“Sa Qai Taucoko na Noqu Bula”

“DUA na ka noqu vakavinavinakataka na iloloma totoka oqo, Toro Voleka Vei Jiova. Sa qai taucoko na noqu bula​—niu sa qai vakila sara ga ni lomani au o Jiova, e vakamareqeti au tale ga. Au sa qai voleka sara oqo vei Jiova kei na Luvena lomani o Jisu. Au via tukuna vei ira na tamata kece me baleta na ivola oqo, mera yadua tale ga na wekaqu na kena ilavelave.” Oqo na ka e tukuna e dua na iVakadinadina i Jiova me baleta na ivola e 320 na tabana a soli ena soqo ni tikina a vakayacori ena 2002/03 na “Dauvunau Gugumatua ni Matanitu ni Kalou.” Meda dikeva mada e so na ka e baleta na ivola vou oqo kei na vuna e tabaki kina.

E So na Ka e Baleta na iVola Vou

Na cava e lewenivola vou oqo? Na veika kece e lewena na rua na ulutaga ni vuli ena itabataba oqo​—kei na vuqa tale! Na ivola oqo e 31 na kena wase, na balavu ni wase yadua e vaka ga na balavu ni ulutaga ni vuli Vale ni Vakatawa. Ni oti na ivakamacala taumada kei na imatai ni tolu na wase, sa qai wasei vakava na ivola, na va na iwasewase oqo era vakamacalataka yadua na va na idivi i Jiova. E tekivu na iwasewase yadua ena kena vakamacalataki vakalekaleka na idivi. Sa qai vakamacalataki ena wase e tarava yani na sala e dau vakaraitaka kina o Jiova na idivi yadua. Na iwasewase yadua e tiko kina e dua na wase e vakamacalataki Jisu. Ena vuku ni cava? Me vaka a kaya o Jisu: “Ko koya sa raici au, sa raici Tamaqu.” (Joni 14:9) E iyaloyalo i Jiova o Jisu, e vakavatukanataka sara ga o koya na bulataki ni veika e so e dau kilai kina na Kalou. E vakamatatataki vei keda ena icavacava ni iwasewase yadua na sala e rawa nida vakatotomuri Jiova kina ena noda bulataka na veika e kilai kina o koya me vaka e vakamacalataki ena wase oqori. Ni vakamacalataki ira na idivi kei Jiova na ivola vou oqo, e vakayagataka na iVolatabu taucoko.

E tiko tale e so na sala e duatani kina na ivola Toro Voleka Vei Jiova. E tiko ena wase taucoko, tekivu ena wase 2, e dua na kato e vakatokai na “Taro me Vakananumi.” Na tikinivolatabu kei na taro era volai ena kato oqo e sega ni railesuvi kina na wase. Ia, e vakarautaki ga me vukei iko ena nomu vakayagataka na iVolatabu mo vakananuma kina vakatitobu na ulutaga e vulici. E vakaturi mo wilika vinaka na tikinivolatabu kece e volai. Vakasamataka na taro, oti mo qai tovolea mo raica na ka o vulica kina. Nomu vakananuma na veika oqo ena vakarawarawataka nomu saga mo toro voleka vei Jiova.​—Same 19:14.

E vakarautaki, e dikevi vinaka tale ga na iyaloyalo e vakayagataki ena ivola Toro Voleka Vei Jiova me rawa ni yaga qai veivakauqeti. E 17 na wase kece e robota na kedra drauniveva na iyaloyalo totoka e so mai na gauna vakaivolatabu.

Na Vuna e Tabaki Kina?

Na cava na vuna e tabaki kina na ivola na Toro Voleka Vei Jiova? Na inaki levu ni ivola vou oqo me vukei keda meda kilai Jiova vinaka qai qaqaco tale ga kina noda veiwekani kei na noda Kalou.

O rawa ni vakasamataka e dua e rawa ni yaga tale ga vua na ivola Toro Voleka Vei Jiova, o ira beka na vuli iVolatabu se o ira sara mada ga na tacida lotu Vakarisito sa ra malumu tu vakayalo? Vakacava, o sa tekivu wilika na ivola vou oqo? Ke se bera, vakacava mo sa tuvanaka sara ga oqo na gauna mo tekivu kina? Dau vakananuma na ka o wilika. Me uqeti iko mada ga na ivola oqo mo toro voleka vua na Kalou o Jiova, mo rawa kina ni kacivaka na itukutuku vinaka ni nona Matanitu ena yalomarau, kei na yalogu!