Yaga Vakacava Vei Keda na Koronivuli ni Vuli Vunau?
1 Eda duatani duadua na tamata i Jiova baleta nida vakavulici ena Koronivuli ni Vuli Vunau e vakarautaka o koya. (Aisea 54:13; Joni 6:45) Ia na kena yaga e vakatau sara ga ena noda sasaga yadua. O sa raica beka na yaga ni Koronivuli ni Vuli Vunau ena nomu toso vakayalo?
2 Rogoci na Vakavinavinaka: E levu na ivakatawa ni koronivuli era raica na kena yaga ena nodra cakacaka vakavunau na lewe ni ivavakoso na vulici vinaka ni ivakarau ni vosa. Kuria oya, e raica e dua na ivakatawa ni koronivuli ni nodra sa vakaitavi na vakarorogo ena veivosakitaki ni veitikina bibi ena iVolatabu, e vakaraitaka ni levu era sa muria vinaka tiko na ituvatuva ni wili iVolatabu. Me baleta na itavi ena Vosa Nb. 2, era vakaraitaka e levu na tacida tagane na nodra marautaka nira sa vakarautaka ga na ka mera na wilika, nira sa sega ni vakarautaka tale e dua na ikaunivosa se itinitini ni vosa. Era saga na tacida e lesi vei ira na itavi oqo mera vakavinakataka na nodra wilivola.—1 Tim. 4:13.
3 Yaga Vei Keda Kece: E marautaki dina na saumitaro ena soqoni. (Vkai. 15:23) Na taro ni railesuvi e sa dau vakarautaki rawa tu e vukei keda meda vakavakarau ena soqoni da qai vakaitavi tale ga ena gauna ni railesuvi. Kuria oya, tekivu ena ilavelave ni Vale ni Vakatawa, 1 Janueri, 2004, sa dau tabaki tiko mai na veitikina bibi ena iVolatabu, e salavata sara tiko ga kei na ituvatuva ni wili iVolatabu ni Koronivuli ni Vuli Vunau. Na ulutaga e tabaki oqori e vukei ira e levu me veiuqeti nodra ivakamacala ena gauna e veivosakitaki kina na veitikina bibi ena wili iVolatabu vakamacawa.
4 O ira kece na curu ena koronivuli e nodra itavi dokai mera vakarautaka ra qai solia na nodra itavi. E yaga vei keda na nona veivakacaucautaki na ivakatawa ni koronivuli ena buturara. E yaga tale ga vei ira na gonevuli na nona ivakasala na ivakatawa ni koronivuli vei ira ni cava na soqoni. E yaga dina vakalevu na vakatovotovo e tiko ena ruku ni veiwase kece ena ivola Me Yaga Nomu Curu ena Koronivuli ni Vuli Vunau, e veivosakitaki kina na ivakarau ni vosa.
5 Ke o rogoca e dua na ivakasala yaga se ivakasala vakaivolatabu ena gauna e vakacagau tiko kina na Koronivuli ni Vuli Vunau se ni sa oti, toqa toka ena nomu ivola Vuli Vunau. Vakasamataka na ka o sa vulica, qai raica se vukei iko vakacava ena nomu toso vakayalo na nona veivakavulici na Kalou.