levu ni nona lomani keda. (1 Joni 4:10) Eda na vakavinavinakataka vakacava na iloloma qori? E tukuna o Paula: “Ni uqeti keitou na loloma i Karisito, e va kina qo na neitou lewa, e mate e le dua ena vukuda kece; . . . e mate ena vukuda kece mera kua kina ni bula ena vukudra ga o ira era bula tiko, mera bula ga ena vuku i koya e mate ena vukudra, qai vakaturi.” (2 Kor. 5:14, 15) E tukuna tiko e keri o Paula ke da vakavinavinakataka na loloma ni Kalou, eda na vakayagataka noda bula meda vakacaucautaki Jiova kina kei na Luvena. Eda na vakaraitaka noda vakavinavinaka kei na noda lomani koya na Kalou kei Karisito, ena noda talairawarawa, qai vu mai lomada noda cakacaka vakavunau kei na veivakatisaipelitaki.—1 Tim. 2:3, 4; 1 Joni 5:3.
17, 18. Ena sala cava era vakalevutaka kina e levu nodra isoro ni vakavinavinaka vei Jiova? Tukuna e dua na kena ivakaraitaki.
17 Vakacava e rawa nida vakalevutaka na noda isoro ni vakavinavinaka vua na Kalou? Nira vakasamataka e levu na ka vinaka kece e cakava ena vukudra o Jiova, e uqeti ira sara ga mera veisautaka nodra ituvatuva me levu na gauna mera vunau kina se mera vakaitavi ena so tale na cakacaka vakalou. Eso era painia veivuke ena dua se vica vata na vula ena dua na yabaki, eso tale era painia tudei sara. Eso tale era veivuke ena tarataravaki. Qori eso na sala vinaka duadua meda vakaraitaka kina noda vakavinavinaka, se vakaevei? Ke vinaka na inaki ni noda cakava qori, ena vakadonuya dina o Jiova na noda veiqaravi tabu.
18 E levu na lotu vaKarisito era vakaraitaka sara ga na nodra vakavinavinaka vei Jiova. Dua vei ira o Morena. E susu ena lotu Katolika, ia e levu na ka e lomatarotarotaka me baleta na Kalou kei na inaki ni bula. E vaqara qai sega ni kunea na kena isau ena lotu qori kei na so tale na ivakavuvuli vakaEsia. Sa qai kunea rawa ni sa vulica na iVolatabu kei ira na iVakadinadina i Jiova. E vakavinavinakataki Jiova qai marau dina ni sauma na nona taro ena iVolatabu. Qai vakaraitaka na nona vakavinavinaka ena nona vakayagataka na nona kaukaua kece me qaravi Jiova kina. Tekivu painia veivuke ni oti ga nona papitaiso, mani yaco me painia tudei ena gauna sa vakadeitaka kina ni na rawata qori. Sa oti qo e 30 na yabaki nona veiqaravi voli vakatabakidua.
19. O na vakalevutaka vakacava na nomu isoro vei Jiova?
19 E macala ga ni levu era qaravi Jiova voli ena yalodina era na sega ni painia ena vuku ni kedra ituvaki. Ia se mani vakacava na levu ni ka eda cakava vei Jiova, eda se rawa ga ni cabora vua na isoro e vakadonuya. Me baleta na noda itovo, e bibi meda bulataka tiko ga na ivakavuvuli vakaivolatabu, meda nanuma tale ga nida matataki Jiova tiko e veigauna kece. Ena noda vakabauta, eda nuitaki Jiova vakaoti ni na vakayacora dina na nona inaki. Nida caka vinaka, eda sa vakaitavi tiko ena vakatetei ni itukutuku vinaka. Meda vakavinavinakataka mada ga na veika kece e cakava vei keda o Jiova, da qai cabora tiko ga mai vu ni lomada na noda isoro.
[Tikina bibi ena tabana e 25]
Ni o vakasamataka na yalololoma i Jiova, vakacava e uqeti iko qori mo vakalevutaka na nomu isoro ni vakavinavinaka?
[iYaloyalo ena tabana e 23]
Vakacava o dau vunau ena veigauna kece?