Meda Maqosa Tiko ga ena Cakacaka Vakaitalatala—Volai Ira na Tataleitaki

“Qarauni iko vinaka tiko ga kei na nomu veivakavulici.” (1 Tim. 4:16) Na nona ivakasala uqeti vakalou qori na yapositolo o Paula vei Timoci e dusia se da mani vou se dede ena dina, e bibi meda toso tiko ga. Me rawa nida cakava qori, e sa na tabaki tiko mai ena Noda Cakacaka Vakaitalatala e dua na ulutaga vou e vakatokai “Meda Maqosa Tiko ga ena Cakacaka Vakaitalatala.” Ena vakamacalataki tiko ena ulutaga yadua e dua na vakatutu, ena vakamacalataki tale ga eso na ka me caka me rawa nida muria kina na vakatutu qori. Eda uqeti kece meda raica vakabibi na vakatutu qori ena veivula. Ni cava e dua na vula, ena dua tiko na itavi ena Soqoni ni Cakacaka meda vakamacalataka kina na yaga ni noda muria na vakatutu qori. Eda uqeti ena vula qo meda vakamatauni keda ena nodra volatukutukutaki na tataleitaki.

Vuna e Bibi Kina: Me rawa nida vakayacora noda ilesilesi, e vinakati meda kua ni vunau wale ga. E bibi meda lesuvi ira na tataleitaki da qai vakavulici ira, vakasuasuataka na itei ni ka dina eda sa tea. (Maciu 28:19, 20; 1 Kor. 3:6-9) Qori e vinakati kina na noda qarai koya tale e tataleitaki, veitalanoataka na ka e kauai kina, qai tomani na ka drau a veivosakitaka ena veisiko e liu. Nida kunea gona e dua na tataleitaki, e bibi meda volatukutukutaka sara.

Kena iWalewale:

Mo vakadeitaka ni tiko ena nomu beki na iyaragi mo na volatukutukutaki ira kina na tataleitaki. Me savasava na vanua o volavola kina, me volai vakamatau, qai vakavoutaka tiko ga na itukutuku era volai kina. Ni oti ga nomu veisikovi lesu, volatukutukutaka sara.
Vakavola na itukutuku me baleti koya na itaukeinivale. Me volai na yacana, na sala eda rawa ni veitaratara kina kei koya, me vaka na vanua e vakaitikotiko kina, nona naba ni talevoni, se nona e-mail. Na cava o raica rawa me baleti koya kei na nona vuvale ena rawa ni yaga vei iko.
Vakavola na itukutuku kece ni ka drau veitalanoataka. Na tikinivolatabu cava o wilika? Na cava a tukuna me baleta na nona vakabauta? Na ivola cava o solia vua? Vola na gauna, na macawa kei na tikinisiga o na sikovi koya kina.
Vola na ka o lalawataka mo cakava tarava. Na cava o yalataka vua ni drau na veivosakitaka? Na siga cava o tukuna vua ni o na lesuvi koya kina?
Ena veigauna kece o veisikovi lesu kina, vola na ka vou kece o raica. E sega ni dua na kena leqa ke o vakavola eso tale na ka o raica ni na bibi vei iko.

Tovolea Qori ena Loma ni Vula Qo:

Ni o volatukutukutaka tiko e dua na tataleitaki, tukuna vei koya e tomani iko na ka o vakavola tiko.