iSausau Vinaka ni Yabaki Vou Vakacakacaka
1. Na isausau cava e rawa nida kotora ena yabaki vou vakacakacaka?
1 Ke da vinakata meda toso vakayalo e dodonu meda kotora e so na isausau. Na isausau cava beka eda sa kotora ena yabaki vou vakacakacaka? Dua na isausau vinaka na painia veivuke ena dua se vica na vula. Na isausau oqo e gadrevi taumada kina na vakavakarau, oya na vuna e gauna vinaka kina oqo me dua noda ituvatuva. Ia na cava e isausau vinaka kina na painia veivuke?
2. Na cava e isausau vinaka kina na painia veivuke?
2 Vuna Meda Painia Veivuke Kina: Nida vakalevutaka noda cakacaka vakavunau meda painia veivuke, ena vakamarautaki koya na Tamada vakalomalagi. (1 Ces. 4:1) Noda vakasamataka gona vakabibi na veika kece e cakava tu vei keda o Jiova, ena uqeti keda meda tukuni koya yani. (Same 34:1, 2) E dau vakamarautaki Jiova ni raica na noda vakuai keda mai na so na ka, meda vakalevutaka kina na cakacaka vakavunau. (Iper. 6:10) Noda kila oqo ena vakamarautaki keda tale ga.—1 Vei. 29:9.
3, 4. E yaga vakacava vei keda na painia veivuke?
3 Na levu ga ni noda cakava e dua na ka, ena rawarawa vei keda, eda na marautaka tale ga. Na levu tale ga ni noda cakava na cakacaka vakavunau, eda na doudou kina na vosa vei ira na itaukeinivale. Eda na kenadau ena vakayagataki ni iVolatabu, eda na maqosa cake tale ga noda tekivuna na veivosaki e matanivale. Na levu tale ga ni noda veivosakitaka na noda vakabauta, na kena dei qai kaukaua. Levu gona vei ira na sega tu na nodra vuli iVolatabu era kunea e dua nira painia veivuke.
4 Ena uqeti keda tale ga na painia veivuke meda veisautaka noda ituvatuva vakayalo eda sa dau muria tiko mai. A nanuma e dua a painia tudei tu e liu, me sa painia veivuke tale mada ena dua na vula, baleta ni sa rui vakaogai koya vakalevu ena cakacaka saumi. E kaya: “Au kurabuitaka na kena vakabulabulataki au vakayalo noqu painia veivuke ena dua ga na vula! Au mani tuvanaka meu painia veivuke tiko ga, yaco sara meu painia tudei tale.”
5. Na cava e rawa ni vukei keda meda kauta laivi na nanuma cala?
5 So na Ka e Rawa ni Tarovi Keda: E so era nanuma ni sega ni rawa nira painia veivuke baleta nira sega ni kenadau ena veivakavulici. Ke tu vei keda na mataqali rai vaka oqo, meda nanuma tiko ni rawa ni vukei keda o Jiova me vaka a cakava vei Jeremaia. (Jere. 1:6-10) Dua tale o Mosese, e tukuni ni “dauvosa vakamalua, ka yame berabera,” ia a vakayagataki koya o Jiova me vakayacora kina na lomana. (Lako 4:10-12) Ke da nanuma ni sega ni rawa nida cakava na cakacaka oqo, meda kerea na veivuke i Jiova me vakaukauataki keda.
6. Rawa vakacava nida painia veivuke nida tautauvimate se osooso?
6 E tarovi keda beka na tautauvimate se na osooso meda painia veivuke? E rawa tale ga vei ira na tautauvimate se malumalumu mera painia veivuke, ke ra cakava e dua na ituvatuva e ganita na kedra ituvaki. Kevaka eda osooso, rawa nida tosoya ena dua tale na vula e so na ka e sega soti sara ni bibi, me rawa kina nida painia. E so era cakacaka saumi era volia na gauna mera painia veivuke kina nira taura e dua se rua nodra siga ni gade.—Kolo. 4:5.
