Kato ni Taro

◼ O cei me masu ena soqoni ni ivavakoso?

E tiki bibi ni noda sokalou na noda masu vakaivavakoso. E ka dokai qai itavi bibi dina me lesi e dua me masu ena vukudra na ivavakoso. Ni sa rui bibi na itavi oqo, mera lewa vinaka na qase se tacidra cava e ganita mera lesi mera masu ena soqoni. Na tacida tagane papitaiso era matataka na ivavakoso e dodonu mera italatala lotu Vakarisito matua, era kilai nira ivakaraitaki vinaka ra qai dokai mai vei ira na lewe ni ivavakoso. Nodra qaqanimasu bibi e tau ena veidokai ena vakavotuya ni vinaka tu na nodra veiwekani kei na Kalou o Jiova. Na ulutaga ena Vale ni Vakatawa, 15 Me, 1986, “Praying Before Others With a Humble Heart” (Na Masu e Matanalevu Ena Yalomalumalumu) e tiko kina e so na idusidusi yaga mera nanuma tiko o ira na lesi mera matataka na ivavakoso ena masu.

Ke dua na tacida e lomatarotarotaki tu na nona ivalavala se dau taura tu ga vakamamada na ka, de vinaka mera kua ni lesi koya na qase me masu. Ke dua na tacida e nona ivalavala na vosakudrukudru se kilai ni dau vakayagataka na masu me ceuta cake mai kina na nona veilecalecavi kei na dua tale, me kua ni digitaki. (1 Tim. 2:8) Ke sa mani papitaiso e dua na tacida gonetagane, e se bibi ga mera lewa vinaka na qase se sa matua vakayalo me ganiti koya me masulaka na ivavakoso se sega.​—Caka. 16:1, 2.

So na gauna ena soqoni ni cakacaka vakavunau, de na vinakati me masu e dua na tacida yalewa ni sega ni tiko na tacida tagane e ganiti koya me matataka na ilawalawa oya. Me ubia na uluna na tacida yalewa. Ke sa macala toka ni na sega ni tiko rawa ena so na soqoni ni cakacaka vakavunau e dua na tacida tagane e ganiti koya me liutaka, sa rawa ni ratou lesia e kea na qase e dua na tacida yalewa e ganiti koya.

Sa dau kena ivalavala ga me dolava na Vunau Soqovi Levu ena masu na kena jeameni. Ia ena so tale na soqoni ni ivavakoso, ke ra le levu toka na tacida tagane e ganiti ira mera masu, sa rawa ni lesi e dua me dolava na soqoni ena masu, e dua tale me sogota. Sega ni tukuni me sa biu tu ga na masu vei koya e taura na imatai ni itavi se vei koya e taura na iotioti ni itavi. Ena vinaka me tukuni rawa e liu vua na tacida ena masu ni sa lesi me masu, me rawa ni vakasamataka mai kina na veika ena masulaka. Sa na qai rawa vua me cabora mai vu ni lomana na masu e momona e ganita vinaka na soqoni oya.

Me kua ni balavu sara na masu vaka oqo. Ke sa lesi me masu ena soqoni e dua na tacida, ena kilai vinaka na ka e cavuta kevaka e tucake, vosa toka e cake me rogoci na ka e kaya, qai cavuta vinaka na nona vosa me matata. Kevaka e caka oqo, era na rogoca kece na lewe ni soqoni na ka e masulaki, ni sa tini na masu, sa na rawa nira ‘vakaemeni’ kece mai vu ni yalodra!​—1 Vei. 16:36; 1 Kor. 14:16.