‘Solia Vakatabakidua Nomu Gauna’ ena Cakacaka Vakaitalatala

¹ Ni se dau cula valelaca mai Korinica na yapositolo o Paula, eda na rairai kaya ni cakacaka oqo e yalana nona gauna ni vunau. Ia, e kaya na Cakacaka 18:5 (VV): “Sa qai solia vakatabakidua na nona gauna ko Paula me vunau kina, ka tusanaka tiko vei ira na Jiu ni sa Karisito dina ga ko Jisu.” (Neitou na matanivola kala.) Na cava e rui ogaoga kina o Paula ena cakacaka vakavunau? E dina ni levu vei ira mai Korinica era sa mai vakabauta, sa vakadeitaka oti tu na Turaga ni na levu tale era na mai tisaipeli ena korolevu oya. (Caka. 18:8-11) Oya tale beka ga na vuna meda solia vakatabakidua kina na noda gauna ena cakacaka vakaitalatala? Io. Rawa ni kune e levu tale mera vakavulici ena ka dina.

² Me Levu Nomu Gauna ni Vunau ena Epereli: Sa rairai nomu isausau tiko mo vakalevutaka nomu vunautaka na itukutuku vinaka e veivula. Ia e dau rawarawa sara ena so na vula meda ‘solia vakatabakidua na noda gauna’ ena cakacaka oqo. Dua vei ira na vula o Epereli, e vula tiko ni iVakananumi. Ena ganiti iko beka mo painia veivuke kina se mo vakalevutaka na nomu cakacaka vakaitalatala ena vula oqo? Era vakalougatataki vakalevu o ira na dautukutuku era sa dau cakava tiko. (2 Kor. 9:6) Ke o sa cakava tiko na ka o rawata, nanuma tiko ni o Jiova e marautaka na nomu veiqaravi mai vu ni lomamu. (Luke 21:2-4) Se ituvaki cava ga o sotava, saga me nomu isausau mo ‘solia vakatabakidua nomu gauna’ ena cakacaka vakaitalatala ena Epereli. Kua ni guilecava ni solia nomu ivolatukutuku ni cakacaka ni cava na vula me rawa ni wili tale ga na nomu sasaga kei ira na vo ni tamata i Jiova.

³ Sikovi Ira na Ka Vou Era a Tiko ena iVakananumi: E Viti ena yabaki sa oti, era a tiko rawa ena iVakananumi e le 7,408. Se bera tiko ni kilai na iwiliwili ena yabaki oqo. Macala e ke ni se levu tu na cakacaka ni “tatamusuki.” (Maciu 9:37, 38, VV) O koya gona, tuvanaka mo sikovi ira totolo na tataleitaki era a tiko ena iVakananumi mo lai vukei ira vakayalo. Nida lokuyarataka na noda sikovi ira, ena rawa kina vua ‘na vunica me kovea na vosa ni Matanitu ni Kalou sa kaburaki i lomadra.’ (Maciu 13:19) Na veisiko ena gauna totolo e vakaraitaka ni o ‘solia vakatabakidua nomu gauna’ ena cakacaka vakaitalatala.

⁴ Tomana Tiko ga Nomu Vukei Ira na Mate Vakayalo: A tekivu ena Feperueri e dua na sasaga ni nodra vukei na mate vakayalo. Ke tiko e so era se bera ni sikovi ira na qase ena nodra cakacaka ni veivakatawani, mera qai tuvanaka na qase na gauna mera sikovi ira kina oqo ni bera ni cava na Epereli. Era na saga na qase mera kila na vu ni nona leqa vakayalo e dua, ra qai tovolea na sala vinaka duadua me vukei kina me qaravi Jiova tale. Na veivuke vakayalololoma oqo e vakaraitaka nira kauaitaka vakabibi na qase na nodra itavi nira vakatawana “na qele-ni-sipi ni Kalou.” (1 Pita 5:2; Caka. 20:28) E vakaturi tiko ena ilavelave ni The Watchtower, 15 Sepiteba, 1993, taqana 22-3, e so na iwalewale vinaka era rawa ni vakayagataka na qase nira vakamacalataka tiko e dua vei ira na lima na leqa e laurai ni dau yacovi ira vakalevu na mate tu vakayalo. E rawa nira vukei e so mera tekivu cakacaka tale vakavunau ena Epereli.

⁵ Vukea e So Tale Mera Dautukutuku Bera ni Papitaiso: Sa ganiti ira beka na luvemuni mera dautukutuku vou ni itukutuku vinaka? Vakacava o ira o vakavulici ira tiko ena iVolatabu? Ke sa vakadonui ira na qase, e vula veiganiti sara ga mera tekivu dautukutuku kina na Epereli, se vakaevei? Ke sa laurai na nona toso, sa vulica oti tale ga na brochure na Loma ni Kalou kei na ivola na Kila, e rawa ni tomani na vuli iVolatabu ena ikarua ni ivola, E Rawa Mo Bula Tawamudu Ena Parataisi e Vuravura. Me nomu isausau mo vukei nomu gonevuli me vakadeitaka e lomana na ka dina, me rawa kina ni dautukutuku bera ni papitaiso, me yacova ni sa yalataka na nona bula qai papitaiso me iVakadinadina i Jiova.​—Efeso 3:17-19; 1 Tim. 1:12; 1 Pita 3:21.

⁶ Ni o kauaitaki ira dina vakawasoma nomu vuli iVolatabu, ena rairai vukei ira mera vakadeitaka e lomadra na ka dina. Dua na iVakadinadina a sotava e dua na veiwatini qase qai lomadrau sara ga na veiwatini oqo me rau vulica na iVolatabu. Rau mani vakadaroya tale na vuli ena tolu na macawa veitaravi. Lakolako ga sa qai tekivu rawa na vuli. Ni sa tekivu rawa, rau dau vakadaroya tale tiko ena veimacawa rua. Ia e muri, sa qai toso vinaka o yalewa, tini papitaiso sara. “Ni papitaiso oti,” e kaya na tacida tagane oqo, “e tonawanawa na matana ena nona marau, e tonawanawa tale ga na mata i keirau vakaveiwatini ena neirau marau.” Io, eda marau nida ‘solia vakatabakidua noda gauna’ ena itukutuku vinaka!

⁷ Na parofisai vakaivolatabu kei na veika e yaco tu e vuravura e vakaraitaka nida sa bula sara tu ga ena gauna ni ivakataotioti. Oqo na gauna meda ‘solia vakatabakidua kina noda gauna’ na tamata ni Kalou ena kena vakatakilai na itukutuku vinaka vei ira tale na so. E vakadeitaka na yapositolo o Paula ni “sega ni ka walega na nomudou cakacaka e na vuku ni Turaga.”​—1 Kor. 15:58