Porokaramu Vou ni Soqo ni Tabacakacaka

Eda kila ni sa dodonu ga meda lomana na Kalou o Jiova, da qai qaravi koya vakatabakidua. Ia, e saga o vuravura me vakamuai keda tani mai na noda veiwekani voleka tiko ga kei koya. (Joni 17:14) Me rawa ni vaqaqacotaki tiko ga na noda lomani Jiova, me vakaukauataki keda ena noda vorata na veika e tu e vuravura e rawa ni vakaleqa na noda bula vakayalo, ena usutu tiko ni porokaramu vou ni soqo ni tabacakacaka ni yabaki vakacakacaka ni 2001 na “Lomana na Kalou​—Sega ni Veika ni Vuravura.”​—1 Joni 2:​15-​17.

Ena uqeti keda meda vunautaki Jiova na titobu ni noda lomani koya. Ia, e sega ni ka rawarawa vei ira e levu na tamata ni Kalou na cakacaka vakavunau. Ena ulutaga “Uqeti Keda Meda Cakacaka Vakaitalatala na Noda Lomana na Kalou,” mai rogoca na sala era valuta kina na mamadua kei na leqa tale e so e levu me rawa nira vakaitavi kina vakalevu ena cakacaka oqo.

E cakayaco vakacava vei keda na kena torosobu tiko ga na bula ni vuravura oqo? E so na ivalavala era a kilai tu e liu me ca, sa ciqomi raraba tu nikua. Na vunau “Era Cata na Ka Ca o Ira na Lomani Jiova,” kei na vosa veitaravi, “Na Veika ni Vuravura​—Na Cava na Nomu Rai?” ena vakadeitaka e lomada meda vakuakua ina gagadre ca.

Ena okati ena porokaramu na Koronivuli ni Vuli iTalatala Liutaki Vakalou kei na Soqoni ni Cakacaka me ivakaraitaki ni sala e dodonu me rau vakayacori kina, vaka tale ga kina na ivakamacala lekaleka ni ulutaga ena vulici tiko ena Vale ni Vakatawa ena macawa oya. Na vunau soqovi levu, “Na Sala e Vakamalumalumutaki Vuravura Kina na Loloma Kei na Vakabauta,” ena uqeti keda meda vakadamurimuri Jisu ena noda vorata na idre kei vuravura. (Joni 16:33) Sureti koya drau vuli iVolatabu me tiko tale ga kina. Oni kerei o kemuni na via papitaiso mo ni veitaratara rawa kei koya na ivakatawa daulewa me tuvanaki na ka me na vakayacori.

Ena vakabibitaki ena soqo ni tabacakacaka oqo se me yavutaki sara mada e vei na noda loloma me rawa ni qai vakalougatataki keda kina o Jiova. Kua ni calata e dua na kena iwase!