Vunautaki ni iTukutuku Vinaka e Veivakabulai!

¹ Oqo na cakacaka bibi duadua e caka tiko e vuravura ena gauna sara ga oqo. Na Kalou o Jiova, o Jisu Karisito kei ira na oba vakaoba na agilosi era raica matua na vakayacori ni cakacaka oqo. Na cava na vuna, kei na cava e bibi kina? Ni vunautaki kina na Matanitu ni Kalou qai veivakabulai tale ga!​—Roma 1:16; 10:13, 14.

² Era nanuma e so ni na yaga na veivuke kevaka eda saga me vakavinakataki na vuravura eda bula tu kina oqo. E vuqa era vakaogai ira ena qarai ni veisaututaki, vakaoti ni veimate se na toroicake ni veika vakailavo ni matanitu. Ia na cava ga ena vukei ira dina na tamata?

³ E Cakacaka Bibi: Na itukutuku vinaka ga ni Matanitu ni Kalou e vakamacalataka na inaki ni bula, na vu ni leqa ni kawatamata, kei na inuinui duadua ga ni gauna mai muri. E vukei ira na tamata mera itokani i Jiova ra qai kunea na ‘vakacegu sa uasivia na veika kece ga.’ (Fpai. 4:⁠7) Na itukutuku duadua ga ni Matanitu ni Kalou e solia na ivakasala yaga ni nodra vukei na tamata mera tutaka rawa na leqa ni bula ena gauna oqo, qai vakamacalataka na sala ni veivakabulai ena gauna sa na vakarusai kina na vuravura ca oqo. (1 Joni 2:17) E sega li ni uqeti keda oya meda solia na noda vinaka taucoko ena kena vunautaki na itukutuku vinaka ni Matanitu ni Kalou?

⁴ Kena ivakaraitaki: Na cava me caka vei ira na lewenikoro era moce tu e leqataki nodra bula ni sa vakarau kacabote na ilatiniwai? Me vakavinakataki na ilatiniwai? Me ukutaki na koro sa vakarau luvu oqo? Sega! Mera vakayadrati na lewenikoro, vakasalataki ena leqa e sa vakarau yaco ra qai vukei mera dro! O ira na moce tiko vakayalo ena gauna oqo era tu ena ituvaki leqataki dina. (Luke 21:34-​36) Ni sa vakarau takali na ivakarau ca ni gauna oqo, meda saga ena kena gauna totolo duadua meda vunau vei ira na tamata kece ga!​—2 Tim. 4:2; 2 Pita 3:11, 12.

⁵ Dei Kina: Meda qara e vuqa tale na sala ni nodra vukei o ira era taleitaka dina na itukutuku vinaka​—ena nodra vale, e gaunisala, ena talevoni, se vunau tawalokuci. Na cakacaka e solia vei keda o Jiova e cakacaka bibi duadua eda rawa ni cakava na tamata. Kevaka eda cakava ena noda vinaka taucoko, eda na ‘vakabulai kina kei ira tale ga era rogoci keda.’​—1 Tim. 4:16.