“Vunautaka Sara me Macala na Vosa ni Kalou”

¹ Ni o marautaka e dua na ka vinaka e soli vei iko, ena laurai ena kemu ituvaki kei na ka o cakava, se sega beka? Io, e dina oya! Ena vuku ni nona vinaka kei na nona loloma o Jiova ina kawatamata, a cakayaco vua na yapositolo o Paula. Mani kaya kina: “Me ia na vakavinavinaka vua na Kalou e na vuku ni nona i solisoli e sega ni vakamacalataki rawa”! Na cava e okati ena “i solisoli” oqo? Na “loloma tawa yalani [kece] ni Kalou” vei keda, na kena e uasivi duadua na nona solia na Luvena me mai keda ivoli me bokoci kina na noda ivalavala ca.​—2 Kor. 9:14, 15, VV; Joni 3:16.

² E vosa wale beka ga o Paula? E sega sara! A vakaraitaka na nona vakavinavinaka cecekia ena levu na basogana. A kauaitaka vakalevu na kedra ituvaki vakayalo na nona itokani lotu Vakarisito, qai tu vakarau me vukei ira ena sala cava ga e rawa mera vakayagataka vinaka kina na loloma ni Kalou. E vola o Paula ena vukudra: “Keitou sa yalololoma sara vei kemudou, keitou sa vinakata me solia vei kemudou nai tukutuku-vinaka ni Kalou, ia ka sega ni koya walega, a neitou bula talega, ni keitou sa lomani kemudou vakalevu.” (1 Ces. 2:8) E sega wale ga ni vukei ira era sa lewe tu ni ivavakoso o Paula mera vakadeitaka na nodra vakabulai, e sega ni cegu na vunautaka na itukutuku vinaka, e lakova e vica vata na udolu na maile e vanua, e sokowasa tale ga ena nona qarai ira “sa vakarau tu me vinakata na bula tawa mudu.” (Caka. 13:48) Na levu ni nona vakavinavinakataka o Paula na veika e cakava vua o Jiova, e uqeti koya me “vunautaka sara me macala na vosa ni Kalou.”​—Kolo. 1:25, VV.

³ Ke da vakavinavinakataka na veika e cakava vei keda o Jiova, ena sega beka ni laurai ena noda vukei ira vakayalo na gadreva na veivuke ena loma ni noda ivavakoso? (Kala. 6:10) E sega li ni uqeti keda meda vakaitavi ena kena levu duadua eda rawata ena vunautaki ni itukutuku vinaka ni Matanitu ni Kalou ena noda yalava?​—Maciu 24:14.

⁴ Gauna Donu me Vakaraitaki Kina na Vakavinavinaka: Ena veiyabaki e gauna lavotaki na iVakananumi ni mate i Karisito meda vakaraitaka kina vei Jiova kei Jisu na noda vakavinavinakataka na ka erau cakava vei keda. Oqo e sega ni dua wale ga na soqoni se ivakananumi ga ni dua na ka sa caka oti. E kaya o Jisu: “Dou cakava oqo mo dou vakananumi au kina.” (Luke 22:19) Na soqo ni iVakananumi ni mate i Karisito e gauna meda vakananuma lesu kina na ivalavala ni bula i Jisu. Meda ciqoma ni bula, qai yavala tiko nikua ena lagilagi ni nona veiliutaki vakatui, na icocovi ni nona yalodina ena nona bula kece kei na nona solia na nona bula me isoro. Na noda tiko ena soqo oqo e ivakaraitaki tale ga nida vakamalumalumu ina veiliutaki i Karisito, ni dusimaka qai lewa tiko na veika e caka ena ivavakoso vakarisito. (Kolo. 1:17-​20) Mera tiko kece kina na tamata ni Kalou, ni oqo e ivakaraitaki ni nodra doka na iVakananumi ni mate i Karisito. Ena vakayacori tiko ena yabaki oqo ni dromu oti na siga ena Lotulevu, 28 Maji, 2002.

⁵ Ena noda sasaga vagumatua ni bera na iVakananumi ni yabaki sa oti, a tiko rawa kina e 7,308 e Viti, 436 mai Kiribati, 124 mai Nauru, kei na 144 mai Tuvalu. Keda isoqoni kece na yanuyanu e vakarurugi ena valenitabana e Viti e 8,012. Ena lewe vica beka ena tiko ena iVakananumi ena yabaki oqo? Ena vakatau vakalevu ke da “cakacaka” vagumatua meda vukei ira na kena levu eda rawata mera tiko tale ga kina.​—1 Tim. 4:10, VV.

