Vakasoqoni Vata Mai na Tamata Era Duivosavosa

¹ Sa vakayacori tiko na Vosa ni Kalou! Era sa ciqoma na “tamata era duivosavosa mai na veivanua kecega” na sokalou dina. (Saka. 8:23) Era veivuke vakacava na iVakadinadina i Jiova vei ira na lewe ni ‘veivanua kece, na veimataqali, kei na duivosavosa’ mera savasava ena mata i Jiova, ra qai bula tale ga mai na “veivakararawataki levu”?​—Vkta. 7:9, 14.

² Veivukei na iSoqosoqo ni Kalou: E sa tuvanaka na iLawalawa Dauvakatulewa me vakarautaki na ivola vakaivolatabu ena rauta na 380 na vosa mera kila kina vakavinaka na tamata kece ga e vuravura na bibi ni itukutuku vinaka. E dua toka na cakacaka vakaitamera na kena vakarautaki qai tabaki ina levu na vosa na veivola oqo. Era kumuni mai na ilawalawa dauvakadewa qai soli vei ira na veivuke mera vakadewataka na noda ivola ena veivosa kece oqori, vaka kina na kena tabaki qai vakau yani. Ia, na itavi bibi era cakava tiko na dautukutuku ni Matanitu yadua, oya nira tukuna yani vei ira na tamata na itukutuku ni veivakabulai mai na iVolatabu.

³ Ciqoma na Ka ni Bolebole: Era kunei ena levu na vanua e vuqa na tamata era vosataka na vosa ni veivanuatani. Mera vukei gona, e levu na tamata ni Kalou era sa vuli vosa vakajaina, vakarusia, vakasipeni, se so tale na vosa e kilai levu ena nodra yalava. E so era sa vulica tiko na vosa vagalu. E Mereke mada ga e tiko kina e rauta ni 2,900 na ivavakoso qai 240 na iwasewase era vunau tiko ena 38 na vosa, e sega ni wili kina na vosa vakavalagi. Era ciqoma kina na ka dina mai na iVolatabu e so era a se bera sara tu ga ni rogoca na veika baleti Jiova se mera a bau kila na Vosa ni Kalou.​—Roma 15:21.

⁴ E rawa beka nida gumatua ni tukuna na itukutuku vinaka vei ira na tamata ena noda yalava era lako mai na duidui vanua? (Kolo. 1:25) E levu na ivavakoso sa ra tuvanaka mera lai vunau ina itikotiko era tiko kina na vulagi. Era vulica mada e liu na dautukutuku e so na nodra vosa me rawa nira vunau ena vosa rawarawa ga me vaka oqo: “Ni bula vinaka, qo e dua na itukutuku vinaka me nomuni. [Oti qai solia e dua na ivolacebaceba e tabaki ena nona vosa.] Ni moce.” O Jiova e vakalougatataka dina na itekitekivu leleka vaka oya!

⁵ Na itukutuku ni Matanitu ni Kalou e uqeti ira kece na tamata e duidui na ivakarau ni nodra bula kei na nodra vosa. Meda vakayagataka mada ga na gauna veiganiti kece meda vosa kina vei ira.