Vakatotomuria na Yalovinaka i Jiova
1 E sega beka ni veiuqeti na noda sarava na totoka ni dromu ni siga vaka kina noda kania e dua na kakana vinaka meda na vakavinavinakataki Jiova kina? E uqeti keda nona yalovinaka meda vakatotomuria. (Same 119:66, 68; Efeso 5:1) Eda na vakaraitaka vakacava na yalovinaka?
2 Vei Ira na Sega ni Vakabauta: E dua na sala eda rawa ni vakatotomuria kina na yalovinaka i Jiova oya meda nanumi ira eda sega ni vakabauta vata. (Kala. 6:10) Noda yalovinaka vei ira ena veisautaka na nodra rai me baleti keda na iVakadinadina i Jiova kei na itukutuku eda kacivaka.
3 Kena ivakaraitaki, erau dabe veitikivi toka e valenibula e dua na tacida tagane painia kei na dua na marama e rairai tauvimate bibi. Ni sa yacova mai na gauna me laurai kina na tacida oqo, e tukuna vua na marama oya me liu vua. E muri rau qai sota tale ena makete, e marautaka sara na marama oya ni raici koya. E dina ni sega ni dau vakarorogo e liu ni vunautaki yani na itukutuku vinaka, ia sa qai kila oqo nira dau veilomani dina na iVakadinadina i Jiova. A tekivu sara na vuli iVolatabu kei koya.
4 Vei Ira na Tacida: Eda vakatotomuria tale ga na yalovinaka i Jiova ena noda vukei ira na tacida vakayalo. Eda dau yaco totolo yani meda vukei ira ena gauna ni cagilaba se waluvu. Eda vakaraitaka na yalo vata ga oqori nida vukei ira e dredre mera lako vakataki ira ena soqoni, da sikovi ira na malumalumu vakayago qai kauaitaki ira tale ga eda sega ni veikilai vinaka ena ivavakoso.—2 Kor. 6:11-13,VV; Iper. 13:16.
5 Dua tale na sala e yalovinaka kina o Jiova ni dau “tu vakarau me veivosoti.” (Same 86:5, NW) Eda na vakatotomuri koya nida yalovinaka vei ira tale e so ena noda vosoti ira. (Efeso 4:32, VV) Oqori ena ‘vinaka qai yaga’ kina na noda veimaliwai kei ira eda vakabauta vata.—Same 133:1-3.
6 Me vuabale mada ga na noda marau kei na vakavinavinaka vei Jiova ena vuku ni nona yalovinaka. Me uqeti keda mada ga na nona yalovinaka meda vakamurimuri koya ena veika kece eda cakava.—Same 145:7; Jere. 31:12.