Keimami Dau Vakavinakataka Vakacava na Neimami Vale ni Soqoni?

Na Vale ni Soqoni kece ni iVakadinadina i Jiova, e tiko kina na yaca tabu ni Kalou. E ka dokai gona qai tiki ni neimami sokalou na neimami veivuke ena kena samaki na neimami Vale ni Soqoni me rawa ni totoka tu ga na kena irairai kei na kena ituvaki. Qori e neimami itavi kece.

Bole ena sasamaki ni suka na soqoni. Ni suka na soqoni, keimami dau marautaka kece na sasamaki ena Vale ni Soqoni. Ia vakadua ena dua na macawa ena dau samaki sara vakavinaka. Ena liutaka qori e dua na qase se dauveiqaravi ni ivavakoso ni muri na ituvatuva sa vakarautaki tu. Eso era bole mera tataviraki se vacuum, quaqua, tuva idabedabe, masi vale lailai, qua katubaleka kei na iloilo, yau benu se sasamaki e tuba kei na lomanibai. Vakadua ena dua na yabaki ena dau tuvanaki e dua na siga me vakayacori kina e dua na sasamaki e vakaitavi kece kina na ivavakoso. Era na vulica na gone mera doka na vanua ni soqoni ke ra dau vakaitavi ena sasamaki.​—Dauvunau 5:1.

Bole ena vakavinakataki ni so na ka. E dau dikevi vakamatailalai e veiyabaki na Vale ni Soqoni, e loma vaka tale ga kina e tuba. Ni muri na veika e dikevi qori, ena wasoma na kena vakavinakataki na Vale ni Soqoni me vinaka tu na kena ituvaki qai sega ni vakalusi ilavo. (2 Veigauna 24:13; 34:10) E kilikili me sokaloutaki na noda Kalou ena Vale ni Soqoni e savasava qai vinaka tu na kena ituvaki. Neimami vakaitavi ena cakacaka qo e vakaraitaka neimami lomani Jiova qai doka na vanua ni sokalou. (Same 122:1) Ena vinaka tale ga kina na keimami irogorogo vei ira na tiko voleka.​—2 Korinica 6:3.

• Na cava keimami sega ni vakawalena kina na neimami vanua ni sokalou?

• Na ituvatuva cava e muri me savasava tiko ga kina na Vale ni Soqoni?