“O Rawa ni Painia!”
1. A raica vakacava e dua na tacida na nona cakacaka vakapainia?
1 “Au sega ni raica e dua tale na cakacaka e veivakacegui se veitaraicake vakayalo.” A tukuna o Kathe B. Palm. A painia tu me vica vata na yabaki, e dau vunau mai na dua na yasai Chile, mai Sauca Amerika ina dua tale. Nida vakasamataka nodra vakalougatataki na veiqaravi vakatabakidua, de dua a tukuna vei iko e dua: “O rawa ni painia!”
2. Vakamacalataka na vuna e veivakacegui kina na noda qaravi Jiova.
2 Na Bula e Veivakacegui: A vakila na noda iVakaraitaki o Jisu na vakacegu dina ni cakava na lomai Tamana. (Joni 4:34) A vakavulici ira gona na nona imuri ni na rawati na vakacegu dina ke da vakaitavi ena cakacaka ni noda qaravi Jiova. Eda lomavakacegu nida vakaitavi ena cakacaka e vakadonuya o Jiova. Nida solia noda gauna, igu kei na noda iyau meda vukei ira tale eso eda na marau.—Caka. 20:31, 35.
3. Na marau cava eda na vakila nida vakaitavi vakalevu ena cakacaka vakavunau?
3 Na levu ni gauna eda vakaitavi kina ena cakacaka vakavunau eda marautaka tale ga nida tekivutaka da qai vakavulica e dua ena iVolatabu. Era sega ni kauaitaka e levu na ka eda tukuna, ia nida lako wasoma ena cakacaka vakavunau qai maqosa noda veivakavulici ena veisau na noda rai me baleta na yalava. O ira na painia me dua na yabaki era rawa ni vakayagataka na veika era vulica ena Vuli ni Painia e dau caka. (2 Tim. 2:15) Noda gugumatua ena cakacaka vakavunau, eda sa teivaka tiko na sore ni ka dina ena vua ena dua na gauna mai muri.—Dauv. 11:6.
4. Na cava mera vakasamataka na itabagone sa vakarau cava nodra vuli?
4 iTabagone: Sa voleka ni oti nomu vuli ena sekeniri, o bau vakasamataka vakabibi na veika mo cakava ena veigauna sa tu mai liu? Ena gauna qo e levu na cakacaka ni vuli o ogaoga kina. Ia vakacava ke sa vakarau cava nomu vuli? E ka vakayalomatua mo masulaka nomu isausau mo dua na painia mai na nomu saga na cakacaka saumi. E levu na ka o na vulica—nomu vunau vei ira na duikaikai, o na vosota eso na ituvaki dredre, bucina na lewa matau, ena vinaka tale ga na ivakarau nomu veivakavulici—ena yaga qori ena nomu bula taucoko.
5. E rawa ni veiuqeti vakacava ena cakacaka vakapainia o ira na itubutubu kei na ivavakoso?
5 Ra itubutubu oni solia tiko nomuni vinaka moni tuberi luvemuni mera veiqaravi vakatabakidua? Nomuni veivakauqeti kei na ivakaraitaki vinaka ena uqeti ira mera vakaliuca na Matanitu ni Kalou. (Maciu 6:33) O Ray a tekivu painia ni se qai yabaki 18 ni biu vuli oti ga, a nanuma lesu: “E tukuna o Tinaqu ni veivakacegui dina na cakacaka vakapainia.” E rawa ni vakauqeta na cakacaka vakapainia na ivavakoso ena nodra vosa kei na nodra veitokoni. A tukuna o Jose, mai Sipeni: “E raica na neitou ivavakoso ni cakacaka vinaka duadua vei keimami na itabagone na painia. Na veika era tukuna, nodra veivakayaloqaqataki kei na nodra veivuke e uqeti au meu painia.”
