Laulau na Vunau ni Lekaleka Qai Rawarawa

¹ Na cava era kauai kina vakalevu na itaukeinivale vei ira na dautukutuku gone nira vunautaka na itukutuku ni Matanitu ni Kalou? Dua na vuna ni dau rawarawa ga na ka era tukuna. Era rairai nanuma e so na dautukutuku mera kenadau sara ena vosa me qai rawa ni laulau nodra vunau. Ia, e tukuni ni vunau vinaka duadua na kena e rawarawa ga qai matata.

² E rawarawa qai vakadodonu sara ga na nona vunautaka o Jisu na Matanitu ni Kalou, qai vakavulici iratou tale ga na nona tisaipeli me ratou cakava tale ga. (Maciu 4:17; 10:5-7; Luke 10:1, 9) E vakayagataka na ikau ni vosa rawarawa, taro, kei na vosa vakatautauvata me dreti ira na vakarorogo qai tara tale ga na lomadra. (Joni 4:7-14) Ena laulau tale ga na noda vunau ke da vakatotomuri koya da qai tukuna na ka e rawarawa na kena kilai.

³ Eda vunautaka tiko na “i Tukutuku Vinaka ni matanitu.” (Maciu 24:14, VV) Ni o vakayagataka na Matanitu ni Kalou me usutu ni nomu vunau, ena rawarawa kina na nomu vosa. Tukuna na ka era kauai kina na vakarorogo. Era kauai vakalevu na marama ena nodra vuvale mai na ka vakapolitiki. O tama ena dau kauai vakalevu ena nona cakacaka kei na nodratou taqomaki na nona vuvale. Era kauaitaka na itabagone na nodra bula ena gauna se bera mai, era kauaitaka na qase na nodra bula kei na nodra taqomaki vinaka. Era kauai vakalevu na lewenivanua ena ka e yaco tiko ena noda vanua mai na ka e yaco tiko mai vanua tani. Ni veivosakitaki oti na ka era kauaitaka raraba, vakamacalataka vua na veivakalougatataki era na marautaka na kawatamata talairawarawa ena veiliutaki ni Matanitu ni Kalou. Ni tuvani ga vakamatau e vica na vosa rawarawa qai vakamacalataki e dua na tikinivolatabu, sa na rawa ni uqeti kina na tataleitaki nei koya e vakarorogo tiko.

⁴ Rawa ni o Tekivuna na Veivosaki ni o Kaya:

◼ “Daru na rairai duavata ena levu ni mate e sega na kena iwali sa tarai keda tu oqo na kawatamata. Oni kila tiko ni yalataka tu na Kalou ni sa vakarau vakaotia vakadua na veimataqali tauvimate, vaka kina na mate?” Waraka me sauma qai wilika na Vakatakila 21:3, 4.

⁵ Ni matata qai rawarawa na nomu ivakamacala, mo vakayagataka mada ga oya ena nomu saga mo tara na lomadra kei na nodra vakasama e levu ena nomu yalava, vukei ira mera vulica na veika e baleti Jiova, kei na nodra rawa ni marautaka na bula tawamudu.​—Joni 17:3.