Tekia e So na iSausau Vakayalo
1 E dua dina na itavi dokai meda vakacaucautaki Jiova me tawamudu! Me rawa nida cakava oqori, ena vinakati meda tekia ena gauna oqo e so na isausau vakayalo da qai sasagataka meda yacova. Eda na vakayagataka tale ga kina vakavinaka na noda kaukaua. (1 Kor. 9:26) Na isausau cava o na via rawata?
2 Vuli iVolatabu: O dau vakarautaka na ivola ena vakayagataki ena veisoqoni yadua? Ke vaka kina, o dau vakekeli, o qai vakalewa vakatitobu na veika o vulica? Me kena ivakaraitaki, ni o vakarautaka Na Vale ni Vakatawa ena vulici, se ivola ni Vulivola, o saga beka ga mo toqa rawa na isaunitaro, se o taura na gauna mo wilika kina na veitikinivolatabu era sega ni lavetaki, o qai vakasamataka na yavu ni ivakamacala e soli me isaunitaro? Vakacava mo tekia me nomu isausau mo dau vakekeli me baleta e so na tikina mai na wili iVolatabu vakamacawa ni Koronivuli ni Vuli Vunau? E dina ni na taura na gauna kei na sasaga, ia e ka ni veivakalougatataki vakayalo.—Vkai. 2:4, 5.
3 Soqoni ni iVavakoso: Dua tale na isausau, oya na noda tiko wasoma ena lima na soqoni ni ivavakoso. Na noda yaco totolo yani meda veimaliwai kei ira eda vakabauta vata kei na noda vakaitavi ni lagati na imatai ni sere, da qai masu vata, ena vakaukauataka na veiyaloni ena ivavakoso. De rawa nida saga meda vakamacala ena veigauna kece ni soqoni, da qai vakavinakataka tale ga na iwalewale ni noda ivakamacala. De dua o rawa ni vakamacala ena veiganiti ni tikinivolatabu ena parakaravu kei na veika e veivosakitaki tiko, se vakamacalataka na sala e rawa ni vakayagataki kina na tikina e vulici tiko ena noda bula ena veisiga.—Iper. 10:24, 25.
4 Cakacaka Vakaitalatala: Ena vuavuaivinaka noda cakacaka vakaitalatala ke da tekia e dua na isausau. E tiko beka na nomu iokaoka ni aua ni vunau o dau sauva e veivula? Era kunea e so ni yaga vei ira oqo. Se nomu isausau beka mo vakavinakataka e so na basoga ni nomu cakacaka vakavunau, me vaka na nomu saga mo vakayagataka vakalevu na iVolatabu ina vunau e veivale? Se o saga beka mo toroya cake na vinaka ni nomu caka veisikovi lesu, mo tekivutaka e dua na vuli iVolatabu, se me momona cake na nomu veivakavulici ena vuli iVolatabu?
5 Ra itubutubu, oni sa uqeti ira tiko beka na luvemuni mera tekia na isausau ni veiqaravi vei Jiova? Vukei ira mera raica ni sala levu era rawa ni vakaraitaka kina na nodra vakavinavinaka vei Jiova oya nira cakacaka vaka painia, se lewenivuvale i Peceli.—Dauv. 12:1.
6 Nida vakadikeva na veika eda cakava, da qai tekia na noda isausau vakayalo, da sasagataka sara meda rawata, eda na kunea kina na marau levu ena noda cakacaka vei Jiova, qai vu ni veivakaukauataki vei ira na so tale.—Roma 1:12.