“Caka Vinaka Vei Ira na Tamata Kecega”

¹ “Vunautaka Sara me Macala na Vosa ni Kalou” kei na “Vutuniyau e na Cakacaka Vinaka” erau iulutaga ena itoma ni Noda Cakacaka Vakaitalatala ni Matanitu ena vula o Feperueri kei na Maji 2002. (Kolo. 1:25, VV; 1 Tim. 6:18, VV) Eda uqeti ena rua na iulutaga oqo meda gumatua sara ni vukei ira na tataleitaki mera tiko ena iVakananumi, o ira na sa mate tu vakayalo mera vakaitavi tale ena ivavakoso, o ira na noda lalai kei ira na vuli iVolatabu mera tekivu kacivaka na itukutuku vinaka. E sega ni vakatitiqataki nida sa marautaka na yaga ni noda gugumatua. Oqo gona, “ni sa rawa, me da caka vinaka [tiko ga] vei ira na tamata kecega.”​—Kala. 6:10.

² Sureti Ira Tale: Ena veiyabaki era tiko ena iVakananumi e Viti e vica vata na udolu era sega ni dautukutuku. Na nodra mai tiko ena soqo oqo e vakaraitaka nira taleitaka, na cava gona e rawa nida cakava mera uqeti kina o ira ‘sa vakarautaki tu ki na bula tawamudu mera vakabauta’? (Caka. 13:48, VV) Vakauqeti ira mera lesu totolo mai ena soqoni vakaivavakoso.

³ Vakacava mo sureta e dua e tataleitaki ena Vulivola ni iVavakoso me marautaka kina na veivosakitaki ni ivola na Parofisai i Aisea? Kevaka o na vakaitavi tiko ena Koronivuli ni Vuli Vunau, e rawa mo sureti koya na wekamu se dua o kila e tataleitaki me mai rogoca na nomu vosa. Tukuna rawa toka vua na iulutaga ni vunau soqovi levu ni se bera mai na macawa oya. (Me kabi ena papa ni itukutuku na ituvatuva vou) Vaqara na sala mo tugana kina e lomana na gagadre ni sokalou vei Jiova. Io, e rawa tale ga ni o sureti koya mo drau vuli ke se sega ni dua ena ivavakoso e vakavulici koya tiko ena iVolatabu.

⁴ Uqeti Ira Tiko ga na Mate tu Vakayalo: E levu era a tiko ena iVakananumi era sa yalataki ira oti vei Jiova. Ia sa mai cegu toka ena dua na gauna na nodra vunautaka na itukutuku vinaka. Ia, o Paula e uqeta “me da caka vinaka . . . vakauasivi vei ira era lewe ni matavuvale e na vakabauta va-Karisito.” (Kala. 6:10, VV) O koya gona, me bibi duadua vei keda o ira na sa mate tu vakayalo.

⁵ De dua, era sa cakacaka vakaitalatala tale e so ena nodra ciqoma nodra veiuqeti na qase kei na so tale. Ke o lesi mo cakacaka vata kei na dautukutuku e sa vunau tale, mo kila tiko ni nomu lomani Jiova kei na cakacaka vakavunau ena vakayalodeitaki koya. Vakaraitaka vua na dui sala o vakaitavi kina ena cakacaka vakavunau me rawa ni marautaka, me gumatua kina, qai rawa ni vakila na veivakalougatataki i Jiova.

⁶ Tekivutaki Koya Vinaka na Dautukutuku Vou: Na gauna e kila kina e dua na marama tataleitaki ni sa kunea na isoqosoqo ni Kalou dina, e sa via tekivu vunau sara ga. Ni oti nona vulica na veika e gadrevi me na cakava e kaya: “Au sa via tekivu sara ga.” Ke o vuli iVolatabu tiko kei na dua e sa vakadonui me cakacaka vakavunau, vukea me kila ni gadrevi me sa “tekivu sara ga,” qai tekivutaki koya vinaka na dautukutuku vou oqo. Vukei koya me lalawataka na sala me dau vakavakarau me qai vakaitavi wasoma tale ga ena nona cakacaka vakavunau ena veimacawa.

⁷ Ke se qai dautukutuku vou ga o luvemu, dau cakacaka vata kei koya qai vukei koya me toso me salavata kei na nona yabaki kei na ka e kila. Mai na nomu vukei koya ga vakalailai, o na kidroa tale ni o rogoca na maqosa ni nona veivosaki e veivale, wili iVolatabu, kei na nona solia na ivoladraudrau. Ke sotava o koya e dua e tataleitaki ni cakacaka tiko vakavunau, vakavulici koya ena veisikovi lesu, me lesuvi koya na tataleitaki.

⁸ Vakarabailevutaka na Nomu Cakacaka Vakaitalatala: E vakatara beka na kemu ituvaki mo vakarabailevutaka na nomu cakacaka vakavunau e dina ni sa oti na iVakananumi? E rawa ni o tosoya cake e dua se rua na aua mai na kena o dau rawata tu e liu ena vunau? O sa raica tale tiko beka na ivola ni yabaki se me gauna cava mo na baci painia veivuke kina? Se o rawa ni vakarawarawataka na nomu bula mo goleva kina na cakacaka vakaitalatala vakatabakidua? Na sasaga kece eda cakava ena cakacaka vakaitalatala e rawa ni vukea e dua me ciqoma na ka dina! (Caka. 8:26-39) Nida vakanamata tiko e liu, meda ‘muria tiko ga na ka e vinaka vei keda yadua kei ira tale ga na tani.’​—1 Ces. 5:15.

[Kato ena tabana e 3]

Tomana Tiko na Veivuke Vei Ira na:

□✔ Tiko ena iVakananumi

□✔ Dautukutuku Era sa Vunau Tale

□✔ Dautukutuku Vou Bera ni Papitaiso