7. Na cava e bibi kina meda masulaka noda painia veivuke?
7 Ka Meda Cakava: Meda masulaka noda via painia veivuke. Da kerea vei Jiova me vakalougatataka noda sasaga meda vakalevutaka noda cakacaka vakavunau. (Roma 12:11, 12) Rawa ni vukei keda o Jiova meda yalomatuataka noda veiveisautaka noda ituvatuva. (Jeme. 1:5) Ia ke sega ni lomada meda cakava na cakacaka oqo, meda kerea na veivuke i Jiova me veisautaka noda rai.—Luke 10:1, 17.
8. E veivuke vakacava na ivakasala ena Vosa Vakaibalebale 15:22 meda painia veivuke?
8 Meda veivosakitaka vakavuvale na isausau ni painia veivuke. (Vkai. 15:22) Rawa ni dua na lewenivuvale e painia veivuke ra qai veitokoni na kena vo. Meda veivosakitaka tale ga kei ira na lewe ni ivavakoso noda via painia veivuke, vakabibi vei ira eda kila ni via tautauvata na keda ituvaki. Oqo ena rawa sara ga ni vakabulabulataka na yalo ni painia veivuke.
9. Na vula cava o na via painia veivuke kina?
9 Nida raica na ivolanivula ni isoqosoqo ena yabaki vakacakacaka vou, na gauna veiganiti cava eda rawa ni painia kina? Ke da cakacaka saumi se da gonevuli, e rawa nida painia ena vula e tiko na kena olodei se lima na kena siga Vakarauwai kei na Sigatabu. Kena ivakaraitaki, na vula o Sepiteba, Tiseba, Maji, kei na Okosita e lima na kena muanimacawa. Na vula o Me e lima na kena Vakarauwai, na June e lima na kena Sigatabu. Ia ke da tautauvimate, rawa nida painia ena vula e dau vinaka kina na draki. Rawa tale ga nida painia ena vula e veisiko mai kina ena ivavakoso na ivakatawa ni tabacakacaka. Na ka e vinaka kina noda painia na vula ni veisiko, oya ni rawa nida tiko ena imatai ni veimama ni nodra bose na painia tudei. Na iVakananumi ni yabaki mai oqo ena vakayacori tiko ena 22 Maji, e vula vinaka kina ni painia na vula o Maji, Epereli, kei na Me. Nida sa digia na vula se vica na vula meda painia veivuke kina, meda tuvana rawa sara na noda ituvatuva meda rawata kina na aua e lavaki.
10. Na cava eda rawa ni cakava ke da sega ni rawa ni painia veivuke?
10 Ia kevaka eda sega ni rawa ni painia veivuke ena yabaki vakacakacaka mai oqo, e se rawa tiko ga nida vakaraitaka na yalo ni painia. Meda gumatua tiko ga na cakacaka vakavunau, nida kila ni marautaka o Jiova noda cakava ena noda vinaka kece qai vu mai lomada. (Kala. 6:4) Meda tokoni ira na painia veivuke, da uqeti ira tale ga. Rawa tale ga nida veiveisautaka noda ituvatuva meda vagalalataka e dua tale na siga ena lomanimacawa meda cakacaka kina kei ira na painia.
11. Na cava meda solia kina noda vinaka kece ena cakacaka vakavunau?
11 Eda kila vinaka na tamata i Jiova na lekaleka ni gauna sa da bula tu kina oqo. E dodonu me vakayacori gona na cakacaka ni kena kacivaki na itukutuku vinaka. Na cakacaka oqo e vauci kina nodra bula na tamata, vakabibi ni sa vakalekalekataki na gauna. (1 Kor. 7:29-31) Noda lomana gona na Kalou kei na noda lomani ira na tamata ena uqeti keda meda solia noda vinaka kece ena cakacaka bibi oqo. Na noda sasaga kei na noda ituvatuva vinaka ena rawa kina nida painia veivuke ena dua mada ga na vula ena yabaki vou vakacakacaka—isausau vinaka dina!