Saga Mo Bulabula Tiko ga Vakayalo
1 E usutu ni Soqo ni Tikina sa roro tiko mai na “Dauvunau Gugumatua ni Matanitu ni Kalou.” Oqo e dua tale na gauna vinaka meda vakabulabulataki kina vakayalo. Qai vakarautaki sara ga na soqo oqo me vakaukauataki keda ena “vakabauta kei nai vakavuvuli vinaka.” (1 Tim. 4:6) Ena vukei keda na soqo ni tikina oqo meda toro voleka vei Jiova. O koya gona, meda vakanamata ina ivakasala kei na vosa ni veivakayaloqaqataki ena talaucaki mai ni kena inaki me vukei keda meda tudei tiko ga nida sotava na veika dredre. E yalataka o Jiova: “Au na vakavulici iko ka vakatakila vei iko na sala mo lako kina: ka’u na rai tiko vei iko ka tuberi iko.” (Same 32:8) Sega li nida marau ni dau tu vakarau o Jiova me vakasalataki keda vakayalololoma? Meda raica mada oqo e so na ka e rawa nida cakava me yaga sara kina vei keda na veika ena cauraki ena soqo ni tikina.
2 Bibi Meda Vakarautaka na Lomada: E noda itavi yadua meda vakatawa na lomada. (Vkai. 4:23) Oqo ena vinakati kina na lewa vinaka, kei na noda dikeva tale ga na ka e tiko dina e lomada. Na soqo ni tikina e gauna vinaka meda vakasamataka kina na noda veiwekani kei Jiova, e gauna tale ga meda ‘vakaraica matua kina na vunau ni veisereki.’ E dodonu meda masuti Jiova me dikevi keda, me vakatakila mai ke tiko vei keda e dua “nai tovo ca” meda vakavinakataka, me qai tuberi keda “e na sala ni bula tawa mudu,” kevaka eda vinakata me vakarautaki na lomada me qai ‘tei kina na vosa.’—Jeme. 1:21, 25; Same 139:23, 24.
3 Rogoca, Vakananuma: A kaya o Jisu ni vakacaucautaki Meri ena nona vakarogoca matua nona vosa: “Sa digitaka ko Meri nai votavota vinaka, o koya ena sega ni kau tani mai vua.” (Luke 10:39, 42) Ke da ucui koya ena tikina oqo, eda na sega ni vakalaiva na veika sega na betena me vakaleqa noda vakarorogo. Eda na dabe vakadua da qai vakarogoca vinaka na ka kece e talaucaki mai. Eda na sega ni lai talanoa voli se veilakoyaki ni vakacagau tiko na porokaramu, eda na qarauna tale ga me kua ni vakaleqai ira na vakarorogo na noda talevoni (mobile phone), pager, itaba, kei na vidio ni katokatoni se camcorder.
4 Nida rogo vunau, e vinaka meda vola e so ga na ka ena vakarawarawataka noda nanuma na ulutaga e sereki tiko. E dodonu me rawarawa noda sema na ka vou eda rogoca kei na ka eda sa kila tu. Oqo ena vakarawarawataka noda taura kei na noda nanuma na ka e vakamacalataki tiko. Nida raica lesu na ka eda vakavola, me noda inaki mada ga meda raica se tara vakacava noda bula. E rawa gona nida dui tarogi keda vaka oqo: ‘Ena tara vakacava noqu veiwekani kei Jiova? Na veisau cava ena vinakati vei au? Au na vakayagataka vakacava na itukutuku oqo ena noqu veimaliwai? Au na vakayagataka vakacava ena noqu cakacaka vakaitalatala?’ Meda dau veivosakitaka kei ira tale e so na tikina e tarai keda vakalevu. Ena sala ga oqo eda na ‘tugana kina i yaloda’ na vosa i Jiova.—Vkai. 4:20, 21.
5 Meda Bulataka Sara na Ka Eda Vulica: E kaya e dua na tacida a tiko ena dua na soqo ni tikina: “E tarai keda yadua sara ga na porokaramu, e uqeti keda meda dui dikeva na lomada, noda vuvale, meda dau veivukei tale ga vakayalo. E uqeti au meu kua ni guilecava na noqu icolacola, oya meu dau vukei ira ena ivavakoso.” Levu tale beka ga vei keda e vaka oya na nodra nanuma. Ia, e sega ni veirauti meda vakila wale ga nida vakayaloqaqataki se vakabulabulataki ni oti e dua na soqo ni tikina. A kaya o Jisu: “Kevaka dou sa kila na veika oqo, dou sa kalougata kevaka dou sa kitaka.” (Joni 13:17, neitou na matanivola kala.) E dodonu meda bulataka sara ga na tikina eda raica ni ganiti keda. (Fpai. 4:9) Sala sara ga oqo sa da na qai bulabula dina kina vakayalo.
[Kato ena tabana e 5]
Dau Vakananuma na Ka O Rogoca:
■ E tara vakacava noqu veiwekani kei Jiova?
■ Ena tara vakacava noqu veimaliwai kei ira tale na so?
■ Au na vakayagataka vakacava ena noqu bula kei na cakacaka vakaitalatala?