Me Yaga Nomu Vulica na iVola Toro Voleka Vei Jiova
1 Eda marau nida taura na ivola Toro Voleka Vei Jiova ena soqo ni tikina e kena usutu “Dauvunau Gugumatua ni Matanitu ni Kalou.” E levu era wilika ga ena gauna era taura kina. E sega ni vakabekataki ni levu tale era wilika ni uqeti ira na tikinivolatabu ni yabaki 2003: “Toro voleka yani vua na Kalou, ka na toro voleka mai vei kemudou ko koya.”—Jeme. 4:8.
2 Eda na tekivu vulica ena vula o Maji ena Vulivola ni iVavakoso na ivola Toro Voleka Vei Jiova. Sala cava e rawa ni yaga kina vakalevu vei keda na vuli oqo? E bibi na vakavakarau. Ena vulici tiko ena loma ni rua na macawa e dua ga na wase, ena lailai ga kina na parakaravu e tuvani me vulici ena veimacawa. Oqo me rawa ni levu na gauna o vakamacala kina mai vu ni lomamu ena nomu vulica kei na nomu vakasamataka vakatitobu na tikina e vulici tiko. Ena lailai ga na parakaravu ena vulici ena macawa ena railesuvi kina e dua na wase, me rawa ni veivosakitaki kina na kato.
3 E tekivu tabaki ena wase 2 na kato e kena ulutaga “Taro me Vakananumi,” e koto ena icavacava kece ni wase. Ni sa veivosakitaki oti na iotioti ni parakaravu ni dua na wase, me qai veivosakitaki na kato. Me veiuqeti na ivakatawa mera vakamacalataka na lewe ni vulivola na ka era nanuma, oqo me veivosakitaki kina na veitikina vinaka era a vakananuma mai vakatitobu ena iVolatabu. (Vkai. 20:5) Me ikuri ni taro e koto ena kato, ena gadrevi ena so na gauna me taroga tale e so na taro na ivakatawa me vaka oqo: “Cava e tukuna vei iko na itukutuku oqo me baleti Jiova? E cakayaco vakacava ena nomu bula? O na vakayagataka vakacava mo vukei ira tale kina na so?” Me nona isausau na ivakatawa me uqeti ira mera vakamacala mai vu ni lomadra, me kua ga ni nona inaki me veitarotarogitaka wale tu ga na veitikina e sega soti ni bibi.
4 Na ivola Toro Voleka Vei Jiova e duatani mai vei ira na ivola tale e so. Dina ga ni ivola kece e tabaka mai o koya “na dauveiqaravi yalo dina ka vuku” e vakacaucautaki kina o Jiova, ia na ivola oqo e vakatabakidua na kena veivosakitaki kina na itovo talei i Jiova. (Maciu 24:45-47, VV) Ena totoka dina na gauna eda sa na vulica kina! Ena yaga vakalevu vei keda na noda vulica vakatitobu na itovo i Jiova. Me vukei keda mada ga na vuli oqo meda toro voleka yani kina vua na Tamada vakalomalagi, me rawa tale ga nida vukei ira tale e so mera cakava vaka kina.