‘Vunau Sara Vakavinaka’

1. E ivakaraitaki vinaka vakacava na yapositolo o Paula ena cakacaka vakaitalatala?

¹ “Vakayacora vinaka sara na nomu i tavi.” (2 Tim. 4:​5, VV) A doudou ni cavuta na ivakasala qori na yapositolo o Paula vei Timoci. A vakacavara mada ga o Paula e tolu na nona ilakolako vakaulotu ena maliwa ni 47 kei na 56 S.K. E tukuni vakavica ena Cakacaka na nona ‘vunau sara vakavinaka’ o Paula. (Caka. 23:11; 28:23) Eda rawa ni cakava vakacava qori ena gauna qo?

2. Ena rawa vakacava nida vunau sara vakavinaka e veivale?

² Vunau e Veivale: Me rawa nida veitalanoa kei ira na taukeinivale era se sega ni bau rogoca na itukutuku vinaka, ena rairai gadrevi meda veisautaka na gauna eda sikovi ira kina. Kena ivakaraitaki, de dua ena vinakati meda vunau ena yakavi se muanimacawa meda rawa ni veitalanoa kei ira na ulunivale nira na tiko e vale ena gauna ya. E dodonu meda saga meda vosa sara ga vua e dua ena vale kece eda sikova, meda lesuvi ira wasoma tale ga na vale era dau lala tu. Vakacava ke o lesuva vakavica e dua, ia e guce na nomu sasaga? De dua ena vinaka mo volavola se qiri.

3. Na gauna cava o rawa ni vunau kina e matanalevu se vunau tawalokuci?

³ Matanalevu, Tawalokuci: O ira na dauveiqaravi i Jiova ena gauna qo era vakatakila tiko na ‘vuku dina’ vei ira kece era na vakarorogo. Ena so na gauna, e caka qori ena ‘gaunisala’ se ‘rara ni siti.’ (Vkai. 1:​20, 21) Nida cakava tiko na noda itavi e veisiga, eda dau vakasamataka meda vunau vua e dua? Vakacava e rawa ni tukuni nida ‘ogaoga sara ena vosa’? (Caka. 18:⁠5) Ke dina qori, eda sa vakayacora tiko na noda itavi meda ‘vunau sara vakavinaka.’​—⁠Caka. 10:42; 17:17; 20:​20, 21, 24.

4. Ena vukei keda vakacava na masu kei na vakasama vakatitobu meda vunau sara kina vakavinaka?

⁴ De dua eda na tu suka na vunau ena so na gauna ena vuku ni noda malumalumu se da mamadua ga. Meda nanuma tiko ni o Jiova e kila vinaka ni vakaiyalayala na ka eda rawa ni cakava. (Same 103:14) Ia ena gauna eda tu suka kina na vunau, meda masuti Jiova me vukei keda meda vosa ena doudou. (Caka. 4:​29, 31) Nida vuli tale ga vakataki keda qai vakasamataka vakatitobu na Vosa ni Kalou, meda saga sara me vakatitobutaki na kena talei vei keda na itukutuku vinaka. (Fpai. 3:⁠8) Qori ena uqeti keda meda gugumatua ena vunau!

5. Eda rawa ni vakaitavi vakacava ena vakayacori ni parofisai i Joeli?

⁵ A parofisaitaka o Joeli na ka ena yaco ni bera na siga levu qai rerevaki i Jiova, o ira na tamata ni Kalou era na toso ‘tiko ga’ qai sega ni dua na ka ena tarova na nodra vunau. (Joeli 2:​2, 7-9) Meda solia mada ga na noda vinaka taucoko ena cakacaka vakavunau ni na sega ni tokaruataki tale!