Porokaramu Vou ni Soqo ni Tabacakacaka
1 Bibi meda nuitaki Jiova ke da vinakata me dei na noda vakabauta ena vuravura yamekemeke oqo. Eda na vakaraitaka beka vakacava oqori ena noda bula ni veisiga? Ena yaga vakacava ena noda bula yadudua kei na noda bula vakavuvale na noda nuitaki Jiova? Eda na vorata rawa kina vakacava na vuravura i Setani? Na taro oqo ena saumi ena porokaramu ni soqo ni tabacakacaka me baleta na yabaki vakacakacaka ni 2003. Na kena usutu, “Nuitaki Jiova, Caka Vinaka.”—Same 37:3, NW.
2 Eda sega ni nuitaki Jiova ena so ga na gauna se nida sa sotava sara na leqa levu. Eda nuitaki koya ena veisiga kece ni noda bula. E vakabibitaki na tikina oqo ena itekitekivu ni vosa ena noda soqo sigarua oya, na kena ulutaga, “Nuitaki Jiova ena Veigauna Kece Ga.” (Same 62:8, NW) E wasei vakava na vosa veitaravi e kena usutu, “Meda Vakavotuya Nida Nuitaki Jiova.” Ena vakamacalataka na sala meda qara kina da qai bulataka sara na ivakavuvuli yavutaki vakaivolatabu ena vinaka kina noda bula vakawati, na sala me wali kina na leqa e tubu mai na loma ni vuvale, kei na kena qarai na veika vakayago e ganiti keda.
3 Dau via lewa na noda vakasama na vuravura i Setani me baleta na ka e dodonu kei na ka e cala, meda veilecayaki kina da qai sega ni vakaduiduitaka rawa na ka e bibi mai na ka e sega ni bibi. (Aisea 5:20) Na vosa “Qarauna na Veika e Tawayaga” kei na “Cata na Ca—Dau Cakava na Ka e Vinaka” ena vakataudeitaka na yaloda meda muria dei tiko ga na ivakatagedegede uasivi i Jiova.—Emosi 5:14.
4 Ni sa na muduka o Jiova na vuravura ca nikua, e bibi mera nuitaki koya matua na nona tamata. E kau cake mai na tikina oqo ena ivunau soqovi levu, “Sa Voleka Nida Vakabulai Mai na Veileqa ni Vuravura.” Oti oqori, eda na qai sureti meda dikevi keda yadua ena vosa e kena ulutaga, “O na Vakadonui Beka Mo Lewe ni Matanitu ni Kalou?” E tini na porokaramu ena veivakadreti oqo, “Nuitaka na Veika e Yalataka o Jiova.”
5 Dua na ka eda dau vakanamata kece kina ena soqo lelevu na ivunau ni papitaiso. O koya e via papitaiso me tukuna totolo vua na ivakatawa daulewa, me rawa ni tuvai kina na veika e gadrevi.
6 Ena gauna ni veilecayaki oqo, o Jiova duadua ga na ivurevure ni noda vakanuinui vinaka kei na noda ivakadei. (Same 118:8, 9) Meda tiko mada ga ena siga taucoko ni soqo oqori ni na dei matua kina na noda nuitaki koya mai na veika eda rogoca.