Gumatua ni ‘Vakadinadina’

1, 2. E uqeti iko vakacava na ivakaraitaki ni nona kacivaka na itukutuku vinaka o Paula, qai rawa vakacava nida muria na ivakaraitaki ni nona ‘dau vakadinadina’?

¹ Me vakataki Jisu ga kei na vuqa tale na dauveiqaravi yalodina e liu, na yapositolo o Paula e dua a gumatua ni kacivaka na itukutuku vinaka, e dau ‘vakadinadina’ ena veivanua kece ga. Ena gauna mada ga a tu vakavesu kina e nona vale, e “vakacegui ira kecega era sa lako vua, ka sa vunautaka na matanitu ni Kalou, ka sa vakatavuvulitaka vakadoudou sara na ka kei Jisu Karisito na Turaga.”​—Caka. 28:16-31.

² E rawa tale ga nida gumatua ni ‘vakadinadina’ ena veigauna kece ga. Oqo e okati kina noda vunau vei ira eda sotava ena vanua cava ga eda lako kina.​—Caka. 28:23; Same 145:10-13.

3. Eda na qarauna vakacava me kua ni ka e caka tu ga vakasauri se me sega ni nakiti na noda vunau tawalokuci?

³ Cava na Vunau Tawalokuci? Na vunau tawalokuci e sega ni dua na ka e yaco ga vakasauri qai sega ni nakiti, se me sega ni tuvanaki se sega ni bibi, ia e vakarautaki qai tuvanaki vakavinaka. Me vakataki Paula ga, e bibi vei keda noda vakarokorokotaka na Kalou ena noda vunau, qai dodonu me noda inaki meda vunau ena gauna veiganiti kece ga. O koya gona na sala eda torovi ira kina na tamata e rawa ni tukuni me tawalokuci ​—oya nida sega ni vakusakusataka noda veivosaki, da qai matamamarau. Oqo e rawa ni vuavuaivinaka.

4. E rawa vakacava vei Paula me vunau ena ituvaki e tu kina?

⁴ Vakarau Tu Mo Vunau: A vakayagataka e vuqa na sala o Paula me vunau, ena gauna a vesu tu kina e Roma. E dau vakaliuliu ni sureti ira na iliuliu vakajiu ina vale a vesu tu kina. (Caka. 28:17) Dina ga ni tiko e dua na ivavakoso vakarisito e Roma, ia e kila o Paula ni o ira na Jiu era tiko ena koro oya e lailai na ka era kila me baleta na vakabauta vakarisito. (Caka. 28:22; Roma 1:7) E sega kina ni tu vakasuka ni ‘vakadinadinataka’ vei ira na ka me baleti Jisu Karisito kei na Matanitu ni Kalou.

5, 6. Vanua cava so e rawa nida vunau tawalokuci kina, kei na cava meda vakarautaka me rawa ni laulau kina noda vunau?

⁵ Vakasamataka rawa e liu o ira o na rairai sotava era sega ni kila e levu na ka me baleti keda na iVakadinadina i Jiova. Era na sega beka ni kila ni sega ni saumi noda veivakavulici ena iVolatabu. Tu vakarau mo vunau vei ira o sotava ni o gole tiko ena dua na vanua, ni o kele mo vakacegu, vakatawa waiwai, volivoli, tiko ena otela, kana e valenikana, vodo basi kei na vuqa tale na sala. Vakarautaka rawa tu e liu na ka mo kaya me tekivutaki kina na veivosaki qai vunau vakalekaleka. Ena veisiga sa tu oqo e matada, e rawa nida vakatovotovotaka na vunau tawalokuci vei ira eda tiko veitikivi, vei ira na wekada, o ira eda cakacaka vata kei na so tale.

⁶ Ena gadrevi me tiko na ivola o na vakayagataka ni o vunau tawalokuci. Na ivola cava soti? O rawa ni vakayagataka na ivolacebaceba Oni Via Kila Vinaka na iVolatabu? Vakamacalataka e so na sala me wiliki kina na iVolatabu ena imatai ni lima na parakaravu. Vakaraitaka ena daku ni ivolacebaceba na vanua e rawa ni volavola mai kina e dua e kerea me vuli iVolatabu wale. Ke o kunea e dua na tataleitaki, solia na brochure na Loma ni Kalou. Ke o namaka mo na sotavi ira era vosataka e so tale na vosa, kauta tiko na ivola lailai na Good News for All Nations. E vakamacalataki ena tabana 2 na sala me ia kina na soli ivakadinadina. Ke o vodo motoka, e rawa ni o kauta e so tale na ivola me rawa ni soli vei ira na taleitaka na itukutuku ni Matanitu ni Kalou.

7, 8. Na ivakasala cava me baleta na keda irairai kei na noda itovo meda qarauna nida gole tiko ena dua na vanua, se nida lako vagade?

