Na ka Dina me Baleta na Veigauna se Bera Mai
O bau vakasamataka tu na veika ena yaco ena gauna se bera mai? E kaya na iVolatabu ni sa vakarau yaco na veika vakasakiti eda na marautaka kece na lewe i vuravura.
E vakamacalataka o Jisu na sala eda na kila kina ni “sa voleka na Matanitu ni Kalou.” (Luke 21:31) Levu na ka e parofisaitaka sa yaco tu nikua, me vaka na veivaluvaluti, uneune, leqa ni kakana, kei na matedewa.—Luke 21:10-17.
E parofisaitaka tale ga na iVolatabu ni na ca sara na ivakarau ni veiliutaki ena “iotioti ni veisiga.” Vakadinadinataki qori ena 2 Timoci 3:1-5, qai laurai na itovo kei na ivalavala e vakamacalataki kina na dina ni parofisai vakaivolatabu me baleta na ka sa yaco tiko nikua.
Io, qori e dusia ni sa voleka ni veisautaka na Matanitu ni Kalou na vuravura me vinaka cake sara. (Luke 21:36) E yalataka tu na Kalou ena iVolatabu na veika vinaka ena vakarautaki ena vuravura qori, kei na marau era na vakila o ira na bula kina. Dikeva mada eso na kena ivakaraitaki.
VEILIUTAKI VINAKA
“E soli vua [Jisu] na lewa, na lagilagi, kei na matanitu mera qaravi koya kece na lewe ni veivanua, na veimatatamata, kei na duivosavosa. Na nona lewa na lewa e sega ni mudu, ena sega ni oti, kei na nona matanitu ena sega ni vakarusai.”—TANIELA 7:14.
Kena ibalebale: O na rawa ni marautaka na bula ena veiliutaki ni matanitu cecere e tauyavutaka na Kalou, ena Tui kina o Luvena.
BULABULA VINAKA
“Ena sega ni kaya e dua na lewenivanua: ‘Au tauvimate.’”—AISEA 33:24.
Kena ibalebale: O na sega ni tauvimate se malumalumu, o na sega vakadua tale ga ni mate.
VAKACEGU DINA
“Ena mai vakaotia o koya na ivalu e vuravura taucoko.”—SAME 46:9.
Kena ibalebale: Ena sega tale ni yaco na ivalu kei na rarawa e salavata mai.
ERA NA TAWANA NA VURAVURA NA TALAIRAWARAWA
“Sa na sega vakadua na daucaka ca . . . era na taukena na vuravura na yalomalumalumu.”—SAME 37:10, 11.
Kena ibalebale: Sa na sega na tamata ca, era bula ga o ira na talairawarawa vua na Kalou.
ENA PARATAISI TAUCOKO NA VURAVURA
“Era na tara vale era na tiko kina, era na tea na loganivaini era na kania na vuana.”—AISEA 65:21, 22.
Kena ibalebale: Sa na totoka vakaoti na vuravura. Sa na qai sauma na Kalou na noda masu, oya me vakayacori e “vuravura” na nona inaki.—Maciu 6:10