O Via Vakalevutaka na Nomu Cakacaka?

¹ E vakatauvatana o Jisu na Matanitu ni Kalou kei na iyau talei. (Maciu 13:44-46) Na cakacaka ni kena vakatetei na itukutuku ni Matanitu ni Kalou e dua tale ga na iyau talei. E dodonu meda vakaliuca ena noda bula na cakacaka vakaitalatala, dina ga nida na vakuai keda mai na levu na ka ke da gadreva meda vakalevutaka na noda vakaitavi kina. (Maciu 6:19-21) O via vakalevutaka na nomu cakacaka me baleta na Matanitu ni Kalou?

² Vakasamataka na Veitikina Bibi Oqo: E vica na ka e gadrevi meda rawa ni vakalevutaka kina na noda cakacaka vakaitalatala: (1) meda vakadeitaka nida na vakaliuca na cakacaka ni Matanitu ni Kalou ena noda bula (Maciu 6:33); (2) meda vakabauta da qai vakararavi vei Jiova (2 Kor. 4:1, 7); (3) kerea na veivuke ni Kalou ena nomu masu vagumatua (Luke 11:8-10); (4) cakava na ka eda masulaka.​—Jeme. 2:14, 17.

³ Sala Meda Vakalevutaka Kina Noda Cakacaka Vakaitalatala: O keda kece e rawa ni noda isausau meda vakaitavi wasoma ena cakacaka vakaitalatala e veivula. O bau vakasamataka tale ga mo dau vunau tawalokuci ena gauna e veiganiti, o saga me vinaka cake na iwalewale ni nomu vunau, me laulau tiko ga na nomu veisikovi lesu, saga me laulau na nomu veivakavulici ena iVolatabu? O rawa beka ni painia veivuke se painia tudei se mo lai veiqaravi ena vanua e gadrevi kina vakalevu na veivuke? Ke o iko e dua na tacida tagane papitaiso oti, vakacava mo saga mo dua na dauveiqaravi vakaitalatala se dua na qase? (1 Tim. 3:1, 10) O rawa ni vakalevutaka na nomu cakacaka vakaitalatala ena nomu vakalewe fomu i Peceli, se Koronivuli ni Vuli Veiqaravi Vakaitalatala?​—Luke 10:2.

⁴ A uqeti me painia tudei e dua na tacida tagane a cakacaka saumi qai vakaitavitaki koya vakalevu ena qito. E tekivu painia veivuke qai cakava e so na veiveisau me rawa ni cakacaka kina vakaitalatala vakatabakidua. E qai lai vuli ena Koronivuli ni Vuli Veiqaravi Vakaitalatala, e vukei koya vakalevu na vuli oya ena nona ilesilesi me dua na ivakatawa ni tabacakacaka ena gauna oqo. Dua na ka nona marautaka na veivakayaloqaqataki e caka vua, e lomavakacegu tale ga ena nona vakatulewataka me vakalevutaka na nona cakacaka ena Matanitu ni Kalou.

⁵ O Jiova e vakalougatataki ira era soli ira ena nona cakacaka. (Aisea 6:8) Me kua mada ga ni dua na ka e tarovi iko ena nomu vakalevutaka na nomu cakacaka vakaitalatala kei na nomu marautaka na veivakacegui e kune kina.