⁶ Me ikuri ni noda tiko ena iVakayakavi ni Turaga, de rawa nida vakalevutaka na noda cakacaka vakavunau. E sega ni vakabekataki ni na vica vata na udolu na mataveitacini era na painia veivuke me dua na vula se sivia. Ena veiyabaki, e dau levu vei ira na tacida era painia veivuke ena vula ni iVakananumi kei na vica na vula e tarava, mai na Maji ina Me. E rawa beka mo tuvanaka na nomu bula ena yabaki oqo mo marautaka na itavi dokai ni painia veivuke? Oqo e dua na sala uasivi mo vakavinavinakataka kina vua na Kalou na nona loloma ena nona vakarautaka na isoro i Karisito. E sega ni vakataratutu ni na vakalougatataki iko kina o Jiova, me vaka eda na raica ena vica na vakasavuirogorogo e tarava.

⁷ Oqo na ka e vola e dua na tacida yalewa e cakacaka saumi me baleta na nona a bau painia veivuke tale ga ena Maji ni yabaki sa oti: “Ena Noda Cakacaka Vakaitalatala ni Matanitu ni Feperueri 2001, era vakayaloqaqataki o ira kece era rawa ni vagalalataki ira mera painia veivuke ena vula ni iVakananumi. A basai au sara ga oqo ni lima na siga Vakarauwai ena vula o Maji. E mani lomaqu meu solia na noqu ivolakerekere meu painia.” Ni tekivu painia ena vula oya sa tekia sara me nona isausau me na tekivutaka e dua na vuli iVolatabu. A rawata beka? Io, ni oti e 52 na aua ni nona vunau ena vula oya! E vakadinata: “Eda na kalougata ke da sasaga vagumatua.”

⁸ E yaga vakacava ina vuvale ke ratou painia vata? Ratou tawaguilecava e dua na vuvale, eratou lewe va, na nodratou a painia vata ena Epereli ni yabaki sa oti. E kaya o tinadratou: “Dua na ka na neitou nanamaki e veisiga, baleta ni keitou duavata ena cakacaka vakavunau! Keitou dau marautaka na gauna keitou dau vakayakavi kina ni keitou veivosakitaka na cakacaka keitou vakayacora ena siga oya.” E kaya na luvena tagane: “Au marautaka na neirau vunau vata voli kei Tata ena loma ni macawa, ni dau cakacaka tu ga o koya.” Tomana o tamadratou: “Niu ulunivuvale, au lomavakacegu niu kila ni keitou vakaitavi kece tiko ena cakacaka bibi duadua ena noda gauna.” E rawa beka ni dou painia vata vakavuvale? Vakacava mo dou veivosaki vakavuvale, mo dou raica de rawa ni dou painia veivuke vakavuvale ena vula ni iVakananumi sa roro mai oqo?

⁹ E Rawa Beka me Noda Vula Vinaka Duadua na Maji? Ni tekivu na yabaki 2000, a taroga na Noda Cakacaka Vakaitalatala ni Matanitu: “E Rawa Beka Nida Vakayagataka na Epereli 2000 me Noda Vula Vinaka Duadua?” Na cava eda a rawata kina? Totoka sara na iwiliwili ni veika eda a rawata. Nida nanuma lesu, a sega li ni vakilai na bulabula ni ivavakoso ena levu ni cakacaka vakayalo a caka ena vula lavotaki oya? E rawa beka nida tokaruataka, se da sivita na veika eda a rawata ena yabaki sa oti? Ke da veitauriligataka na noda sasaga, e rawa ni “Noda Vula Vinaka Duadua” na Maji 2002. Na cava me vula kina o Maji?

