Vakalougatataki ni O Gumatua ena Kakaburaki
1 O keda kece eda vakanamata tu ena vakayacori ni yalayala lagilagi e koto ena Vosa ni Kalou. Ena gauna mada ga oqo, e vakarautaka tu o Jiova e levu na ka ni veivakalougatataki meda marautaka. Ia, me yaga vakalevu vei keda ena vakatau sara ga mai na levu ni ka eda cakava. Me vaka ga e kaya na yapositolo o Paula, “ko koya sa kaburaka vakalevu ena tamusuka talega vakalevu.” (2 Kor. 9:6) Raica mada e rua na sala e dina kina na ivakavuvuli oqo.
2 Noda Cakacaka Vakaitalatala: Levu na ka vinaka eda na sotava nida wasea na itukutuku vinaka vei ira na tamata ena gauna cava ga eda rawa ni vunau kina. (Vkai. 3:27, 28) E ka ni marau ni so era sa gumatuataka tiko nodra kakaburaki nira vakalevutaka nodra cakacaka vakaitalatala, wili kina na painia veivuke kei na painia tudei. O keda kece eda rawa ni kakaburaki vakalevu ke da yalodina ni lesuvi ira kece na tataleitaki da qai sureti ira mera vuli iVolatabu ena gauna veiganiti. (Roma 12:11) Nida cakacaka vagumatua, eda na vakayaloqaqataki da qai marautaka vakalevu noda cakacaka vakaitalatala.
3 Tokona na Matanitu ni Kalou: E tukuna tiko e ke o Paula noda ‘kakaburaki vakalevu’ nida solika. (2 Kor. 9:6, 7, 11, 13) Edaidai, eda rawa ni vakayagataka noda kaukaua kei na iyau meda tokona kina na Matanitu ni Kalou. Eda rawa ni vukea na tara ni Kingdom Hall kei na Assembly Hall. Eda rawa tale ga ni bole meda samaka da qai vakavinakataka na veivanua ni sokalou dina oqo. Kena ikuri, eda rawa ni cautaka na ilavo me baleta na veika vakailavo ni ivavakoso kei na cakacaka sa vakayacori tiko e vuravura taucoko ena vunautaki ni Matanitu ni Kalou kei na nodra vukei e so mera tisaipeli. Nida dui cakava noda itavi yadudua, eda marau ni raica nona vakalougatataka o Jiova na cakacaka lesi vakalou oqo!—Mala. 3:10; Luke 6:38.
4 E uqeti keda na Vosa ni Kalou meda ‘caka vinaka, meda vutu ni cakacaka e yaga, meda lomasoli, meda via veivuke.’ Na noda muria na ivakasala oqori, eda marautaka kina na veivakalougatataki levu ena gauna sara ga oqo. Ena gauna vata oqori, eda sa “binia tu me [noda] na yavu ena yaga e na gauna e muri [kei na] bula dina” me yaco mai.—1 Tim. 6:18, 19.