“Keimami sa Cakacakataka Vakawasoma na Neimami Yalava!”
1 Eda dau nanuma beka ni sa cakacakataki wasoma na noda yalava sa sega kina o ira era vaka na sipi? O na rairai kaya: ‘Au kila na ka era dau cakava na vakaitikotiko ena yalava oya. Na cava meda lesu tiko kina vei ira na bese ni vakarorogo?’ Sa bau levu dina na yalava era dau tarai wasoma. O koya gona, me kua ni cala kina na noda rai, meda raica ga na yasana vinaka. Ena vuku ni cava? Raica mada na va na vuna e tiko oqo e ra.
2 Rogoci Noda Masu: E kaya o Jisu: “Sa levu sara na i teitei sa matua vinaka tu, ia sa lewe lailai ga na tamata cakacaka; mo ni masuti koya kina na Turaga ni tatamusuki me talai ira mai na tamata cakacaka ki na i teitei.” (Luke 10:2, VV) Sa vicasagavulu mai na yabaki na noda kerei Jiova tiko me vukei keda. Ena levu na vanua, sa levu kina na tamata cakacaka, oya na vuna eda tara tiko kina vakawasoma na yalava. E vakavureki nida kila ni sa rogoca noda masu o Jiova, se vakaevei?
3 Na Vua ni Vosota: Ena yalava mada ga e dau tarai wasoma, era se rogoca ga na lewenivanua na itukutuku ni Matanitu ni Kalou, sa ra mai kila tale ga na ka dina. O koya gona, meda lako tiko ga ena noda nuitaka nida na kunea e levu na tamata lomadina. (Aisea 6:8-11) Me vaka eratou a cakava na tisaipeli taumada i Jisu, “lako [tiko] ga” vei ira ena yalava o sa lesi kina, saga mo uqeti ira mera taleitaka na Matanitu ni Kalou.—Maciu 10:6, 7.
4 Levu na ivavakoso mai Potukali era tara na nodra yalava ena veimacawa, ia era se kunei ira tiko ga na vaka na sipi. Dua na ka na rai dodonu ni dua na tacida yalewa. E kaya: “Ni bera niu lai vunau e veimataka, au dau masuti Jiova me vukei au meu na kunea e dua e taleitaka me vulica na iVolatabu.” Dua na siga e tuvanaka sara na vuli iVolatabu kei ira na cakacaka ena dua na valeniveikoti. E muri, e dua ga e qai yaco yani me vuli. E kaya: “O yau ga au taleitaka, o ira na kena vo era bese.” Ena loma ga ni dua na vula sa rua sara nona vuli iVolatabu. Sega ni dede sa papitaiso, e muri sa mai cakacaka vakapainia sara yani!
5 Sa Vakayacori Tiko na Cakacaka: Sa vunautaki tiko na itukutuku vinaka me vaka sa parofisaitaka oti o Jisu. (Maciu 24:14) Ena vanua mada ga era tu kina o ira era na ‘sega ni vakarorogo vei keda,’ era sa vakasalataki ga nira raica na noda cakacaka vakavunau. Eda namaka ni so era na sega ni vakarorogo se ra tusaqata na ka dina. Ia, o ira oya mera vakasalataki ga me baleta na siga ni veilewai i Jiova.—Isik. 2:4, 5; 3:7, 8, 19.
6 Se Bera ni Cava na Noda Cakacaka: E sega ni vakatau vei keda na gauna meda na vakacavara kina na noda cakacaka vakavunau. E kila vinaka o Jiova na gauna me na cava kina. E kila o koya nira se tiko e so ena noda yalava era na rairai rogoca na itukutuku vinaka. Edaidai, e so era kaya nira besetaka, ia e rawa ni yaco e so na veisau lelevu ena nodra bula—sega nodra cakacaka, tauvimate bibi, mate e dua na wekadra voleka—ena rairai qai uqeti ira mera vakarorogo ena dua tale na gauna. Ena vuku beka ga ni nodra cati keda, se ra sa rui osooso ga, le levu gona era se sega sara ga ni rogoca na ka eda vunautaka voli. Noda veikauaitaki ena noda veisiko wasoma era na rairai kauai kina mera vakarorogo.
7 O ira era tubu cake ena loma ni vica ga na yabaki oqo, era sa vakavuvale, sa ra qai tekivu raica vakatitobu se cava na inaki ni bula, ra qai taroga kina na taro ena sauma duadua ga na Vosa ni Kalou. A sureta e rua na iVakadinadina i nona vale e dua na tinanigone, qai kaya: “Niu se gone, au sega ni kila se cava na vuna e sega ni ciqomi ira kina na iVakadinadina o tinaqu qai tukuna vei ira ni bese ni vakarorogo, ia na ka ga era via talanoataka na iVolatabu. Au vakadeitaka ena gauna oya ni gauna au na levu kina, vakawati, qai dua ga noqu vuvale, au na kerei ira na iVakadinadina i Jiova mera lako mai i noqu vale ra qai vakamacalataka vei au na iVolatabu.” Oya sara ga na ka a qai cakava, erau marau na iVakadinadina erau lai sikovi koya.
8 Rawa ni Laulau Cake Nomu Vunau? De dua na dredre ni yalava e tarai wasoma e sega ni vakavuna o ira na vakaitikotiko kina. Eda rairai vakadredretaka ga o keda. Dau cala tu beka ga noda rai nida tekivu vunau? Ena rawa ni vakilai ena ka eda cakava, rorogo ni domoda kei na irairai ni matada. Me donu tiko ga nomu rai, mata mamarau tale ga. Kua ni dua tu ga na iwalewale ni nomu veivosaki. Me veiveisau na nomu iucu, saga mo vakavinakataka tiko ga. O rawa ni veisautaka na taro e tekivu kina na veivosaki, se o vakayagataka e duatani tale na tikinivolatabu. Tarogi ira na mataveitacini se iwalewale cava era raica ni yaga ena nodra cakacaka voli ena yalava oqo. Me duidui na dautukutuku kei na painia o cakacaka vata kei ira, raica se cava e laulau kina na nodra cakacaka vakaitalatala.
9 E vakalougatataka qai vakadonuya o Jiova na cakacaka ni vunautaki ni Matanitu ni Kalou, na noda vakaitavi kina e vakadinadinataka nida lomani koya kei ira na kainoda se o ira na wekada. (Maciu 22:37-39) Meda cakava tiko mada ga na noda cakacaka me yaco ina kena iyacoyaco, da qai kua ni vuturitaka na yalava e dau tarai wasoma.