Na ‘iSolisoli Tamata’ Era Yalogu ni Vakatawa na Qelenisipi ni Kalou
1 Sa bau dua na ka ni veivuke vakayaloloma na ‘isolisoli tamata’ e vakarautaka o Jiova ena vuku i na luvena! (Efeso 4:8, 11, 12) E levu na nodra itavi, wili kina na nodra gumatuataka kei na yalogutaka na nodra vakatawani na qelenisipi ni Kalou. (1 Pita 5:2, 3) E yaga na isolisoli oqo vei keda kece. De so era sotava tu na veika dredre, era se qai vakasosoqoni vou mai, e tiko beka na nodra malumalumu, se ra lakosese tu, ia o ira na ivakatawa oqo era kauaitaka dina na noda veika kece vakayalo.—Fpai. 2:4; 1 Ces. 5:12-14.
2 Ni dau rarawataki dina na ituvaki kei vuravura ena gauna oqo, era “[i]vunivuni mai na cagi, kei nai vakaruru mai na cava” na ivakatawa. Era vukei keda nida oca, se na gauna eda colata tiko kina na icolacola bibi da qai gadreva sara ga na veivakacegui. Nira vakayacora oqo era “vaka na uciwai ena vanua dravuisiga” se “vaka na yaloyalo ni vatu levu e na vanua dauveivakaocataki.”—Aisea 32:2.
3 Vakauqeti Ira na Dautukutuku Mate: O ira na qase era saga sara ga mera uqeti na dautukutuku vakavudua se dautukutuku mate mera mai vakaitavi wasoma tale ena cakacaka kece ni ivavakoso. Na cakacaka ni veivakatawani vakayalololoma oqo e sa vukea e levu mera dau lakova wasoma tale na soqoni qai uqeti ira vakayalo me yacova sara nira sa vakaitavi tale ena cakacaka vakavunau. Na nodra sasaga na qase oqo e vakaraitaka na yalololoma e tiko vei Jiova kei na nona veiliutaki tiko o Jisu Karisito. E kotora kina o koya e dua na ivakarau ni veikauaitaki me caka vei ira na nona sipi era lakosese tu se ra sa yali.—Maciu 18:12-14; Joni 10:16, 27-29.
4 O ira na ivakatawa era dau saga mera kila na ivakatakilakila ni sa tataivatia tiko vakayalo e dua. Era na rairai gadreva na veivukei vakayalo o ira e sa kune tiko vei ira na yalolailai, ra soqoni ga vakavudua, se malumu mai na nodra cakacaka vakavunau. Era na saga sara ga na qase mera vukei koya e sa tekivu galeleta tiko na isulusulu se sasauni vakavuravura se o ira e tuburi ira mai na yalo ni dauvakalewa na ivavakoso. Ena dela ni veikauaitaki dina kei na loloma, era bolea mera ‘solia na nodra bula’ o ira na qase dauveinanumi me rawa kina nira vukei mera lomani Jiova tale o ira oqo.—1 Ces. 2:8.
5 Ena veigauna sa oti yani, e so na lotu Vakarisito yalayala era sa sega tale ni bau veitaratara kei na ivavakoso, nira sa mate tu vakayalo ena vuku ni nodra yalolailai ena tautauvimate, dredre ni bula vakailavo, se ra tusaqati mai na nodra vuvale. Era sega ni veivakalewai na qase, era veiuqeti ga ena nodra tukuna ni o Jiova e kauaitaki ira dina na nona sipi qai vakacegui ira ena gauna era sotava kina na ituvaki dredre. (Same 55:22; 1 Pita 5:7) Era tu vakarau na ivakatawa ni qelenisipi ena nodra vukei ira mera kila nira ‘toro voleka yani vua na Kalou, ena toro voleka mai vei ira o koya,’ me mai veivakaukauataki qai veivakacegui.—Jeme. 4:8; Same 23:3, 4.
6 Kauaitaki Ira na Qase kei na Malumalumu: O ira na ivakatawa dau loloma era dau kauaitaki ira tale ga na sa dau guilecavi tu. E tiko ena ivavakoso kece e so era sa qase, era qaravi tu ena vale ni malumalumu, se o ira sara ga na malumalumu. Eda kila vinaka ni lailai na nodra dau vakaitavi ena kena kacivaki na itukutuku ni Matanitu baleta na kedra ituvaki. Na sala beka ga e rawa nira vunau kina oya na nodra vosa vei ira na veisiko yani, o ira tale ga na curu tu, kei ira era dauveiqaravi. Ia, se ra mani vosa vakacava, e ka talei dina na nodra vakaitavi ena vunau raraba. (Maciu 25:15) Ke ra mani vunau mada ga me 15 na miniti, ena ripotetaki oqo, era na qai wili tiko ga kina mera dautukutuku wasoma ni Matanitu.
7 Era kauaitaka vakalevu na ‘isolisoli tamata’ na veika era gadreva tu vakayalo na tacidra donuya na gauna oqo—na vula ni iVakananumi. E dua dina na gauna veiganiti vei ira na qase oqo mera saga na nodra vukei o ira na lakosese tu mera mai vakila tale na marau kei na vakacegu ni vakasama nira veimaliwai ena loma ni ivavakoso! Eda marau dina nida raici ira eda “veitokani e na vakabauta” nira sa mai tiko tale ena soqoni ra lako tale ga ena cakacaka vakaitalatala mera vakaukauataka tale kina na nodra vakabauta na isoro ni veivoli.—Kala. 6:10; Luke 15:4-7; Joni 10:11, 14.