⁷ Qarauna na Kemu iRairai kei na Nomu iTovo: Meda qarauna na noda itovo kei na noda isulusulu mera kua kina ni raici keda vakatani se mera ‘vosa vakacacataka’ na isoqosoqo i Jiova. (Caka. 28:22) Na ivakavuvuli oqo e okati tale ga ena gauna eda gole tiko kina ena dua na vanua, se na ilakolako vagade. E veivakasalataki kina Na Vale ni Vakatawa, 1 Okosita, 2002, tabana 18, parakaravu 14: “Me kua ni rairai vakatani, rairai duatani, veivagarogaroi, se vakaraitaka na tikiniyagoda e dau ubia na isulu eda sulumaka. E dodonu tale ga me ‘kilikili kei ira sa lotu’ na noda isulusulu. E sega li ni vakavure vakasama oqo? Io, e sega ni dodonu me kilikili ga na noda isulusulu ena gauna ni soqoni [se soqo ni tikina] da qai sega ni kauaitaka na ka eda sulumaka ena veigauna tale e so. E dodonu me rakorako tu ga na keda irairai, baleta nida lotu Vakarisito da qai italatala tiko ena loma ni 24 na aua e veisiga.”​—1 Tim. 2:9, 10.

⁸ E dodonu me rakorako qai lokomi na noda isulusulu. Kevaka e laurai ena keda irairai kei na noda itovo nida vakabauta na Kalou, eda na sega ni tu vakasuka ni vunau tawalokuci ni rakorako tu na noda isulusulu.​—1 Pita 3:15.

9. E vuavuaivinaka vakacava nona vunau o Paula e Roma?

⁹ Vuavuaivinaka na Vunau Tawalokuci: Na rua na yabaki a vesu tu kina o Paula e Roma, e raica ni nona sasaga e vuavuaivinaka kina nona vunau. A kaya kina o Luke nira ‘vakadinata e so na veika sa vosataki.’ (Caka. 28:24) A dikeva tale o Paula na yaga ni nona ‘vakadinadina’ ena nona vola: “Sa tubu cake nai tukutukuvinaka e na vuku ni ka sa yaco vei au; a sa vakaraitaki kina na noqu vesuki e na vuku i Karisito vei ira kece ga na sotia e na vale ni tui, vei ira kece talega na kena vo; a ra sa lewe vuqa na veiwekani era sa tu vata kei na Turaga, era sa gumatua mai ni’u sa vesuki tu, a ra sa doudou cake kina me ra tukuna na Vosa ni Kalou ka sega ni rere.”​—Fpai. 1:12-14.

10. Cava rau marautaka e dua na veiwatini ena yabaki sa oti?

¹⁰ Ena yabaki sa oti, ni oti e dua na siga ena soqo ni tikina, e vuavuaivinaka nodrau vunau tawalokuci e dua na veiwatini vua e dua e cakacaka e valenikana ni a taroga na nodrau badge card. Rau tukuna vua na soqo ni tikina kei na inuinui e tu ena iVolatabu me baleta na kawatamata. Rau solia vua na ivolacebaceba Oni Via Kila Vinaka na iVolatabu? rau qai vakamacalataka na ituvatuva ni vuli iVolatabu wale. E vinakata sara ga na marama oya me dua e sikovi koya, a vola na yacana kei na nona itikotiko ena daku ni ivolacebaceba, qai kerei rau na veiwatini me rau tuvanaka. Cava o na marautaka ke o gumatua ni ‘vakadinadina’ ena veigauna kece ga, okati tale ga kina na gauna ni soqo ni tikina ena yabaki oqo?

11. Na itovo cava meda saga me tu vei keda me rawa nida vakatetea kina na itukutuku vinaka ena yabaki oqo ena noda ‘vakadinadina’?

¹¹ Vakatetea Vakavinaka na iTukutuku Vinaka: Dua na ka na marau i Paula ni rogoca nira vakadamurimuria tiko nona ivakaraitaki ni gugumatua na lotu Vakarisito! Meda cakava mada ga na kena levu eda rawata meda vakatetea yani kina na itukutuku vinaka e yavutaki ena iVolatabu.

[Kato ena tabana e 3]

iVola e Vinakati ena Vunau Tawalokuci

■ Oni Via Kila Vinaka na iVolatabu? (ivolacebaceba)

■ Na Cava e Loma ni Kalou vei Keda? (brochure)

■ Good News for All Nations (ivolalailai)

■ So tale na ivola

[Kato ena tabana e 4]

Kua ni Guilecavi Ira!

Guilecavi cei? O ira kece na tataleitaki era a tiko ena iVakananumi ni mate i Karisito se na vunau lavotaki. Eda sa sureti ira beka mera tiko ena soqoni ni ivavakoso kei na soqo ni tikina ena yabaki oqo? E vuqa vei ira ke ra uqeti vakayalololoma e rawa nira lako mai. Nira na marautaka na veitarai cake ni veimaliwai ena soqo ni tikina kei na veivakayaloqaqataki ni veika vakayalo, e rawa kina nira na toro voleka vei Jiova kei na nona isoqosoqo. Vakacava mo veisureti qai raica se cava ena yaco? Tukuna kece vei koya o sureta na ka ena vinakati me kila, okati kina na tikinisiga ni soqo ni tikina, na vanua ena caka kina, gauna ena tekivu kina kei na gauna ena oti kina, qai vakaraitaka vakalekaleka vua na porokaramu e koto ena daku ni Awake!, 8 June , 2003.