iVakatagi e Veivakacegui
1 E tiki bibi ni sokalou dina na lagasere kei na ivakatagi. E Isireli makawa, eratou lagata o Esafa kei iratou na tacina: “Dou ia na vakavinavinaka vei Jiova . . . Dou sere vua, dou seretaka vua na sere, Dou tukutukuna na nona cakacaka mana kecega.” (1 Vei. 16:8, 9) Eda lagasere tale ga vei Jiova nikua nida soqoni vakarisito ena veimacawa. (Efeso 5:19) Oqo e dua na sala vinaka meda vakavinavinakataka kina na yacana!—Same 69:30.
2 Eda dau vakasamataka na veika vakayalo nida rogoca tiko na Kingdom Melodies, na ivakatagi ni noda sere era sa katoni tu. E vakamacalataka e dua na tacida yalewa: “Niu rogoca tiko na Kingdom Melodies, e dau votu mai vei au na qaqana. Oqo e sala vinaka ni noqu dau vakasamataki Jiova, niu rogoca tiko na ivakatagi!”—Fpai. 4:8.
3 Gauna me Rogoci Kina: Ni vakatagitaki na Kingdom Melodies e vale, ena vakilai kina na veivakabulabulataki vakayalo qai kauta mai na vakacegu ena lomanivuvale. E tauri gona na ivola oqo mai na dua na vuvale: “Keitou dau rogoca wasoma na [ivakatagi] qo ni keitou tiko e vale, kei na gauna keitou vodo motoka kina, keitou sega vakadua ni oca. Vuqa na gauna, na neitou rogoca na Kingdom Melodies e dau vakarautaka vinaka sara ga na neitou itovo ni rai, vakauasivi ni keitou vakavakarau tiko me keitou lako ina soqoni, se gauna keitou lako tiko kina ina dua na soqo ni tikina.” E kaya e dua na tacida yalewa: “Au dau marautaka noqu cakacaka ni vale niu vakarogoca tiko na Kingdom Melodies—o cei beka ena bau nanuma tu ni marautaki na lobi isulu? Tekivu oqo lako yani, au na rogoca tu ga na ivakatagi oqo ena gauna au vakila kina niu rarawa. Dua na ka na vakacegu au dau vakila niu rogoca na ivakatagi oqo! . . . E vakamarautaki au na sere kece.” E tiko beka e so na gauna ena yaga kina vei iko na ivakatagi e veivakacegui vaka oqo?
4 Levu ga na sere nikua e vakauqeta na vakasama kei na yalo vakavuravura. E rawa nira vukei luvedra na itubutubu mera taleitaka na ivakatagi e veivakacegui qai yaga nira vakayagataka na Kingdom Melodies. Levu na vuli iVolatabu kei na tataleitaki era na via kila na sere kei na ivakatagi totoka oqo, e veivakacegui qai vakavinavinakataki kina o Jiova.—Same 47:1, 2, 6, 7.