Veivuke ena Kena Gauna Donu

¹ Ni sa raica na yapositolo o Pita ni vinakati mera vakaukauataki na tacina vakayalo, e gu sara ga na yalona me uqeti ira vakayalololoma, me vakayaloqaqataki ira tale ga. (2 Pita 1:12, 13; 3:1) A uqeti ira na sa “rawata na vakabauta” mera toso tiko ga vakayalo mera kua kina ni ‘vucesa se tawavua ena nodra kila na noda Turaga o Jisu Karisito.’ (2 Pita 1:1, 5-8) E loma i Pita me vukei ira mera vakataudeitaka na nodra kacivi kei na nodra digitaki mai vei Jiova, me na ‘kunei ira kina o koya ena vakacegu nira sa sega ni tauviduka, ka sega ni cala.’ (2 Pita 1:10, 11; 3:14) E levu era vakila sara ga ni yaco donu yani nona veivakayaloqaqataki.

² Era dau kauaitaki ira tale ga vaka oya na tamata ni Kalou nikua na ivakatawa lotu Vakarisito. Ena “veigauna dredre” oqo, e sega ni ka rawarawa na ituvaki era sotava e levu na tamata i Jiova. (2 Tim. 3:1, VV) E so ena tuburi ira na nuiqawaqawa vata ga e tuburi Tevita ni bikai ira na leqa vakailavo, leqa era sotava mai vale, se nodra leqa vakataki ira: “Sa voliti au na ka ca sa sega ni wili rawa: sa vauci au na noqui valavala ca, ka’u sa sega ni ta cake rawa kina; sa levu oqori ka lailai na drau ni uluqu: o koya sa waicala kina na yaloqu.” (Same 40:12) Ni veitaqataqai mai na leqa oqori, era na lai tini vakawaletaka kina na veika bibi vakayalo, cegu tale ga nodra lakova na cakacaka vakavunau vakarisito. Ia, e dina nira sotava na ituvaki dredre, era ‘sega ga ni guilecava na ivakaro i Jiova.’ (Same 119:176) Sa kena gauna donu sara ga oqori vei ira na qase mera solia kina na veivuke e gadrevi.​—Aisea 32:1, 2.

³ Me soli na veivuke oqori, era uqeti na qase mera navuca e dua na ituvatuva mera vukei kina vakatabakidua o ira na sa sega ni lakova tu na cakacaka vakavunau. Sa tekivu tiko ena gauna oqo na sasaga oqori, ena dewa sara yani ina vula o Maji. Era sa kerei tiko kina na ivakatawa ni vulivola mera sikovi ira na sa mate tu vakayalo, mera vakabulabulataki ira mera tosoya tale nodra veiqaravi ena ivavakoso. Ke gadrevi, ena tuvai mera vuli iVolatabu tale. Era na kerei e so tale mera veivuke. Ke o sureti mo veivuke, ena yaga sara oqori ke o veivakayaloqaqataki ena dela ni veinanumi kei na yalovinaka.

⁴ Ke sa mai tosoya tale nona veiqaravi ena ivavakoso e dua, sa bau ka rekitaki dina oqori. (Luke 15:6) Noda sasaga meda vakayaloqaqataka e dua sa mate tu vakayalo ena rawa ni okati sara ga me “ka sa vosataki taudonu.”​—Vkai. 25:11.