Vakatotomuria na iTovo ni Rai i Jisu
1. Na yalo vakacava e tiko vei Jisu?
1 E dina nida sega ni raica na Luve ni Kalou, eda na lomani koya ga mai na veika e volai tu baleti koya kei na nona cakacaka vakavunau. (1 Pita 1:8) Ena nona talairawarawa ni cakava na loma i Tamana, e biuta kina na nona itutu cecere mai lomalagi me mai bula e vuravura. Ena nona bula vakatamata, e vunau vei ira e so tale ena nona veinanumi, qai mate mera vakabulai kina na kawatamata. (Maciu 20:28) E uqeti keda na Vosa ni Kalou: “Me tiko e na lomamudou na yalo oqo ka tiko talega vei Karisito Jisu.” Eda na vakatotomuri Jisu vakacava ena nona dau lomasoli?—Fpai. 2:5-8.
2. Na ka ni bolebole cava era sotava e levu na lotu Vakarisito? Era na walia vakacava?
2 Nida Oca Tu: Dina ga ni tamata uasivi o Jisu, ia e dau oca tale ga. Dua na gauna ni ‘oca tu mai ena nona ilakolako,’ a vunau ga vua e dua na yalewa ni Samaria. (Joni 4:6) E levu na lotu Vakarisito nikua era sotava tale ga na ka ni bolebole oqori. Ni oti e dua na macawa ni cakacaka, sa na rairai sega vei ira na igu mera vunau kina. Ia, kevaka eda vakamatauni keda ena cakacaka vakavunau eda na bulabula kina vakayalo.—Joni 4:32-34.
3. Eda na vakatotomuri Jisu vakacava ena nona dau lomasoli ni veivakavulici?
3 Dua tale na gauna, a lako o Jisu kei iratou na nona tisaipeli ena dua na vanua lala me ratou vakacegu kina vakalailai. Ia, e levu era kila ra qai lai tavaki iratou mai liu. E sega ni cudru o Jisu, ia e “lomani ira” ga qai tekivu “vakatavulici ira e na ka e vuqa.” (Mari. 6:30-34) E gadrevi tale ga na itovo vaka oqori me tekivutaki kina na vuli iVolatabu. E vinakati na sasaga vagumatua kei na nodra lomani dina na tamata. Kevaka e se sega tiko nomu vuli iVolatabu, kua ni yalolailai ena nomu vaqara e dua.
4. E yaga vakacava na cakacaka vakapainia veivuke meda vakatotomuria kina na itovo ni rai i Jisu?
4 Vakaliuca na Veika Vakayalo: Ena dei tiko ga na noda rai ena veika vakayalo ena gauna eda cakacaka kina vakapainia veivuke. E kaya e dua na tacida goneyalewa: “E uqeti keirau na tina i dua na noqu itokani me keirau painia veivuke vata kei koya me dua na vula. Au marautaka dina na neirau cakacaka vata kei koya. Au marautaka na noqu sa qai kilai ira vinaka na mataveitacini, ra sa mai vaka sara ga na noqu vuvale. Au sega wale ga ni marautaka na noqu tukuna vei ira e so tale na veika baleti Jiova, au vakavulici ira tale ga ena veika talei me baleta na ka dina ni Matanitu ni Kalou. Na ka kece oqo e vakavolekati au vei Jiova kei na nona isoqosoqo.”—Same 34:8.
5. Na cava meda dau saga tiko ga kina meda vakatotomuria na itovo ni rai i Jisu?
5 Erau dau veileti tiko ga na yagoda ivalavala ca kei na noda gagadre ni via vakamarautaki Jiova. (Roma 7:21-23) Meda vorata na yalo ni vuravura e sega kina na lomasoli. (Maciu 16:22, 23) Ena vukei keda o Jiova ena yalona tabu meda rawata vinaka kina noda itavi. (Kala 5:16, 17) Nida waraka tiko meda vakabulai yani ena vuravura vou ni Kalou, meda vakatotomuria mada ga na itovo ni rai i Jisu ena noda dau vakaliuca na veika me baleta na Matanitu kei na veika me baleti ira e so tale.—Maciu 6:33; Roma 15:1-3.