O Dau Kana Vinaka Beka Vakayalo?
1 E dau tukuni ni vakatau ‘na noda bulabula mai na ka eda kania.’ Io, e dina oya, ni ka eda kania e rawa ni vakatau kina na noda kaukaua da qai bulabula, se da malumalumu da qai tautauvimate. Ni kaya o Jisu: “Ena sega ni bula na tamata e na madrai duaduaga, sa bula ga e na vosa kecega sa lako mai na gusu ni Kalou,” e kena ibalebale ni rawa ni lakovinaka se lakovakaca tale ga vei keda na iwalewale ni noda kana vakayalo. (Maciu 4:4) O koya gona, o dau kana vinaka beka vakayalo? O dau kana digidigi? O dau kana ga vakusakusa? Se o dau tikica beka na gauna mo marautaka kina na nomu kania wasoma na kakana vakayalo bulabula, qai vakarautaki vinaka?
2 Kila na Ka O Kania: E takivaka mai o Jiova na “kakana e na kena gauna dodonu” kei ‘na magiti uro’ ni vakayagataki koya na “dauveiqaravi yalo dina ka vuku.” (Maciu 24:45, VV; Aisea 25:6) Ia me yaga vei keda na isolisoli loloma oqo, meda saga meda kana vinaka vakayalo.
3 De vinaka mo taroga: ‘Au dau wilika e veisiga na tikinivolatabu ni veisiga kei na kena ivakamacala? Au dau wili iVolatabu e veisiga, qai vakasamataka vakatitobu? Au dau vakavakarau ina soqoni ena noqu vakarautaka rawa na veika ena vulici kina? Au sa wilika tasevu beka na ivola vovou kece, okati kina na Parofisai i Aisea—Me Vakararamataka na Kawatamata I?’
4 A yalataka o Jisu: “Era marau o ira era kauaitaka na nodra gagadre vakayalo . . . era marau o ira sa viakania ka viagunuva na ivalavala dodonu: nira na vakamamautaki.” (Maciu 5:3, 6, NW) O koya gona, mo kana vinaka vakayalo ena nomu vakatawana na nomu vakasama kei na lomamu ena nomu kila na Kalou.