iTuvatuva Vakavuvale—Soqoni
1 Ke o itubutubu lotu Vakarisito, o na vinakata sara ga me tubucake na luvemu me lomani Jiova, me qaravi koya tale ga, ia e muri me bula tawamudu ena ituvaki vou sa yalataka tu na Kalou. Ia o na uqeti ira vakacava na luvemu mera vakaliuci Jiova? E bibi sara ga na nomu ivakaraitaki. (Vkai. 20:7) E kaya e dua na tacida yalewa me baleti tinana: “Keitou rawa ni calata e so tale na ka, ia na soqoni sa sega tu ga.” E sega ni guilecava oqo na tacida.
2 Dou sa kila tiko beka vakavuvale na inaki ni soqoni? Na ivakasala eda rogoca ena soqoni e vakaukauataki keda meda cakava tiko ga na loma ni Kalou, qai vakabulabulataki keda tale ga na noda veimaliwai kei ira na tacida. (Aisea 54:13; Roma 1:11, 12) Ia, na inaki bibi ni soqoni me vakacaucautaki kina o Jiova “e nai soqosoqo.” (Same 26:12) Na noda tiko ena soqoni sa rawa nida qai vakaraitaka kina na noda lomani Jiova kei na noda via sokaloutaki koya.
3 ‘Meda Raici Keda Vinaka’: Noda kila na inaki bibi ni soqoni ena uqeti keda meda ‘raici keda vinaka,’ meda kua kina ni calata ena vuku ni so na ka e sega soti ni bibi. (Efeso 5:15, 16; Iper. 10:24, 25) Na soqoni me liu sara ga ena ituvatuva vakavuvale, qai volai na kena gauna. Me qarauni me kua ni vakaleqa na ituvatuva oqori e so tale na ka e dau basika mai.
4 E dau veiuqeti dina na noda wilika na kedra itukutuku na tacida era vosota na veika dredre mera tiko rawa kina ena soqoni se na soqo lelevu. De na sega beka ni vaka sara oya na keda ituvaki, ia ena rairai tiko ga e so na ka dredre eda sotava. Sa qai vakadredretaka tiko ga o Setani vei ira na dausokalou dina mera qaravi Jiova. Ia, mo ni nuidei na itubutubu nira na raica tiko na gone na nomuni sasaga vakavuvale mo ni dau tiko ena soqoni. Na nomuni cakava oqori, o ni sa vakarautaka tiko kina vei ira na luvemuni na isolisoli vakayalo era na sega vakadua ni guilecava.