Dau Vakarorogo Vinaka
1 E gadrevi meda vakavulici keda meda dau vakarorogo vinaka. Me vu tale ga mai ena loma i koya e vakarorogo na via vuli, me yaga kina vua na ka e rogoca. O koya gona, e vakabibitaka o Jisu ‘ni qarauni kemuni ena itovo ni nomuni vakarorogo.’—Luke 8:18, VV.
2 E vakabibitaki oqo ena noda dau tiko ena soqoni vakaivavakoso, soqo ni tabacakacaka, kei na soqo ni tikina. Meda dau vakarorogo matua ena soqoni kece oqo. (Iper. 2:1) Oqo e so na tikina ena vukei iko mo dua kina na dau vakarorogo vinaka ena gauna kece ni soqoni vakarisito.
◼ Mo kila ni yaga na soqoni kece. E sala levu duadua ni nona “veivakavulici o Jiova” ena nona vakayagataki koya “na dauniyau yalo dina ka vuku.”—Aisea 54:13, NW; Luke 12:42, VV.
◼ Vakavakarau vakailiu. Vulica rawa mai na ulutaga ena mai veivosakitaki, nanuma tale ga mo kauta tiko mai na nomu iVolatabu kei na ivola ena vulici.
◼ Ni vakacagau tiko na soqoni, saga sara mo vakarorogo vinaka. Kua ni veivosaki kei ira era dabe tikivi iko, se vakaraica na ka era cakava e so tale na vakarorogo. Saga me kua ni ciri tani nomu vakasama ni o vakananuma na ka mo na cakava ni oti na soqoni se so tale na nomu oga.
◼ Vakasamataka vinaka na ka e vunautaki mai. Tarogi iko: ‘Ena yaga vakacava vei au? Meu vakayagataka ena gauna cava?’
◼ Toqa vakaleleka na veitikina bibi kei na tikinivolatabu. Oqo ena vukei iko me coba dei nomu vakasama ena ka e veivosakitaki tiko, qai yaga vakalevu ena nomu nanuma na veitikina bibi mo na qai vakayagataka ena so tale na gauna.
3 Vakavulici Ira na Luvemu Mera Dau Vakarorogo: Era gadreva na gone na veidusimaki vakayalo. (Vkru. 31:12) Ena gauna makawa o “ira kecega era sa yalomatua me ra kila rawa” mera vakarorogo matua ni wiliki vei ira na Lawa. (Niem. 8:1-3) Ke ra vakaitavi na itubutubu ena soqoni ra qai dau vakarorogo matua, era na muria tale ga na luvedra. E sega ni dodonu me kau na iyaya ni vakatatalo se ivola ni droini mera lai vakawelei tiko kina na gone. Na lako wasoma i valelailai e vakacacana na nodra vakarorogo. Ni “ka lialia sa vauci e lomana na gone,” mera qarauna matua na itubutubu mera dabe vakadua na luvedra ra qai vakarorogo ena soqoni.—Vkai. 22:15.
4 Nida dau vakarorogo vinaka, eda vakaraitaka nida vuku da qai vinakata meda “rogoca e levu na ivakasala.”—Vkai. 1:5.