Meda Semati ka Vauci Vata

¹ Eda dau qoroya na buli vakamatau ni yagoda, se sega beka? (Same 139:14) E semati qai cakacaka vata na tikiniyagoda yadua. Ia oqo sara ga na ka e vakayagataka na Vosa ni Kalou me vakatauvatana kina na ivavakoso lotu Vakarisito. Ena ruku i koya na iLiuliu, o Karisito, era “sema vata . . . , ka vauci vata” na lewe ni ivavakoso qai “yaga nai sema yadua.” (Efeso 4:16a) E rawa kina vei Jiova me vakayagataka na nona isoqosoqo tamata duavata me nona liganicakacaka, qai vakasakiti na ka eda rawata.

² Vei ira na lewe ni ivavakoso ni imatai ni senitiuri era a “lomavata” ena nodra veivuketaka na nodra bula vakayago, vakayalo tale ga. (Caka. 2:44-47) Ena veivuke i Jiova, e sega wale ga nira a sotava, ia era vorata vata na veivakacacani mosimosi a caka vei ira. (Caka. 4:24-31) Era vunautaka na itukutuku ni Matanitu ni Kalou ena veivanua era lakova, e robota kina na vuravura ena gauna oya na itukutuku vinaka. (Kolo. 1:23) Ena noda gauna, e tautauvata tale ga na cakacaka eda vakayacora tiko ena duavata na ivavakoso lotu Vakarisito, ia sa rabailevu sara na ka eda cakava. Na cava soti e vu ni duavata oqo?

³ Vakaduavatataki Keda na iVakavuvuli Vakalou: Ena veiyasa i vuravura, e vakaduavatataki keda na noda sokalou. E rawa vakacava? Oya, ena noda ciqoma na idewadewa rairai e vakayagataka o Jiova me takivaka mai na keda “kakana” vakayalo “e na kena gauna dodonu.” (Maciu 24:45, VV) Eda vakamareqeti ira tale ga na ‘isolisoli tamata’ e lesia mai o Jiova mera veivakavulici ena ivavakoso. Nida ciqoma ena yalomalumalumu na ituvatuva e vakarautaka mai oqo o koya meda vakani kina vakayalo, ena tubu na noda kila na Vosa ni Kalou da qai uqeti vakatautauvata meda vakadamurimuri Jisu, meda nona tisaipeli. O koya gona, meda vulica tiko ga na Vosa ni Kalou, da qai saga ena noda igu meda “lomavata e na vakabauta.” (Efeso 4:8, 11-13) O sa cakava tiko beka na nomu itavi mo vaqaqacotaka na duavata vakayalo oqo, ena nomu dau wili iVolatabu e veisiga?

⁴ Vakaduavatataki Keda na Veimaliwai Vakarisito: Na loloma e vakavuna meda veimaliwai voleka kina ena noda soqoni vakarisito. Eda “veivakananumi” nida tiko ena soqoni. (Iper. 10:24, 25) E macala ni sega ni rauta meda kilai ira vakacaca tu ga na tacida, ia meda kilai ira vinaka, me tiko vei keda na rai i Jiova, oya, ni o keda na nona tamata eda ka domoni vua. (Akeai 2:7) Nida rogoca na nodra cauraka na tacida na nodra vakabauta, e vakatitobutaka noda lomani ira, e qaqaco vinaka kina na noda duavata. O kilai beka ni o dua na dau tiko wasoma ena soqoni ni ivavakoso?

⁵ Eda Veitokani ena Cakacaka Vakavunau: E dua tale na ka e vakaduavatataki keda ena noda cakava na inaki ni Kalou, oya, na noda veitokani kei ira na tacida ena vunautaki ni itukutuku vinaka. Na yapositolo o Paula a dau taleitaki ira vakalevu na nona “i tokani e na cakacaka ni matanitu ni Kalou.” (Kolo. 4:11, VV) Nida veitalanoataka na veika eda sotava ena vunau da qai veivukei nida dau cakacaka vata, e sega wale ga nida talairawarawa tiko ina noda ilesilesi vakarisito, e vaqaqacotaka tale ga na noda ivau ni duavata.​—Kolo. 3:14.

⁶ Vakaduavatataki Keda na Yalo Tabu: E vakalougatataki keda tale ga o Jiova ena nona solia mai na yalona tabu nida saga meda cakava na nona inaki. Oqo na ka e vukei keda meda walia rawa kina na duidui e kune ena keda maliwa, me rawa nida taqomaka na noda tiko ena yalovata. (Same 133:1) E uqeti keda meda ‘gumatua sara meda maroroya na duavata sa vakavuna na yalo tabu, nida sa vauci vata ena veivinakati.’ (Efeso 4:3, VV) E rawa gona nida vakaitavi yadua ena kena vaqaqacotaki tiko ga na duavata e kune ena keda maliwa na tamata ni Kalou, ke da saga meda vuataka na vua ni yalo tabu ena noda veitaratara.​—Kala. 5:22, 23.

⁷ O koya gona, nida duavata ena veiqaravi ena ruku ni veiliutaki i Karisito, e “tubucake [kina] na yago taucoko, ka [qai] tara cake e na loloma.” (Efeso 4:16b, VV) Kena ilutua, e lagiti kina o Jiova, “na Kalou ni veivakacegui.”​—Roma 16:20.