¹⁰ E rua na vuna e lavotaki kina na cakacaka ena vula o Maji. iMatai, ena caka tiko na iVakananumi ena icavacava ni vula o Maji, e levu kina na gauna ena itekitekivu ni vula meda veisureti ena kena levu eda rawata mera na tiko kina. iKarua, e lima na muanimacawa ni vula o Maji ni yabaki oqo, e kena ibalebale ni na vakarawarawataka vei ira na cakacaka kei ira na vuli mera painia veivuke. Vakacava mo vakalewa vinaka mada, qai lalawataka oqo e dua na ituvatuva ni cakacaka o rawa ni muria ni o vakayagataka na ituvatuva e tiko ena itoma? De o nanuma ni dredre na painia veivuke, e rawarawa ga. Me kena ivakaraitaki, ke o tuvanaka me 8 na aua ni vunau o rawata ena veimuanimacawa limalima, sa na qai vo ga e 10 na aua mo cakacakataka ena loma ni vula taucoko mo yacova kina na iokaoka ni 50 na aua.

¹¹ Na cava mera cakava na qase mera vukei ira kina na lewe kece ni ivavakoso mera “vunautaka sara me macala na vosa ni Kalou”? Me veiuqeti na nodra veitalanoa, ra vakayagataka tale ga na itavi ena soqoni me vakabulabulataki kina na yalo ni painia. Rawa nira vakaliuliu sara ga na qasenivuli ni Vulivola ni iVavakoso kei ira na nodra ivukevuke mera veitalanoa yadua kei ira na lewe ni nodra dui iwasewase lalai me baleta na painia, ra tu vakarau tale ga mera veivuke. De dua, e vica ga na malanivosa ni veivakayaloqaqataki, se so ga na vakatutu yaga e rawa ni lai uqeta e dua me painia. (Vkai. 25:11) E levu era na raica kina ni vinakati ga e so na veiveisau lalai ina nodra ituvatuva, sa rawa nira marautaka kina na itavi dokai ni painia veivuke. Ena so na ivavakoso e vakasakiti na nodra ivakaraitaki e so na qase kei na dauveiqaravi vakaitalatala kei ira na dui watidra nira painia veivuke vata ena vula ni iVakananumi. E lai curumi ira wale kina na yalo ni painia e levu na dautukutuku. Sa macala ni sega ni rawa nira na painia e so na dautukutuku ena vuku ni tauvimate se ituvaki tale e so, ia mera uqeti mera vakaraitaka na nodra vakavinavinaka ena nodra cakava na ka era rawata ena cakacaka vakavunau vata kei ira na vo ni ivavakoso.

¹² Ke ratou lalawa vinaka na qase, ena levu sara na ka eda na rawata. Me veiganiti na gauna e tuvanaki vakamacawa me vakayacori kina na cakacaka vakavunau. Ke rawa, me lesi ira rawa tu e so na tacida tagane matua na ivakatawa ni cakacaka mera na qarava na sotasota ni cakacaka vakavunau. Vei ira na tacida tagane oqo, mera vakavakarau vinaka me kua ni sivia e 10 ina 15 na miniti na dede ni sotasota, okati kina na nodra wasewasei na dautukutuku, wasei ni yalava kei na masu. (Raica na Kato ni Taro ni Noda Cakacaka Vakaitalatala ni Matanitu, Sepiteba 2001.) Me vakamacalataki vakamatata ina ivavakoso na ituvatuva e volai me baleta na cakacaka vakavunau ena loma ni vula taucoko qai vakabiri ena papa ni itukutuku.

¹³ Me veirauti na yalava e vakarautaki. Ena vinaka ke rau veivosaki tale ga na ivakatawa ni cakacaka kei na tacida e qarava na mape me tuvanaki na kena cakacakataki e so na yalava e dau tarai ga vakavudua. Me vakabibitaki na nodra lesuvi na vale e lala, vunau ena salatu, veisitoa kei na vunau ena yakavibogi. Ke veiganiti, e rawa nira vukei e so na dautukutuku mera kila na vunau ena talevoni.

¹⁴ Vukei Ira Mera Dautukutuku Tale: E tiko beka e so na dautukutuku mate ena nomu yalava, ra sa sega ni qai kacivaka na itukutuku vinaka? O ira oqo era se okati tiko ga mera lewe ni ivavakoso, ia ena vinakati mera vukei. (Same 119:176) Sa roro sara tiko mai na icavacava ni vuravura makawa oqo, sa sega ni yawa na vuravura vou, o koya gona, sa dodonu meda saga vagumatua meda vukei ira na dautukutuku mate. (Roma 13:11, 12) Sa oti toka oqo e vica na yabaki na nodra tekivu vukei e levu era vaka oqo mera dautukutuku tale. Meda vukei ira vakacava e levu tale vaka oqo mera vakalesuya mai na loloma kei na nuidei a tiko taumada vei ira?​—Iper. 3:12-​14.

