Na Duavata Dina Vakarisito—Ena Rawati Vakacava?
1 Na cava e vakaduavatataki ira e sivia na ono na milioni na tamata mai na 234 na vanua era vosataka e rauta ni 380 na vosa? Na nodra sokalou vua na Kalou o Jiova. (Maika 2:12; 4:1-3) Era dui vakadinadinataka sara ga na iVakadinadina i Jiova kece ni sega ni ka ni tadra wale ga na duavata dina vakarisito. Nida lewe ni “dua bau na qele ni sipi” ena ruku ni veiliutaki ni “dua bau nai vakatawa,” sa dei tu na lomada meda vorata na yalo ni veivakaduiduitaki ena vuravura oqo.—Joni 10:16; Efeso 2:2.
2 E inaki tudei ni Kalou mera duavata ena sokalou dina na nona ibulibuli kece. (Vkta. 5:13) Ni kila na kena bibi, a masulaka sara ga o Jisu me ratou duavata na nona imuri. (Joni 17:20, 21) E rawa vakacava nida dui vakaitavi ena kena vakataudeitaki na duavata ena ivavakoso vakarisito?
3 Na Kena Rawati: Ena sega ni rawati na duavata vakarisito ke sega na Vosa ni Kalou kei na yalona tabu. Na noda vakaitovotaka na ka eda wilika ena iVolatabu eda sa ciqoma sara tiko ga kina ena noda bula na yalo tabu ni Kalou. Eda na ‘maroroya kina na duavata sa vakavuna na Yalo Tabu nida sa vauci vata ena veivinakati.’ (Efeso 4:3, VV) Ena uqeti keda meda dau veivosoti vakayalololoma. (Kolo. 3:13, 14; 1 Pita 4:8) O dau tokona na veivakaduavatataki ena nomu dau vakasamataka vakatitobu na Vosa ni Kalou ena veisiga?
4 E vakaduavatataki keda tale ga na noda vunau kei na noda vukea tale e so mera tisaipeli. Nida vakaitavi kei ira e so tale ena cakacaka vakavunau ‘ena vuku ni itukutuku vinaka,’ eda sa “veitokani sara kina kei ira e na cakacaka dina.” (Fpai. 1:27; 3 Joni 8, VV) Nida vakayacora oqori ena vaqaqacotaka noda duavata ena ivavakoso. Vakacava mo sureta e dua drau se sega ni cakacaka vakavunau vata ena dua na gauna tiko ga oqo mo drau cakacaka vata ena macawa oqo?
5 Eda kalougata nida lewena na isoqosoqo e kune kina na duavata e vuravura raraba edaidai! (1 Pita 5:9) Se qai oti ga oqo na nodra vakadinadinataka na duavata oqori e vica na udolu ena Soqo ni Veimatanitu e kena usutu na “Vakalagilagia na Kalou.” Meda cuqena mada ga na veivakaduavatataki totoka oqo ena noda wilika e veisiga na Vosa ni Kalou, noda walia na duiyaloyalo ena loloma, kei na noda vunautaka yani na itukutuku vinaka ena “lomavata.”—Roma 15:6.