Oqo na Gauna ni Vunau!

1. Na cava meda vunau sara ga kina ena gauna oqo?

¹ “Rerevaka na Kalou, ka vakarokoroko vei koya.” Ena veidusimaki ni agilosi e kacivaki kina na itukutuku oqo “vei ira kece . . . na veimatanitu, kei na veimataqali, kei na duivosavosa, kei ira na tamata.” Na vuna? “Ni sa yaco na nona gauna [na Kalou] me lewa.” Eda sa bula tu nikua ena ‘gauna ni lewa’ oqori, ena cava ena kena vakarusai na ituvaki kei vuravura. E bibi gona vei ira na tamata mera “vakarokoroko vei koya ka buli lomalagi, kei vuravura, kei na wasawasa, kei na veivurevure-ni-wai.” Sega tale ni dua na cakacaka nikua e rawa ni vakatauvatani kei na kena bibi kei na vakatotolotaki ni kena vunautaki na “[i]tukutuku-vinaka e sega ni oti rawa.” Io, oqo na gauna ni vunau!​​—⁠Vkta. 14:​6, 7.

2. Era sa vakaraitaka tiko vakacava na dauveiqaravi i Jiova na bibi ni gauna eda sa bula tu kina oqo?

² Ena loma ni tini na yabaki sa oti, era vakayagataka na dauveiqaravi i Jiova e rauta ni 12 na bilioni na aua mera vunautaka kina na Matanitu ni Kalou, vaka kina na cakacaka ni veivakatisaipelitaki. E levu era veisautaka nodra ivakarau ni bula mera vakaitavi kina vakalevu ena tatamusuki vakayalo. (Maciu 9:​37, 38, VV) Kena ivakaraitaki, ena yabaki sa oti e kena ivakatautauvata e sivia ni 850,000 na dautukutuku era painia e veivula. E gadrevi vei ira na painia tudei mera rawata na ivakatautauvata ni 70 na aua e veivula ena cakacaka vakavunau. Limasagavulu na aua vei ira na painia veivuke.

3. Na veiveisau cava e rawa nira cakava na dautukutuku mera painia kina?

³ Ka e Gadrevi Vua na Painia: Nira kila na painia ni “sa vakalekalekataki na gauna sa vo,” era saga me rawarawa ga na ivakarau ni nodra bula. (1 Kor. 7:​29, 31) Era dau qara na sala mera maninitaka kina na ilavo, me kua kina ni levu na gauna era vakayagataka ena cakacaka saumi. Kena ivakaraitaki, e so era toki ena vale lalai. E so tale era kauta laivi e so na nodra iyaya e sega soti ni yaga. (Maciu 6:​19-​21) Era vakalailaitaka tale ga nodra vakaogai ira ena ka e baleti ira ga. Na inaki ni kena caka na ka kece oqo me rawa ni levu kina na gauna me kauaitaki qai vakayacori kina na cakacaka vakavunau. (Efeso 5:​15, 16) Nodra gumatua e levu na dautukutuku, nodra vakuai ira ena so na ka, kei na nodra nuitaki Jiova dina, e rawa kina mera painia.

4. Na ikalawa cava e rawa ni uqeti keda meda rawata tale ga kina na isausau ni painia?

⁴ E rawa beka nida painia? Vakacava meda tarogi ira na painia gugumatua ena ka era cakava mera painia kina. Meda cakacaka vakavunau vata kei ira meda vakila kina na nodra marau. Meda vulica na ulutaga e baleta na painia e dau tabaki ena noda ivola. Meda tekia e so na isausau me ikalawa ni noda rawa ni painia tale ga. Ke dua beka na ituvaki ena vakataotaka na noda painia, vakaraitaka vei Jiova ena masu, qai kerea nona veivuke.​​—⁠Vkai. 16:⁠3.

5. E yaga vakacava na cakacaka vakapainia meda vakavinakataka kina noda cakacaka vakavunau?

⁵ Yaga kei na Marautaki ni Painia: Na cakacaka vakapainia e toroya cake na noda maqosa ni vakayagataka na Vosa ni Kalou, e vakavu marau tale ga. “E ka yaga dina na noda wasea vakadodonu na ivakavuvuli dina,” e kaya e dua na painia gone. “Nida cakacaka vakapainia eda na dau vakayagataka wasoma na iVolatabu. Ena gauna oqo niu qai dau gole yani e veivale, sa tiko sara ga ena noqu vakasama na veitikinivolatabu e ganiti ira na itaukeinivale yadua.”​​—⁠2 Tim. 2:​15.

6. Na cava e dau vulici ena cakacaka vakapainia?

⁶ E yaga tale ga na cakacaka vakapainia baleta ni rawa nida vulica kina e levu na ka ena yaga ena noda bula. E rawa nira vulica na itabagone na sala mera vakayagataka vinaka kina na nodra gauna, nodra ilavo, kei na veimaliwai kei ira tale e so. E levu era vulica ena cakacaka vakapainia mera dau vakaliuca na rai vakayalo. (Efeso 4:​13) Era kalougata tale ga na painia nira dau vakila vakalevu na veivuke ni liga i Jiova.​​—⁠Caka. 11:21; Fpai. 4:​11-​13.

7. E vukei keda vakacava na cakacaka vakapainia meda toro voleka vei Jiova?

⁷ E yaga vakalevu na cakacaka vakapainia baleta nida na toro voleka kina vei Jiova. Oqo e rawa ni vakaukauataki keda nida sotava na veika dredre. A kaya e dua na tacida yalewa a vosota voli ena dua na gauna na veika dredre: “Na veiwekani voleka au bucina kei Jiova ena noqu cakacaka vakapainia e vukei au meu vosota na veika dredre au sotava.” E kuria: “Au marau dina niu vakayagataka na noqu bula vakauabula meu qaravi Jiova kina vakatabakidua. E rawa kina meu soli au vakatabakidua ena sala au sega ni tadra.” (Caka. 20:35) Meda vakila tale mada ga na veivakalougatataki nida cakava ena noda vinaka taucoko na cakacaka bibi duadua, oya na cakacaka vakavunau.​​—⁠Vkai. 10:⁠22.