¹⁵ Mera veivosakitaka na ilawalawa qase na sala mera vukei kina o ira era sa dautukutuku mate ena loma ni vica na yabaki sa oti. (Maciu 18:12-​14) Me raica na vunivola na card na Congregation’s Publisher Record, me vola na yacadra kece na dautukutuku mate. E rawa nira sagai mera vukei ena cakacaka ni veivakatawani. Ena vinaka sara ke lai veisiko na qase erau veikilai kei koya na dautukutuku mate, se kerei na nodra veivuke e so tale na dautukutuku. De na marau me veivuke e ke na tacida a vakavulici koya taumada ena ka dina. E nuitaki ni levu vei ira na dautukutuku mate era na tekivu vunautaka tale na vosa ni Kalou. Ke ra yacova na kena ivakatagedegede, na vula ni iVakananumi e gauna vinaka duadua mera tekivu vunau tale kina!​—Raica na Kato ni Taro ni Noda Cakacaka Vakaitalatala ni Matanitu, Noveba 2000, me kuria na ivakamacala.

¹⁶ E Tiko Tale Beka e So Era Rawata na iVakatagedegede Mera Vunau? E vakalougatataki keda tiko ga na nona tamata o Jiova ena nona kauti ira mai “na ka sa domoni e na veimatanitu kecega.” (Akeai 2:7) Era tiko e lewe vica vata na udolu e veiyabaki era yacova na ivakatagedegede ni dautukutuku bera ni papitaiso. O cei o ira oqo? O ira na luveda na iVakadinadina i Jiova kei ira na vuli iVolatabu e toso vinaka na nodra vuli. Eda kila vakacava ni sa yacova na ivakatagedegede me kacivaka kina na itukutuku vinaka e dua?

¹⁷ O Ira na Luveda na iVakadinadina i Jiova: E levu na luveda era dau tomani keda tu na itubutubu ena cakacaka vakavunau ena vica vata na yabaki, ia e se bera ga nira dautukutuku. De rawa nira tekivu dautukutuku bera ni papitaiso ena vula o Maji. O kila vakacava ke sa yacova na luvemu na ivakatagedegede ni dautukutuku? E kaya na ivola na Cokonaki me Vakayacori Noda Cakacaka Vakaitalatala, taqana 99: “Me dua na gone me sa ivakaraitaki vinaka tu ena nona itovo, ka rawa ni vakamacalataka vakataki koya na nona vakabauta vei ira na so me baleta na itukutuku vinaka ni uqeti mai utona me vakayacora vakakina.” Ke o kila ni sa yacova na ivakatagedegede oqo na luvemu, drau rawa ni veivosaki kina kei na dua vei iratou na qase e lewe ni Komiti ni Cakacaka ni iVavakoso.

¹⁸ Vuli iVolatabu Era Rawata na iVakatagedegede: Ni sa veirauti na nona kilaka o gonevuli, sa bau dede toka na gauna e dau tiko kina ena soqoni, de na vinakata me sa dua na dautukutuku ni Matanitu ni Kalou. Ke o vuli iVolatabu tiko kei na dua e vaka oqo, vakasamataka mada na veitaro oqo: Sa vakilai vua na toso, me salavata kei na nona yabaki kei na kena ituvaki? Sa dau talanoataka tiko beka na ka e vakabauta vei ira na tani? Sa “vakaisulu” tiko beka “e na tamata vou”? (Kolo. 3:10, VV) Sa yacova beka na ivakatagedegede ena vinakati vua e dua na dautukutuku bera ni papitaiso e koto ena taqana 97-9 ni ivola na Cokonaki? Ke vaka kina, mo veitaratara kei na Komiti ni Cakacaka ni iVavakoso me rawa ni tuvanaki me rau raici iko kei koya na gonevuli e rua na qase. Ke yacova na ivakatagedegede o gonevuli, erau na qai tukuna vua na qase ni sa rawa ni vakaitavi ena cakacaka vakavunau.

