‘Mo Lomasoli, Vakarau Tu Mo Vota Vei Ira na Tani na Ka’
1 E vakasalataki Timoci na yapositolo o Paula ena vica vata na senitiuri sa oti me uqeti ira na tacina vakayalo “me ra caka vinaka, me ra vutuniyau e na cakacaka vinaka me ra lomasoli ka yalo vinaka ka vakarau tu me ra vota vei ira na tani na ka e tu vei ira.” (1 Tim. 6:18, VV) E vakadreti ira tale ga na Iperiu lotu Vakarisito o Paula mera kua ni guilecava “na caka vinaka kei na dausoli ka.” (Iper. 13:16) Na cava e vola kina na ivakasala oqo? Baleta ni kila ni na tiko “nai ukuuku, kei na vakarokoroko, kei na vakacegu, vei ira kecega sai valavala vinaka.”—Roma 2:10.
2 O Jiova na iTaukei ni ka kece ga baleta ni bulia na ka kece ga. (Vkta. 4:11) Eda vakavinavinakataki koya dina ena vuku ni nona isolisoli vei keda. Levu sara nikua era sega ni dau vakavinavinaka vua na Kalou Cecere, ia e vakatara tiko ga o koya me tauca na kawatamata kece na yaga ni nona isolisoli e rawa tiko kina na bula. (Maciu 5:45) Bau solia sara ga na Luvena lomani me isoro meda rawata kina na bula tawamudu. Ke sa vaka oya na noda lomani, sa dodonu ga meda vakaraitaka noda vakavinavinaka ena noda dau lomasoli, se vakaevei?—2 Kor. 5:14, 15.
3 Na Cava Beka Meda Vota? E kilikili meda vakayagataka na cava ga e tu vei keda ena sala ena marau kina na Kalou. Meda tokona mada ga vakayago, vakayalo tale ga na cakacaka e vuravura raraba me baleta na Matanitu ni Kalou. Na itukutuku vinaka e iyau talei duadua e rawa ni taukena e dua, baleta ni yavutaki sara tiko ga kina na ‘kaukaua ni Kalou me veivakabulai.’ (Roma 1:16) Mai na noda lomasoli ni vakayagataka noda gauna kei na noda iyau e veivula meda vakaitavi kina ena cakacaka ni vunau kei na veivakavulici, de dua eda na vota rawa kina na iyau vakayalo oqo vua e dua, me tini sara ena nona rawata na bula tawamudu.
4 E marau dina o Jiova ke da vukei ira e lailai vei ira na ka. Sa yalataka tu ni na qai vakalougatataki keda kina qai vakadreti keda tale ga ena tikina oqo: “Sa sega ni yaga nai yau e na siga ni cudru: ia nai valavala dodonu sa ia na veivakabulai mai na mate.” (Vkai. 11:4; 19:17) Noda tokona vakayago na cakacaka ni Matanitu ni Kalou kei na noda vunautaka yani ena kena levu duadua eda rawata na itukutuku vinaka, oqori erau sala uasivi meda vakaraitaka kina nida dau lomasoli dina, nida dau tu vakarau tale ga meda vota yani na ka.