E Bibi na Soqoni Wasoma
1 E ka bibi vei ira na matavuvale lotu Vakarisito mera dau tiko wasoma ena soqoni. Ia, e dau veivakaleqai na bula osooso nikua. Sa tekivu vakataotaka beka na nomu sokalou vei Jiova na cakacaka ni vale, cakacaka saumi, se ka ni vuli? Kevaka wale ga e tiko vei keda na rai nei Jiova, eda na vakaliuca tiko ga na veika e bibi.—1 Sam. 24:6; 26:11.
2 A sega ni tu vua e dua na tagane ni Isireli na rai nei Jiova ena nona cabuka ena dua na siga ni vakacecegu. Ena rairai kaya beka ni cakava tiko oya me baleta nona vuvale, se raica me ka lailai wale sara. Ia, mai na itotogi e tau vua e vakaraitaka kina o Jiova ni dodonu me vakabibitaki na gauna ni sokalou, me kua ni vakaliuci na veika e sega soti ni bibi.—Tiko 15:32-36.
3 Ka ni Bolebole: E ka ni bolebole dina vei ira e levu me kua ni vakaosoosotaki ira na nodra cakacaka ena gauna ni soqoni. E so era sa walia na leqa oqo ena nodra veivosakitaka sara ga kei na nodra boso, ra veisau yadra, ra vaqara tale beka e dua na cakacaka vou, se ra bolea mera sa na bula rawarawa ga. Sega ni vakabekataki ni vakamarautaka na Kalou na nodra vakuai ira ena veika oqori ena vuku ga ni sokalou dina.—Iper. 13:16.
4 Na ka ni vuli tale ga e dau ka ni bolebole. E kaya e dua na itabagone: “Au dau cakava e so na noqu ka ni vuli ni bera na soqoni, ia na kena vo e dau qai mai caka niu sa lesu mai.” Ke dau sega ni vakaoti na ka ni vuli ena bogi ni soqoni, e so na itubutubu era sa dau lai vakamacalataka vei ira na qasenivuli ni bibi na soqoni ena nodra vuvale.
5 E bibi mera tuvana vinaka ra qai veitokonitaka na lewenivuvale na cakacaka ni vale, me rawa kina nira tiko kece ena soqoni ni bera ni tekivu. (Vkai. 20:18) Mera vakavulici sara mada ga na gonelalai mera dau vakaisulu totolo ra qai waraka tu na gauna lokuci mera biubiu kina. Ena nodrau ivakaraitaki na itubutubu, era na vulica kina na gone na bibi ni tiko ena soqoni.—Vkai. 20:7.
6 Ni sa qai torocake tiko ga na dredre ni bula nikua, sa bibi ga meda dau tiko wasoma ena soqoni vakaivavakoso. O koya gona, me tiko mada ga vei keda na rai nei Jiova ena veigauna taucoko, da qai vakaliuca na noda tiko wasoma ena soqoni.—Iper. 10:24, 25.