“ Moni Maroroya na Duavata e Vakavuna na Yalo Tabu”
E UQETI ira na lotu vaKarisito e Efeso na yapositolo o Paula me ‘laurai na nodra loloma ena nodra dauveivosoti. Mera gumatua mera maroroya na duavata e vakavuna na yalo tabu, nira vauci vata ena veiyaloni.’—Efeso 4:2, 3.
Na noda “duavata” e “vakavuna na yalo tabu.” Kena ibalebale ni qori na vua ni yalo tabu ni Kalou. Ia me vaka e tukuna o Paula, e vinakati meda maroroya na duavata qori. O cei e nona itavi qori? O keda yadudua sara ga na lotu vaKarisito meda “maroroya na duavata.”
Kaya mada ke dua e lolomataka vei iko e dua na motoka vou. O cei me raica na kena qaravi? E matata tu ga na kena isau. Ke ca na motoka, o na sega ni beitaki koya e lolomataka ni o sega ga ni qarava vinaka.
E va tale ga qori na noda duavata vaKarisito, e iloloma ni Kalou. E noda itavi yadua meda maroroya vinaka. Ke da sega ni veiyaloni tiko kei ira na tacida, e bibi meda taroga: ‘Au sa cakava tiko noqu itavi meu maroroya na duavata niu saga me wali?’
“GUMATUA” MO MAROROYA NA DUAVATA
Me vaka e tukuna o Paula, eso na gauna e vinakati na sasaga meda maroroya na duavata e vakavuna na yalo tabu. E rawa ni yaco qori ke vakacudrui keda e dua na tacida. Meda maroroya na duavata, vakacava e tukuni sara meda lai raici koya ena gauna kece meda veivosakitaka na leqa? Sega. Mo taroga: ‘Keu lai raici koya, ena uqeta na duavata se vakavuna ga na duiyaloyalo?’ Eso na gauna e vinaka ga meda raibaleta, se veivosoti.—Vkai. 19:11; Mari. 11:25.
Mo taroga: ‘Keu lai raici koya, ena uqeta na duavata se vakavuna na duiyaloyalo?’
Me vaka e vola na yapositolo o Paula, me “laurai tale ga na nomuni loloma ena nomuni dauveivosoti.” (Efeso 4:2) E kaya e dua na ivola na matavosa qori e rawa ni vakadewataki va qo, meda “ciqomi ira ga.” Qo e kena ibalebale meda ciqoma nira sega ni uasivi na tacida me vakataki keda ga. Io, eda saga kece tiko meda tokara “na tamata vou.” (Efeso 4:23, 24) Ia ena sega ni taucoko sara noda cakava qo. (Roma 3:23) Ke da kila tiko qori, ena rawarawa sara meda vosovoso, meda veivosoti, qori na sala eda na “maroroya” tiko kina “na duavata e vakavuna na yalo tabu.”
Nida dau veivosoti qai guilecava na ka era cakava na tacida, eda na “vauci vata ena veiyaloni.” Na vosa vaKirisi e vakadewataki me “vauci vata” ena Efeso 4:3, e vakadewataki me “ua ni yago” ena Kolosa 2:19. Na ua qori e kaukaua me taura vata na sui. E va tale ga qori na noda veiyaloni kei na noda veilomani vakaveitacini, ena vakavuna meda veivolekati tiko ga ni basika mada ga na duidui.
Ni vakacudrui iko gona e dua na tacida, saga mo yalololoma tiko ga vua, kua ga ni vakalewai koya. (Kolo. 3:12) Nida dau cala kece, eso na gauna o na vakacudruya tale ga eso. Ni o nanuma tiko qori, o na rawa ni “maroroya na duavata e vakavuna na yalo tabu.”