6. Na cava eda rawa ni cakava ke sega ni lomada ena gauna qo na cakacaka vakapainia?
6 Valuti na Rai Cala: Ia vakacava ke o tukuna, ‘E sega ni lomaqu meu painia.’ Ke va qori na nomu rai, masulaka vei Jiova, qai tukuna vua, ‘Au sega ni vakabauta ni na rawa meu painia, ia au via vakamarautaki kemuni.’ (Same 62:8; Vkai. 23:26) Mo qara nona veidusimaki ena nona Vosa kei na nona ivavakoso. Levu na painia tudei era “tovolea” na cakacaka vakapainia ena nodra painia veivuke, na marau era vakila ena gauna qori e uqeti ira mera sauva na cakacaka vakatabakidua.—Same 34:8.
7. Na cava mo cakava ke o nanuma ni o na sega ni rawata na 70 na aua ni cakacaka?
7 Ia vakacava ke o nanuma ni o na sega ni rawata na 70 na aua ni cakacaka e veivula? O rawa ni veivosaki kei na dua na painia a va tale ga qori nona nanuma. (Vkai. 15:22) Vola e vica na ituvatuva ni ka o rawa ni cakava. O na raica ni sega ni dredre ke o volia na gauna mai na veika tawayaga qai vakayagataka ena cakacaka vakavunau.—Efeso 5:15, 16.
8. Na cava meda dikeva wasoma kina na keda ituvaki?
8 Vakasamataka Vinaka na Kemu iTuvaki: E dau veisau na keda ituvaki. Ni toso na gauna ena vinaka mo vakasamataka na kemu ituvaki. Me kena ivakaraitaki, o sa vakarau vakacegu mai na nomu cakacaka? A tukuna o Randy, a vakacegu mai na nona cakacaka: “Noqu cakava qo e rawa kina me keirau painia tudei vakaveiwatini, keirau rawa ni veiqaravi tale ga ena vanua e gadrevi vakalevu kina na cakacaka. E sega ni wiliki rawa na veivakalougatataki au vakila ena noqu vakatulewa, na veivakalougatataki levu duadua, na vinaka ni noqu lewaeloma.”
9. Na cava era rawa ni vakasamataka na veiwatini?
9 Nira dikeva vinaka na kedra ituvaki eso na veiwatini era raica ni sega ni gadrevi mera cakacaka saumi ruarua. De dua ena vinakati mera vakarawarawataka nodra bula, ena yaga na sasaga qori. O John, a biuta nona cakacaka saumi o watina me rawa ni vakalevutaka nona cakacaka vakavunau, e tukuna: “E vakacegui au dina noqu kila ni ogaoga o watiqu ena cakacaka vei Jiova e veisiga.”
10. Na cava ena uqeti keda meda painia?
10 iVakaraitaki ni Loloma kei na Vakabauta: Na cakacaka bibi duadua e lesia vei keda o Jiova na cakacaka vakavunau. Sa vakarau vakarusai na ituvaki makawa qo, o ira ga na masuta na yaca i Jiova era na vakabulai. (Roma 10:13) Na noda lomani koya kei na noda vakavinavinakataka na veika e cakava ena vukuda ena uqeti keda meda cakava na ilesilesi a tukuna o Luvena, meda gumatua ena vunau. (Maciu 28:19, 20; 1 Joni 5:3) Kuria qori, noda vakabauta nida sa bula tu ena iotioti ni veisiga ena uqeti keda meda vakaitavi vakalevu ena cakacaka vakavunau ni se kena gauna, sega ni noda vakayagataka vakalevu na vuravura.—1 Kor. 7:29-31.
11. Meda raica vakacava nona tukuna e dua ni rawa nida painia?
11 Na painia tudei e sega wale ga ni dua na ituvatuva vakarautaki meda vakaitavi kina vakalevu ena cakacaka vakavunau; qo e tiki sara ga ni noda sokalou. Koya gona, ke dua e tukuna ni o rawa ni painia, vakavinavinakataki koya. Vakasamataka vakabibi qai masulaka tale ga na sala mo rawa ni tomani ira kina na vakaitavi tiko ena cakacaka veivakacegui qo.
[Caption on page 4]
Ra itubutubu oni solia tiko nomuni vinaka moni tuberi luvemuni mera veiqaravi vakatabakidua?
[Caption on page 5]
Na cakacaka bibi duadua e lesia vei keda o Jiova na cakacaka vakavunau.