¹⁹ Vakacava na Vula o Epereli kei na Me? Erau vula lavotaki tale ga meda vakalevutaka kina na noda cakacaka vakavunau. De levu era painia veivuke ena vula o Maji era na via tomana tale ena Epereli kei na Me, se dua ga vei rau na vula oqo. Eda na vakabibitaka tiko ena noda cakacaka vakavunau ena vula o Epereli kei na Me na soli ni ivoladraudrau Na Vale ni Vakatawa kei na Yadra! Dua na ka na kedrau yaga vei ira era wilika! E dua na itavi levu erau cakava na ivoladraudrau oqo ena tubu vakasakiti e vakilai e vuravura raraba. Eda na saga vagumatua gona ena vula o Epereli kei na Me meda solia na ivoladraudrau e rua oqo ena kena levu eda rawata. Lalawa rawa oqo me levu na gauna mo na vakaitavi kina.

²⁰ Ni o lalawataka me levu na gauna ni nomu cakacaka vakavunau, ena vinakati beka me toroicake na iwiliwili ni nomu ivoladraudrau o taura ena ivavakoso? Eda dau solia ena loma taucoko ni noda yabaki vakacakacaka Na Vale ni Vakatawa kei na Yadra! ena veisiga Vakarauwai, na gauna lavaki me noda Siga ni Soli iVoladraudrau. Ia oqo, ni levu era na painia veivuke tiko, da qai soli ivoladraudrau ena rua taucoko na vula, de vinaka mo toroya cake na iwiliwili ni nomu ota ni ivoladraudrau ena ivavakoso. Ke o via cakava, yalovinaka, tukuna totolo vua na tacida e qarava na ivoladraudrau ena ivavakoso. E kerei tale ga na tacida e qarava na ivola me raica ni veirauti na ivolacebaceba Oni Via Kila Vinaka na iVolatabu?, e tu me vakayagataki.

²¹ E levu era vakavinavinakataka na kato e sa lewe tale tiko ga ni Noda Cakacaka Vakaitalatala ni Matanitu na “Ka Mo Kaya me Baleta na iVoladraudrau.” O sa taurivaka tiko, ena nomu vulica na iwalewale ni soli ivoladraudrau e dau tabaki kina? Vakacava mo dou tikica vakalekaleka na gauna ni nomudou vuli vakavuvale e veimacawa mo dou vakatovotovotaka kina na iwalewale oqo?

²² Vakayagataka Vinaka na Vula ni iVakananumi: Meda vakatotomuria na yapositolo o Paula, da vakavinavinakataki Jiova ena “nona i solisoli e sega ni vakamacalataki rawa,” ena noda vakaitavi vakalevu ena cakacaka vakayalo ena vula ni iVakananumi oqo. E okati kina na noda (1) tiko ena soqo bibi duadua ni yabaki, na iVakayakavi ni Turaga, Lotulevu, 28 Maji, 2002; (2) vukei ira na dautukutuku mate, me vakabulabulataki tale na ‘loloma a tu vei ira e liu’ (Vkta. 2:4; Roma 12:11); (3) vukei ira na luveda kei ira na vuli iVolatabu era sa yacova na kena ivakatagedegede mera dautukutuku bera ni papitaiso; (4) da qai vakaitavi ena kena levu eda rawata ena cakacaka ni veivakatisaipelitaki, se meda painia veivuke sara ena vula o Maji kei na veivula e tarava.​—2 Tim. 4:5.

²³ Meda masulaka mada ga meda na vakaitavi kece ena kena levu eda rawata ena vunautaki ni itukutuku vinaka ni Matanitu ni Kalou ena vula ni iVakananumi sa roro mai oqo, meda vakaraitaka kina vei Jiova nida vakavinavinakataka vakalevu na veika kece e cakava vei keda.

[Kato ena tabana e 6]

iTuvatuva ni Noqu Cakacaka Vakavunau ni Maji 2002

Sigatabu Moniti Tusiti Vukelulu Lotulevu Vakaraubuka Vakarauwai

1 2

Siga ni Soli iVoladraudrau

3 4 5 6 7 8 9

Siga ni Soli iVoladraudrau

10 11 12 13 14 15 16

Siga ni Soli iVoladraudrau

17 18 19 20 21 22 23

Siga ni Soli iVoladraudrau

24 25 26 27 28 29 30

IVAKANANUMI Siga ni Soli iVoladraudrau

NI DROMU OTI

31 NA SIGA

O rawa beka ni tuvanaka mo rawata e 50 na aua mo painia veivuke kina ena vula o Maji?