Ra iTubutubu—Vakavulici Ira na Luvemuni ena iVakarau e Yaga
1 E sega nida sucukaya mai na ivakarau e yaga, se meda rawata vakacakamana. Na vakavulici ni ivakarau e vinaka vei ira na gone, e taura na gauna. Na “vakavulica” e kena ibalebale mo “tukuna vakamalua” se “vakaturuma vakalalai.” E gadrevi vei ira na itubutubu me dua tu ga na ivakarau ni nodra “vakavulici ira [na luvedra] e na vunau kei nai vakavuvuli ni Turaga.”—Efeso 6:4.
2 Tekivu Nira se Gonedramidrami: E veivakadrukai dina na nodra rawa ni vulica na veika vovou na gonelalai, ra qai cakava. E dina ni dau dredre vei ira na qase mera vulica e dua na vosa vou, ia o ira na gone murivuli sa rawa nira vulica e rua se tolu na vosa ena dua ga na gauna. Kua vakadua ni nanuma nira se gone na luvemu mera vulica na ivakarau e vinaka. Ke tekivu taudonu na vakavulici ni ka dina vakaivolatabu qai tomani tiko ga, ni qai yabaki vica toka ga na gone oya sa na sinai na nona vakasama ena kilaka me na ‘vakavukui koya me bula’ kina.—2 Tim. 3:15.
3 Vakamatauna na Cakacaka Vakavunau: E dua na ivakarau e yaga me vakavulici ena gauna ni gone, oya na vakaitavi wasoma ena vunautaki ni itukutuku vinaka ni Matanitu ni Kalou. E levu na itubutubu era tekivu kauti ira na luvedra ena cakacaka vakaitalatala nira se gonedramidrami. Na wasoma ni nodra dau vunau na itubutubu e vukei ira na luvedra mera taleitaka, ra yalogutaka tale ga na cakacaka vakaitalatala. O ira na itubutubu mera vakavulica vei luvedra na sala mera vakaitavi kina ena veibasoga kece ni cakacaka vakavunau.
4 E vukei ira tale ga na gone na nodra curu ena Koronivuli ni Vuli iTalatala Liutaki Vakalou. E vakavulici ira na koronivuli oqo ena ivakarau ni vuli e vinaka, kei na ivalavala ni wilivola me kasa kina vei ira na ka era wilika. Era vulica tale ga mera veivosakitaka na iVolatabu, mera veisikovi lesu, ra qai caka vuli iVolatabu. Na veivakavulici vaka oqo e rawa ni uqeti ira mera painia ra qai tadolova e so tale na isausau vakayalo. Era nanuma lesu e levu na lewenivuvale e Peceli kei ira na daukaulotu na nodra se qai tekivu vakaitavi ena Koronivuli ni Vuli iTalatala Liutaki Vakalou, era kaya ni oqo e dua na isolisoli e vukei ira mera bucina kina na ivakarau e yaga.
5 O keda kece eda vaka na qele ena liga i koya na Dautulituli Levu, o Jiova. (Aisea 64:8) Ni se qai keli mai na qele, e rawarawa na kena waki me buli kina e dua na ka. Ia ni dede na kena mamaca, sa na kaukaua. E vaka tale ga kina na tamata. Nira se gone, se rawarawa na nodra moici—na nodra moici taudonu ga na kena vinaka. Na nodra yabaki ni gone e gauna mera se tei moici kina, ni sala era moici kina ena vakatau kina na nodra na vinaka se ca ena gauna mai muri. Ni o itubutubu dau kauai, tekivu totolo ena nomu vakavulica vei ira na luvemu na ivakarau e yaga ena cakacaka vakaitalatala vakarisito.