Ra iTabagone​—Yavutaka Dei Nomuni Bula Mai Muri

1. Na cava mo ni bucina kina na vakabauta kaukaua na itabagone lotu Vakarisito?

¹ Na cava e dau gole vakalevu kina nomu vakasama? Na cava o dau veinanuyaka? O dau kauai ga vakalevu ena ka ni bula oqo, se na ka me baleta na veigauna mai muri, e vauci kina na veika sa yalataka na Kalou? (Maciu 6:24, 31-33; Luke 8:14) Gadrevi na vakabauta kaukaua, me vaka eda raica vei Eparama kei Mosese, me rawa kina nida kakavaka na veika e yalataka na Kalou. (Iper. 11:8-10, 24-26) O na bucina vakacava na vakabauta vaka oya mo rawa ni bulia cake kina “na yavu e na yaga e na gauna e muri mai”?​—1 Tim. 6:19.

2. Na cava eda vulica mai na ivakaraitaki i Tui Josaia?

² Vakasaqarai Jiova: E vinaka ke sa muria tiko nomu vuvale e dua na ituvatuva ni veika vakayalo. Ia kua ni nanuma ni na tu tu ga sa na kaukaua nomu vakabauta mai na kena tiko na ituvatuva oqori. Ke o vinakata mo “kunea na Kalou mo kilai koya,” o iko sara ga mo na sasaga mo vakasaqarai Jiova. (Vkai. 2:3-5; 1 Vei. 28:9) A vakayacora oqori na tui gone o Josaia. Dina ni susugi ena ituvaki e sega ni vinaka vakayalo, “a sa vakatekivu [ga] ko koya me vakasaqara na Kalou i Tevita na tamana” ni se qai yabaki 15.​—2 Vei. 34:3.

3. Era na vakasaqarai Jiova vakacava nikua na itabagone lotu Vakarisito?

³ O na vakasaqarai Jiova vakacava? Mai na nomu dikeva vakavinaka na ka o vakabauta, mo qai “vakadinadinataka vei iko ga” ni oqori na ka dina. (Roma 12:2, NW) Kaya mada, o rawa beka ni vakamacalataka na ka e tukuna na iVolatabu me baleta na dra, se vakadeitaka ni tekivu veiliutaki ena 1914 mai lomalagi na Matanitu ni Kalou? Dua na sala bibi mo yavutaka dei kina nomu bula mai muri oya nomu “kila sara nai vakavuvuli dina.”​—1 Tim. 2:3, 4.

4. Cava mera cakava na dautukutuku bera ni papitaiso me laurai kina nodra toso vakayalo?

⁴ Tini vinaka nona vakasaqara na Kalou o Josaia. Se bera mada ga ni yabaki 20, sa yavala ena doudou me vakawabokotaka na sokalou lasu. (2 Vei. 34:3-7) Vei iko tale ga, na nomu toso vakayalo ena laurai ena ka o cakava. (1 Tim. 4:15) Ke o sa dautukutuku bera ni papitaiso, saga mo vakavinakataka cake nomu cakacaka vakavunau. Kua ni o soli ivola wale tu ga. Me nomu isausau mo vakayagataka na iVolatabu ena nomu veivosaki e veivale kei na nomu vakayagataka ena nodra uqeti na tataleitaki. (Roma 12:7, VV) Ena yaga oqori ena nomu tubucake vakayalo.

5. Sala cava soti e rawa nira vakarabailevutaka kina nodra cakacaka vakaitalatala na lotu Vakarisito papitaiso?

⁵ Solia Vei Jiova Nomu Vinaka Duadua: Ni o sa vakadinadinataka nomu yalayala vei Jiova ena nomu papitaiso, ena gauna oqori o sa lesi kina mo dua na italatala ni Kalou. (2 Kor. 3:5, 6) Sa na rawa sara vei iko mo qaravi Jiova ena cakacaka vakaitalatala vakatabakidua. E okati e keri na cakacaka vakapainia, veiqaravi e Peceli, kaulotu, kei na so tale na basoga ni veiqaravi e veivanua tani. So tale na sala mo vakarabailevutaka kina nomu cakacaka vakaitalatala oya nomu vulica e dua tale na vosa se na nomu toki mo lai veiqaravi ena vanua e gadrevi cake kina na veivuke.

6. Rawa vakacava vei keda kece meda yavutaka dei noda bula mai muri?

⁶ Macala ga ni sega ni tamata kece e rawa nira vakaitavi ena ilesilesi dokai oqori, ia o keda yadua e rawa nida solia vei Jiova na noda vinaka taucoko. (Maciu 22:37) Ena ituvaki cava ga o tu kina, me usutu mada ga ni nomu bula na qaravi Jiova. (Same 16:5) Mai na nomu cakava oqori, o sa na yavutaka dei tiko kina na nomu bula mai muri.