Na Were sa Matua Vinaka Tu me Tamusuki
1. Na cakacaka bibi cava sa vakayacori tiko nikua?
1 Ni vunau oti vua na yalewa ni Samaria, a kaya o Jisu vei iratou na nona tisaipeli: “Dou tacake mo dou raica na were, ni sa matua vinaka tu me tamusuki.” (Joni 4:35, 36) Sa tekivu tiko na tatamusuki vakayalo, ia a raica rawa o Jisu na levu ni cakacaka me na vakayacori e vuravura raraba. Ni soli vua na lewa mai lomalagi, se vakaitavi tiko ga o Jisu ena tatamusuki qo. (Maciu 28:19, 20) Na ivakadinadina cava e tu eda kila kina ni sa vakatotolotaki tiko ga na cakacaka qo ni bera ni cava?
2. Na cava e yaco e veiyasai vuravura e vakaraitaka ni tubu tiko ga na cakacaka ni tatamusuki?
2 Tatamusuki e Vuravura Raraba: Ena yabaki ni cakacaka ni isoqosoqo ni 2009, e tubu na dautukutuku e vuravura raraba ina 3.2 na pasede. Ia ena veivanua e vakadredretaki kina na cakacaka e tubu ena 14 na pasede. E tubu ena sivia na 7,619,000 na iwiliwili ni vuli iVolatabu e ripotetaki e veivula—e levu cake mai na iwiliwili na dautukutuku, qai voleka ni sivia na veimama na milioni na iwiliwili ni vuli iVolatabu a ripotetaki ena yabaki yani e liu. Ni tete totolo na cakacaka ena levu na vanua, era kerei kina eso tale na daukaulotu era vuli oti mai Kiliati. Ena levu na vanua e duidui na kena vosa e vua vakalevu tale ga kina na cakacaka. E macala ni vakatotolotaka tiko na cakacaka qo o Jiova ni sa vakarau cava na tatamusuki. (Aisea 60:22) E dau vinaka na nomu itovo ni rai me baleta na “were” ena nomu yalava?
3. Na cava era na rairai nanuma eso me baleta na tatamusuki ena nodra yalava?
3 Tatamusuki ena Noda Yalava: Eso era na rairai tukuna, “E sega so ni vuavuaivinaka na neitou yalava.” E macala ni so na yalava e sega ni vuavuaivinaka sara me vakataka eso tale, se me vuavuaivinaka me vaka e liu. Era na rairai nanuma kina eso na iVakadinadina ni o ira era dodonu mera ciqoma na itukutuku vinaka ena yalava oya era sa cakava oti vakakina, sa qai vo na nodra kumuni ga mai e vica. E dina beka oya?
4. Na itovo ni rai cava meda bucina me baleta na tatamusuki, na cava na vuna?
4 Na tatamusuki e cakacaka vakaitamera mai na kena itekitekivu me yacova ni oti. Meda raica mada na bibi ni cakacaka qo ena vosa i Jisu: “E levu sara na ka me tamusuki, ia era lewe lailai ga na tamata cakacaka. O koya gona, dou kerea na Turaga ni tatamusuki me tala mai eso tale na tamata cakacaka ina nona tatamusuki.” (Maciu 9:37, 38) E vakatau vua na Turaga ni tatamusuki o Jiova na gauna kei na vanua ena yaco kina na tubu. (Joni 6:44; 1 Kor. 3:6-8) Na cava meda cakava? E kaya na iVolatabu: “E na mataka mo kaburaka na nomu sila, ia e na yakavi me kakua ni cegu na ligamu.” (Dauv. 11:4-6) Io, me kua ni cegu na ligada ni sa voleka ni oti na tatamusuki!
5. Na cava meda gumatua tiko ga kina na vunau ena yalava e rairai sega ni vuavuaivinaka?
5 Tatamusuki Tiko Ga: Ke tarai wasoma na noda yalava ra qai sega ni kauai na tiko kina, e tiko na vuna vinaka meda gumatua tiko ga da qai kua ni lokuyara na vunau. (2 Tim. 4:2) Na levu ni leqa e tarai vuravura e vakavuna me veisau na nodra rai na lewenivanua ra qai vakasamataka kina vakabibi na veigauna se bera mai. Nira sa uabula na gone era na rairai vinakata na bula vakacegu. O koya gona na noda gugumatua ena rairai uqeti ira eso tale. Io, o ira na sega ni dau tataleitaki tu e liu era sa na rairai vakarorogo. Mera vakaroti tale ga o ira era sega ni taleitaka na itukutuku eda kacivaka.—Isik. 2:4, 5; 3:19.
6. Ke dredre na yalava eda cakacaka kina, na cava ena vukei keda meda kua ni soro?
6 Ke dredre na yalava eda cakacaka kina, na cava ena vukei keda meda kua ni soro? De dua eda rawa ni vakayacora eso tale na iwalewale ni vunau mai na noda vunau e veivale, me vaka na vunau ena vanua ni bisinisi se vunau ena talevoni. Me kua ni duadua tu ga na ka eda tukuna, me veisau na iucu ni noda vosa. Eda rawa ni veisautaka na noda ituvatuva meda vunau kina ena yakavi se dua tale na gauna era na rairai tiko kina e vale na itaukeinivale. De dua eda rawa ni vulica e dua tale na vosa meda vunautaka kina na itukutuku vinaka vei ira tale e levu. Eda rawa ni painia tudei meda vakalevutaka kina noda cakacaka vakaitalatala. Se toki ena dua tale na vanua era lailai kina na dautatamusuki. Ke donu gona na noda rai me baleta na tatamusuki, eda na saga meda vakaitavi vakalevu ena cakacaka bibi qo.
7. Ena vakacava na balavu ni gauna eda na vakaitavi tiko kina ena cakacaka ni kumukumuni?
7 Ni lekaleka ga na gauna mera tatamusuki kina na dauteitei, era na sega gona ni vakasavuliga se lokuyara me yacova ni sa oti na cakacaka. E va tale ga qori na tatamusuki vakayalo. Ena vakacava na balavu ni gauna eda na vakaitavi tiko kina ena cakacaka ni kumukumuni? Ena caka tiko ena “ivakataotioti ni veika vakavuravura” me yacova “na icavacava.” (Maciu 24:14; 28:20) Me vakataki koya na iTalatala liu nei Jiova, eda na vinakata tale ga meda vakaotia na cakacaka e lesi vei keda. (Joni 4:34; 17:4) Meda cakava tiko mada ga na cakacaka qo ena rai dodonu, ena gugumatua, kei na marau, me yacova na icavacava. (Maciu 24:13) Se bera ni oti na tatamusuki!
[Caption on page 2]
Na tatamusuki e cakacaka vakaitamera mai na kena itekitekivu me yacova ni oti