Soli ni iVola ena Yalava Era Tu Kina na Duikaikai
1. Na cava e vinaka kina me tu ena so na ivavakoso na ivola ena so tale na vosa?
1 Levu na vanua eda vunau kina nikua era sa tawana mai na duikaikai. Levu na duikaikai oqo e totolo sara nodra vulica na ka dina nira vuli ga ena nodra vosa. Na ituvatuva cava e sa tiko me vakarautaki kina na ivola ena nodra vosa na duikaikai oqo?
2. Na cava ena gadrevi vei ira na ivavakoso era veisolitaka tiko e dua vata ga na mape?
2 Gauna me Soli Kina na iVola: Ke qarava vata tiko e dua na yalava e vica na ivavakoso duivosavosa, me na raica na ilawalawa qase ni ivavakoso kece—ena nodratou veivosaki na ivakatawa ni cakacaka—e dua na ituvatuva maqosa mera qaravi vinaka kina na tiko ena yalava. Ena okati beka kina nona solia yani e dua na mape e dua na ivavakoso ena gauna e cakacakataka oti kina me lai cakacakataka na ivavakoso e vosataka e duatani tale na vosa, oti me qai vakasuka tale. Me rau dau veisolitaka tiko na mape oqo. Nira cakacaka vakavunau na dautukutuku ena mape vaka oqo, era na kauai ga vakalevu vei ira era vosataka na vosa ni nodra ivavakoso, na vosa Vakaviti beka, se vosa Vakavalagi/Vakaidia, ra qai solia ga na ivola ena vosa e vakayagataka nodra ivavakoso. Ia, nira vunau tawalokuci na dautukutuku se ra vunau ena vanua e lakova na lewenivanua raraba, e rawa nira solia na ivola ena vosa e dui ganiti ira na lewenivanua.—Raica na Kato ni Taro ena Noda Cakacaka Vakaitalatala ni Okotova 1990.
3. Na ituvatuva cava e sa vakarautaki mera qaravi kina na vosataka na vosa tale e so ena yasayasa o Suva?
3 Sa vakarautaki e Suva e so na iwasewase lalai me qaravi ira era vosa Vakilivati, Vakarotuma, kei na vosa Vakatuvalu. O ira era vosataka na vosa oqo ena yasayasa o Suva e sa dodonu me volai na yacadra kei na nodra itikotiko ena fomu vakarautaki. Ena qai vakau na fomu ina ivavakoso e qarava tiko na dui iwasewase lalai, vakarautaki tale ga o ira mera veisikovi. Ia, me na kau tiko mada ga vei ira na ivola ena nodra vosa me yacova ni sa vakadeitaki ni dua e kila nodra vosa sa lai raici ira.
4. iTuvaki cava sa rawa ni maroroya kina e dua na ivavakoso na ivola e volai ena so tani tale na vosa?
4 iTuvaki e Yaga Kina me Maroroya na iVavakoso e so na iVola: Na cava me caka ke ra tu ena yalava e levu era vosataka e dua na vosa e sega na kena ivavakoso? Ena ituvaki vaka oqo, sa rawa ni maroroya na ivavakoso na ivola e so e tu ena vosa oqori me vaka na ivolacebaceba, brochure na Loma ni Kalou kei na iTokani ni Kalou, vaka kina na ivola na Kila. Sa rawa nira solia na dautukutuku na ivola oqo ke ra sotavi ira na rawa ni wilika.
5. Na cava me caka ke sega ena ivavakoso na ivola mera wilika ena nodra vosa na tataleitaki?
5 Otataki ni iVola: Ke sega ena ivavakoso na ivola e tabaki ena nona vosa e dua e tataleitaki, na cava me caka? Me lai raici koya e qarava na ivola o koya na dautukutuku me kila kina se ivola cava sa tu ena vosa oya e rawa ni otataki ena ota ni ivavakoso e tarava.
6. Na cava na noda inaki ena noda vakarautaka na ivola vakaivolatabu?
6 Meda vakayagataka vinaka mada ga na ivola vakaivolatabu mera vukei kina “na tamata kecega,” veitalia se vosa cava era vosataka, ‘mera mai kila na ivakavuvuli dina, mera vakabulai.’—1 Tim. 2:3, 4.